Ket nangibwat ana konan sitaw nin awro, dinuksa-duksaꞌ saraynadtaw sa Jerusalem a mammemper konan Cristo. Kanyaꞌ nin pwira sara tamoꞌ a apostoles, nitatayak sara a main nin nako sa saka-sakalakon lugar sa prubinsyan Judea tan Samaria. 2 Main baleꞌ nin tutawon matunong a nangitabon kona ni Esteban tan inabet-abetan rayan wanin ana.

3 Siin a Saulo, wanin anay nipanuksa-duksaꞌ na konran mammemper itaw! Sinre-sinrep nay pammali ra tan dinakep-dakep nasara nin kasan pinilian, bubbayi man o lulalaki, miꞌsa nasara nin nipapriso.^a

4 Sin sain edet, saraytaw saray mammemper nin nitatayak nin nako sa nagsikabarang nin lulugar, nipata-patandaꞌ rayay minsahi maipaꞌkaꞌ konan si nibakiꞌ nan Dios. 5 Si saya konra, si Felipe, nako ya sa sayay syudad sa Samaria ta ipatandaꞌ nadtaw a maipaꞌkaꞌ konan si sya a Mesias.^b 6 Nangrengeꞌ saran maong a abaw nin tutawo sa minsahi na ni Felipe sin narngeꞌ rayan mampagꞌirgo tan naimatunan ray ginwa-ginwaꞌ nan pakaꞌkitan nin pakayadiꞌ nan Dios. 7 Abaw saray uispiriton dukaꞌ a manꞌumasisit nin pinalakwan na konran saray nasrepan ra, tan napaandaꞌ nasaray abaw nin paralitiko tan pilay. 8 Kanyaꞌ nin wanin anay ririket ran tutawo konan sitin syudad.

9 Sin sain, main nin mampiikap itaw nin sayay salamangkiro a say ngaran na ket Simon. Anro anay panaon nin mampakaꞌngapen nasaray tutawodtaw sa Samaria yupaꞌ sa gawaꞌ-gawaꞌ na, tan wana ket saya ya kanon amboꞌ tamoꞌ nin urdinaryon tawo. 10 Sarba ran tutawodtaw sa Samaria, ayupaꞌ man o ataꞌgay, nangrengeꞌ saran maong kona ta wanra sya kanoy pakayadiꞌ nan Dios a mantawagen ran Alakin Pakayadiꞌ. 11 Naꞌteng ana nin talagan mampakaꞌngapen nasaran tuloy a tutawo yupaꞌ sa pagmamadyik na kanyaꞌ nin mampangrengeꞌ sara kona. 12 Baleꞌ sin nipata-patandaꞌ naya ni Felipe a Mabistan Patandaꞌ maipaꞌkaꞌ sa pagꞌaadiꞌ nan Dios tan say maipaꞌkaꞌ sa no siꞌno ya si Jesu-Cristo, namper sara anaod ket nipabawtismo sara, bubbayi tan lulalaki. 13 Pati si Simon, namper ya ket nipabawtismo ya, tan nayi yaynan pirmi kona ni Felipe. Nakaꞌngap yan tuloy sa milagro tan pakaꞌkitan nin pakayadiꞌ nan Dios nin ginwa-ginwaꞌ na ni Felipe.

14 Natandaan ran saray apostoles nin itaw sa Jerusalem a namper saray tutawo sa Samaria sa sain nin minsahi nan Dios kanyaꞌ nin nibakiꞌ rasaradtaw si Pedro tan si Juan. 15 Sin rinmateꞌ saradtaw si Pedro tan si Juan, nidasalan rasara a mammemper nin Samaritano a mako ya kumon nin miikap konra a Ispirito nan Dios, 16 ta sin sain ket nabawtismwan sara tamoꞌ et sa ngaran na ni Uunuren tamon Jesus tan kai ya et nin mampiikap konra a Ispirito nan Dios. 17 Nipababo ra ni Pedro tan ni Juan a gamet ra konran mammemper ket nako yayna nin miikap konra a Ispirito nan Dios.

18 Naimatunan na ni Simon a nako ya nin miikap konran mammemper a Ispirito nan Dios banaꞌ sa nipangipababo ran gamet ran apostoles konra. Inuprisiwan nasaran kwarta si Pedro tan si Juan, 19 a wana, “Byan rako pa anamaet nin wanin nin pakayadiꞌ ta pigaw nin si siꞌnuman a pangipababwan ko nin gamet ko ket mako ya nin miikap kona a Ispirito nan Dios.”

20 Ket niꞌbat na ni Pedro kona, “Mako ka sa impyirno nin kalamoꞌ moy kwarta mo, banaꞌ sa sain nin pangngipaꞌkaꞌ mo a mabayadan a pakayadiꞌ nan Dios! 21 Kai ka nin makakibiang sa sayti say manꞌipagwaꞌ komi banaꞌ ta tandaꞌ nan Dios a say iti sa kanakman mo ket amboꞌ nin kusto. 22 Pagbabawian mo in nin dukaꞌ a mampanggepen mo tan kidawat ka nin pirduna konan Dios ta awaꞌ a lamang nin pirdunawen naka sa sain nin dukaꞌ a kaisipan mo. 23 Wanin ta maꞌkit ko a napnoꞌ ka nin imbel tan baraꞌmo ka nin priso ta kai kayna nin makaruꞌkang sa kadukaan mo.”

24 Ket wana ni Simon konra ni Pedro tan Juan, “Ipasingaꞌdo rako pa konan Catawan ta pigaw nin sain say nibaritaꞌ moyo ket kai nin mangyadiꞌ kongko.”

25 Sin nayadiꞌ rayna nin nibari-baritaꞌ a minsahi nin nangibwat konan Catawan tan nipapalaway ray tandaꞌ ra maipaꞌkaꞌ kona ni Jesus, sinmubliꞌ sarayna si Pedro tan si Juan sa Jerusalem. Ket sa lulugar a nalabas-labasan ra sa Samaria, nipata-patandaꞌ raya et a Mabistan Patandaꞌ.

26 Sawanin, main nin anghil nan Dios a pinaꞌkit kona ni Felipe tan wana kona, “Mibwat ka nin makodtaw sa bandan bagatanan^c sa dalan sa lugar a amboꞌ nin matawo nin palusong nin mako sa Gaza a mangibwat sa Jerusalem.” 27 Nibwat ya anaod nin nako si Felipe, ket itaw naꞌkit nayay sayay sangkataꞌgayan nin upisyal sa Etiopia; siti ket kapon^d ya. Siti a ingkargado sa sarban kayamanan nan Candace a syay rina sa Etiopia. Nako yadtaw sa Jerusalem nin nangrayo konan Dios. 28 Ket, sin sain, mansumubliꞌ yayna sa Etiopia a nakaruran ya sa karwahi na nin mambasawen nayay libron nisurat na ni Prupita Isaias. 29 Nibaritaꞌ nan Ispirito nan Dios kona ni Felipe a ampadan nayay karwahi. 30 Anaod nangred yan kinmadani si Felipe ket narngeꞌ nan mambasawen nayan upisyal a libro nin nisurat na ni Prupita Isaias. Nitepet na ni Felipe, “Mataros moyo para a pipaꞌkaan nin sain say mambasawen moyo?”

31 Niꞌbat na nin upisyal, “Paꞌno ko nin mataros ey no kasa nin mangipapalaway kongko?” Ket sinagyat nayan rumuran si Felipe. 32 Si parti nin Masanton Kasuratan a mambasawen na ket wanti a wana,

34 Wana nin upisyal kona ni Felipe, “Siꞌno yaytin tawo si manꞌibaritaꞌ nan sitin prupita? Sya para o raruman tawo?” 35 Sin sain, nitaranaꞌ na konan siin si binasa nan upisyal, nipapalaway naya ni Felipe kona a Mabistan Patandaꞌ maipaꞌkaꞌ kona ni Jesus.

36-37 Nituluy-tuloy ray pagbibyahi ra ket nirateꞌ sara sa lugar a main nin ranom. Wanan upisyal kona ni Felipe, “Ya, yuoy a ranom! Main kasin rason a kai ako et nin mabawtismwan?”^f 38 Sin sain, nipapatgen nayan upisyal a karwahi tan nako sara sa kamiꞌnan nin ranom ket binawtismwan naya ni Felipe. 39 Sin manꞌumarwas sarayna sa ranom, niꞌras nayaynan tampor nin Ispirito nin mangibwat konan Uunuren si Felipe ket kai nayayna nin naꞌkit nin upisyal. Nituloy nayna a sinmubliꞌ sa lugar na a pinasyan ririket na.

40 Naaraman na tana ni Felipe a itaw ya sa lugar nin Azoto. Nangibwat itaw, nipata-patandaꞌ nayay Mabistan Patandaꞌ maipaꞌkaꞌ kona ni Jesus sa bubabali nin linabasan na angga sin nirateꞌ ya sa Cesarea.