Tinumper yayna si Saulo kona ni Jesus
9
aSi Saulo anamaet, manꞌituluy-tuloy nay pangliliꞌmo tan pangmamati na konran tumutumbok kona ni Jesus. Nako ya konan Sangkataꞌgayan nin Padiꞌ 2 tan nangalap yan surat nin mangibaritaꞌ konran pupangulo sa susinaguga ran Judio sa syudad nin Damasco a binyan ya nin aburoy nin dakpen nasara a sarba ran maꞌkit nan mantumumbok konan siti si Baꞌyon Dalan, lulalaki o bubbayi man. Ket awiten nasarayti nin ipriso sa Jerusalem.3 Sawanin, sin itaw sarayna sa dalan si Saulo nin adani sarayna sa Damasco, bigraꞌ anan main nin salag nin palaway nin ibat sa langit tan sinmiraꞌ ti kona ni Saulo. 4 Naipalukob ya sa lutaꞌ si Saulo ket kaaram main nin busis nin narngeꞌ na a wana, “Saulo, ambaleꞌ a manduksaꞌ-duksaen nako?”
5 Ket wana ni Saulo, “Siꞌno kamo, Ser?” Wanan inumbat nin busis,
“Siꞌko si Jesus nin manduksaꞌ-duksaen mo. 6 Umdeng ka tan mako kadtaw sa syudad. Itaw main liꞌ nin mamaritaꞌ no ani a gawꞌen mo.”
7 Sin sain, saray kalalamoꞌ na ni Saulo, tinumgen sara tan kai sara gapo nin nakatnoy ta main nin mangkarngeꞌ ran mampagꞌirgo baleꞌ kasa nin siꞌnuman nin maꞌkit ra. 8 Inumdeng ya si Saulo tan nimulagat ya baleꞌ kai ya nin makaꞌkit kanyaꞌ nin tinabin rayan nako sa Damasco nin saray kalalamoꞌ na. 9 Sa luob nin tuloy awro ket kai ya nin nakaꞌkit, tan kai ya nin nangan o ninom.
10 Sin sain, main itaw sa Damasco nin tumutumbok kona ni Jesus nin say ngaran na Ananias. Nipaꞌkit ya si Uunuren nin Jesus kona sa sayay baraꞌmon taynep tan wana kona, “Ananias!”
Inumbat ya si Ananias a wana, “Uunuren, ambaleꞌ?”
11 Ket wana nin Uunuren kona, “Mako kadtaw sa dalan a mantawagen nin Matuꞌrir, tan itaw sa bali na ni Judas, tepeten may sayay lalaki nin taga Tarso a say ngaran na Saulo. Sya, marateꞌ man mandumasal. 12 Nipaꞌkit koyna kona sa sayay baraꞌmon taynep a main nin tawon mako kona nin say ngaran na Ananias tan ipababo nay gamet na kona ta pigaw nin makaꞌkit ya anamanaet.”
13 Baleꞌ wanan niꞌbat ni Ananias, “Uunuren, abaw saraynay nakarngean kon maipaꞌkaꞌ konan siin nin tawo tan say panunuksa-duksaꞌ na konran saray tutawo mo itaw sa Jerusalem. 14 Ket sawanin iti ya sa Damasco ta binyan rayan pakayadiꞌ nin saray Pupangulon Pupadiꞌ a dakpen nasara a sarba ran mangrayo komo.”
15 Baleꞌ wana nin Uunuren kona ni Ananias, “Basta mako ka, ta piniliꞌ koya nin ipatandaan nay maipaꞌkaꞌ kongko konran saray amboꞌ nin Judio tan konran saray mampagꞌuray konra, tan konra et anamaet nin saray kapada moyon Israelita. 16 Ket siꞌko, ipatandaan ko kona a sarban matkap nan irangep para sa kakanaan ko.”
17 Anaod, nako yayna si Ananias sa balin kamiꞌnan na ni Saulo. Sinumrep ya tan nipababo nay gamet na kona a wana, “Busat a Saulo, si Uunuren nin Jesus nin nipaꞌkit komo sa dalan sin adap modti, nibakiꞌ nakodti komo ta pigaw nin makaꞌkit ka anamana tan pagꞌurayan naka nin Ispirito nan Dios.” 18 Tampor main nin naragrag nin baraꞌmon siksik nin kunaꞌ nangibwat sa mata na ni Saulo ket nakaꞌkit ya anamanaet. Inumdeng ya tan nipabawtismo ya. 19 Kaaram nangan yayna, ket sinmubliꞌ a gindat nin kasaw na.
Nipatandaꞌ naya ni Saulo a Mabistan Patandaꞌ sa Damasco
Nikiikap ya nin umnoy awro si Saulo konran tumutumbok na ni Jesus itaw sa Damasco. 20 Tampor a nipata-patandaꞌ nayna sa susinaguga ran Judio itaw sa Damasco a si Jesus Anak naya nin Dios.
21 Sarba ran saray nakarngeꞌ kona, nakaꞌngap sara ket wanra, “Amboꞌ ya parayti taw si tawo nin nanuksa-duksaꞌ konran mammemper kona ni Jesus itaw sa Jerusalem? Amboꞌ para a kanyaꞌ nin nako yadti sa Damasco ket ta pigaw nin dakpen nasara a sarba ran mangrayo kona ni Jesus iti tan baruren nasaran awiten konran Pupangulon Pupadiꞌ?”
22 Wanin man, ginumsen anan ginumsen a pangangayat na ni Saulo, ket pinatutuꞌwan na nin maꞌget a si Jesus syan diri a Cristo nin tinudoꞌ nan Dios, kanyaꞌ nin saray Judio nin itaw sa Damasco ket kasa gapo nin maibaritaꞌ ran ipanguntra kona.
23 Sin abaw anay awro nin linmabas a mampangyakay ya sa susinaguga si Saulo, nagꞌiirgo saray pupangulo ran Judio sa Damasco no paꞌno raya nin mapati. 24 Baleꞌ natandaan na ni Saulo a awro tan yabi rayan mansadyaan sa purta nin padil nan syudad ta pigaw nin patyen raya. 25 Ket sayay yabi, saray namper kona ni Jesus banaꞌ kona, nikwa raya sa gagaban si Saulo tan niuyꞌoy raya nin mamaliwaꞌ sa dudungawan sa padil. 9:23-25 \xt 2 Corinto 11:32,33.
Nikikalamoꞌ yayna si Saulo konran Mammemper sa Jerusalem
26 Sin sinmubliꞌ ya sa Jerusalem si Saulo, inapes nay kikalamoꞌ konran tumutumbok na ni Jesus baleꞌ maliꞌmo sara kona ta kai sara nin mamper a tumutumbok nayayna ni Jesus. 27 Baleꞌ tinulungan naya ni Bernabeb. Niꞌras naya konran apostoles tan nibaritaꞌ na konra a nipaꞌkit tan nikiirgo yay Uunuren kona ni Saulo itaw sa dalan nin mamunta sa Damasco. Nibaritaꞌ na et konra a kai ya gapo nin maliꞌmo si Saulo nin nangipatandaꞌ maipaꞌkaꞌ kona ni Jesus itaw sa Damasco. 28 Ket nangibwat ana sin sain, nikikalamoꞌ yayna si Saulo konra tan nayi-nayi ya konra sa Jerusalem. Pinasyan tepel nan nangipatandaꞌ itaw nin maipaꞌkaꞌ kona ni Uunuren a Jesus 29 tan nikidiskusyon ya konran Judio nin makapagꞌirgon saritaꞌ nin Griego. Konan siin niplano rayan patyen. 30 Ket sin natandaan ra in nin mammemper, nikaꞌ raya sa Cesarea miꞌsa raya nin pinaibwat nin mako sa lugar na nin Tarso.
31 Sin sain, matinek a kapapaꞌsar ran lapag nin tutawo nan Dios sa lulugar nin Judea, Galilea tan Samaria. Sa panunulong nan Ispirito nan Dios, ginumsen a pammemper ra tan nituluy-tuloy ray nagkabyay nin mapangunor konan Dios. Inmabaw saraynan inmabaw a mammemper.
Nako ya si Pedro sa Lugar nin Lida tan Joppa
32 Si Pedro anamaet, naku-nako ya sa sarban lugar a main nin mammemper kona ni Jesus. Nako yadtaw anamaet konran tutawo nan Dios sa babali nin Lida. 33 Ket itaw main nin tawon nadumog nan say ngaran na Eneas, a siti si Eneas, waloy taon naynan naidalit sa apay ta paralitiko ya. 34 “Eneas,” wana ni Pedro kona, “si Jesu-Cristo, paandaen nakayna, kanyaꞌ nin mibangon ka tan lulunen ma in si apay mo!” Ket, nibangon yan tampor. 35 Ket abaw saray tutawodtaw sa babalin Lida tan sa lugar nin Saron a namper konan Cristo sin naꞌkit ran napaandaꞌ ya si Eneas.
36 Itaw anamaet sa syudad nin Joppa, main nin babayin tumutumbok kona ni Jesus a say ngaran na Tabitac (sa saritaꞌ nin Griego, say ngaran na ket Dorcas). Siti si Dorcas, ugaliꞌ na a gumwaꞌ nin maabig tan tumulong konran mumaidap. 37 Ket sin sain, nagmasakit ya tan nati ya. Pinaryoꞌ raya tan nipaidaꞌ rayay bangkay na sa kwarto sa taꞌgay nan bali. 38 Adani ana a Joppa sa Lida, ket sin narngeꞌ ran tumutumbok na ni Jesus a itaw ya si Pedro sa Lida, namakiꞌ sara nin rwa ra konra nin dawaten ra kona ni Pedro a no magwaꞌ ket mako yan tampor itaw sa lugar ra. 39 Nayi ya anaod nin tampor konra si Pedro. Sin nakarateꞌ saraynadtaw sa Joppa, niꞌras raya si Pedro sa kwarto sa taꞌgay nin kamiꞌnan nan bangkay na ni Dorcas. Inaribungbungan raya si Pedro nin saray bubbayin balo a manꞌumakis sara tan nipaꞌki-paꞌkit ra kona a uaysing tan kukapa nin ginwaꞌ na ni Dorcas sin mabyay ya et. 40 Pinaliwaꞌ nasara ngaꞌmin sa kwarto ni Pedro, kaaram nanalimukod ya tan dinmasal ya. Sin nayadiꞌ yayna nin dinmasal inadap nayay bangkay tan wana, “Tabita, mibangon ka!” Ket, nimulagat ya si Tabita tan sin naꞌkit naya si Pedro, nibangon ya nin tinmekreꞌ ya. 41 Ginaꞌgetan naya ni Pedro sa gamet tan tinulungan nayan inumdeng. Miꞌsa nasara nin kinayaban a bubbayin balo tan saray raruma et nin tutawo nan Dios, tan niprisinta naya konra si Tabita nin mabyay ya. 42 Say maipaꞌkaꞌ konan sitin nangyadiꞌ ket natanda-tandaan sa intiron Joppa, ket abaw saray nagmatalek kona ni Catawan nin Jesus. 43 Niikap yaynadtaw yapoꞌ sa Joppa si Pedro, a nikipagtuloy ya konan sayan mangangwaꞌ nin bubagay a mangusar yan katat nin ayep a say ngaran na ket Simon.