2 Jabaon koshi itira, kimisha joni jato xewina koshi imaa iki, ja joni koshibaon jakonhakin tee akanon ixon jato koirantira jato imaa iki, ja apo jawe jakonmabi itima kopí. Ja joni koshibo koiranti koshi ikára Danielribi iká iki,

3 ja jato xewina koshi ikábo bebonbires onan, itan ja main jato ikinnai koshi ikábo bebonbires onan Daniel ikára, basiamabires onantibires iká iki.

4 Tee koirannai joni koshibaon itan jato ikinnai joni koshibaonra, jakonmaakin apo tee axonai ixon jan jakonmanin yointira benakana iki, ikaxbira Daniel ikon jakon joni iketian, jan jakonmanin yointi jawe jakonmabi nokoyamakana iki; jaskara iketianra jawe jakonmabi ayamaitian, jakonmara ikai ikax keshati atipanyamakana iki.

5 Jaskara ikenbira, jaskáaxon jakonmaati shinanboreskana iki, jaskatira yoyo ikana iki: “Danielnin jakonma akaitian keshanoxon benakinbira non nokotima iki, jawen Diossen esé senenhainko axonpariresa non jakonmain paketi iki”, ikibo.

6 Jaskáxonra, tee koirana joni koshibaon itan jato ikinnai joni koshibaon, apo Dario betan yoyo iki kanoxon jatíxonbi senenbires shinankana iki, jatian moa já bebon ixonra yoikana iki: —¡Mia jatíbitian jabánon!

7 Nato mainmea jato ikinnai joni koshibora jainbicho tsinkike, jainxonra shinankanke ja senenhati esé pikoxon apon jato ninkámati, jara neskara iki, kimisha chonka nete kaman tsonbi wetsa diosbi, itan tsoa jonibi oracion meran yokátima, jaskáyamakinra miabichores akanti iki. Jawerato joninki yoitimakin senenhayamai, jara leónbaon kininko potakanti iki.

8 Jaskara iketian, min ja esé onantiakin yoiwe, moa wetsa keskaatima inon ixon min jane wishawe, medobo betan persabaon eséra jaskara iketian, tsonbi keyóti yamake —akin akana iki.

9 Jaskáakanara, apo Darionin jain esé iká kirikain jawen jane wishaa iki.

10 Jatian ja senenhati esé akana onanaxa, Daniel jawen xobonko kaa iki, kaaxa Jerusalénhori iká ventana kepentaanan, oranhanan Dios rabii chirankoota iki. Netetiibira kimishaakin jaskara aká iki, jatíbitian jaskaai axea ixon.

11 Jatianra ja jonibo jatikaxbi Danielnin xobo meran jikixon, oranhanan jawen Dios rabiaitian nokokana iki.

12 Jatianbira ja senenhati esekan yoia apo yoii bokana iki, jatianra yoikana iki: —Minra ja senenhati esé jatíxonbi ninkati pikoa iki, jainra yoiai, jaweratobaonki ja kimisha chonka nete kaman miabicho atitianbi, wetsa dios iamax wetsa joni oranai, jara leónbaon kini meran potakanti iki, ¿Jaki ikonma iki? Jaskara riki ikira iká iki. Jaskara iketianra ja koshi joi senenti jake, medobo betan persabaon esé jaskara iketianra, jara tsonbi soati yamake —akinbo.

13 Jatianra ja jonibaon yoiboresa iki: —Jaskara ikenbira Daniel, ja yatanxon bekana Judá jonin jawekeskáaxonbi mia ikonhayamai, ja koshi eséribira ikonhayamai, netetiibi kimishakin oranaira moa non oinke —akin.

14 Jaskara ninkaxonra apon kikinbiresakin masá shinankin, Daniel jaskáaxon xabakaamati benaa iki. Bari jikiai kamanra jaskáaxon xabakaamati benaa iki,

15 ikaxbira ja jonibo apoiba boribakana iki, jatianra yoikana iki: —Minbira kikinhakin onanke, medobo betan persabaon yoiai, ja atima yoiabo iamax koshi esé axon ja apon jawen jane jain aketian moa jawekeskaaxonbi tsonbi soatima —akinbo.

16 Jatianra Daniel bexon moa leónbaon kini meran potati apon jato yoia iki. Jaskáaxonbira akanamatian Daniel apon yoia iki: —¡Ja min Dios, ja rabikin min akonkin senenhaitonin, mia xabaabanon! —akin.

17 Daniel kini meran akátianbira, makan bexon ja kini xepikoti xepokana iki, jatianra apon jawen meosotinko iká jawen janenbi sellana iki, ja apo akinnai jawen ani joni koshibaonribira, jaton meosotinkonia jaton janenbi sellankana iki, ja esekan jaskara ati yoia iketian Daniel axon akonkin senenhaka kopíra akana iki.

18 Japekáora jawen ani xobon apo kaa iki, jatianra jawékiamabi oxai rakata iki, jan raroti apachoaibora moa ayama iki; jainoaxibira, ja yamé oxati atipanyamaa iki.

19 Moaribi nete xabaketianra, wenitax leónbaon kininko ishto kaa iki.

20 Moa ochóma ixonra onis join Daniel kenai apo, neskata iki: —Daniel, jiria Diossen yonoti, ¿Akia atipankin min Diossen, ja rabikin min akonkin senenhatonin, leónbaon ati ikenbi mia xabáakin? —iki.

21 Jatianra Danielnin yoia iki: —¡Mia jatíbitian jabanon!

22 Nokon Diossenra jawen ángel raanke, janra leónbaon kexa xepoke, jawe jakonmabi ea ayamakanon ixon, Diossenra onanke en jakonma akáma, jainxonra miki ramíkin jawe jakonmabi en akáma iki —iki.

23 Jaskáketianra ikonbiresi apo raroa iki, jaskáxonra ja kininkonia Daniel pikokanon ixon jato yoia iki. Pikóxon oinkanara jawe xatéomabi iká iki, Dioski ikoni koshiax chipota kopíra jaskara iká iki.

24 Jaskara iká pekáora, apon jaskara jato ati yoia, ja jonibaon Danielnin jakonma aká yoia jonibo bekana iki, jaskáaxonra jaton awinbo betan jaton bakeboyabi ja leónbaon kininko jato potakana iki; jatianra ja kini chichó nokókanamatianbi leónbo jatoki choronbeiranxon jato beshéakana iki.

25 Jatianra apo Darionin maibotiibi iká jonibo, jainoax nato mainmea meskó joiabo kirika wishaxon bomakin neskara jato yoia iki: “Eara keenai mato jakonbires itin, itan mato jawékinin bebontinin,

26 jainxonra jaskara akanti yoixon ja senenhakanti en yoiai, ea apo iká mainmea jonibaonra jatíxonbi ja Danielnin Dios yoiti ixonkanti iki, jainxonra já rabikanti iki.

28 Jaskataxa Daniel apon joni koshi ikí bebonkaresa iki, ja Dario apo inontian, jainoax ja Perciainoa apo, Ciroribi apo inontian.