2 Ja Babiloniobaon jatoaresxon ja apo Joaquín yatanxon bokana pekáora, moa pichika baritia itan pichika oxe iká iki,

3 Eara sacerdote Ezequiel iki. Nokon papan janera Buzi iki. Jatianra jaskara imanoxon jawen mekenman Ibon ea tii aka iki.

4 Jatianra norteokeax, niweaba beaitian enbi oinna iki; ani nai koin meranoaxa, chii kaná keskabo pikota iki, itan jan kateara ikonbires pené iká iki. Ja chii meranoaxa, yami jawéki charáa keská peneta iki,

5 ja napónshamanra joni keska chosko iká iki.

6 Ja westíorabora chosko bemananya itan chosko peiabo iká iki;

7 jaton witax pontéshamanbo itan waka baken tae keska mentsisyabora iká iki; akonbireskin bronce charaa keskatira penéta iki.

8 Jainoaxibira ja chosko pishpachiori, jaton pei naman, mekenbo iká iki.

9 Ja westíorabaon pei rebobora wetsanaki mepiabo iká iki. Ja boira tsoabi wetsaori kayamai, bebonkirires bokana iki.

10 Ja chosko bemananin jisára neskara iká iki: ja bechiakiri joni bemananya; mekayao león bemananya; mexkao wakan bemananya; jainoax pekáori ani teté bemananya iká iki.

11 Ja peibora bochikiriti peatabo iká iki. Ja rabé pei bianananax, wetsa rabé pein ja yorabo rakoa iká iki.

12 Jatikaxbira bebonkirires boi wetsaoribi boyamakana iki. Ja Diossen koshín jain jato boaihorira bokana iki.

13 Nato joni keska koshiai jawékibora, tsiste ketea keskábo itan joé chankankana keskábo iká iki, jabora ja meran ori boax, itan neri beax ikana iki; tirí penébires iketianra, jainoax kanábo pikota iki.

14 Ja joni keska koshiai jawékibora kaná ikai keskati, ishtonbires ori boax itan neri beax ikana iki.

15 Ja joni keska koshiai jawékibo oinxon en mai oinnara, ja toró taranmetai westíorabo jato patax iká iki.

16 Ja chosko toró taranmetaibora jatiobires akin akana keskábo iká iki, topacio makan keskatira peneta iki. Ja toró taranmetai meranra, wetsa toró tarameetairibi jaa iki.

17 Ja chosko katiorira, wetsaori boyamai bebonkiri bokana iki.

18 En oinnara ja chosko toró taranmetaibo, jan koshia nakatayabobires ikax, itan icha bero keskaraton tenaaton katea iká iki.

19 Ja joni keska koshiai jawékibo boaitianra, ja toro taranmetaiboribi jato betan kaa iki; jatianra ja joni keska koshiai jawékibo mainmeax wenikanaitian, ja toró taranmetaiboribi wenita iki.

20 Ja Diossen koshín jato boaihorires, ja joni keska koshiai jawékibo boaitianra, ja toró taranmetaibo jato betanbi bokana iki, jaskara ikenra ja joni keska koshiai jawékikibi tekita ikax ja toró taranmetaiboribi jiria iká iki.

21 Ja joni keska koshiai jawékibo koshiaitianra, ja toró taranmetaiboribi koshia iki; jawetianki tsasikanai jatianra jaboribi tsasia iki; jawetianki mainmeax keyákanai, jatianra ja toró taranmetaiboribi keyata iki. Ja toró taranmetaibora ja ikanai keskáribia iki, ja joni keska koshiai jawékibokibi tekitabo ikaxa, koshiaiboribi ikana iki.

22 Ja joni keska koshiai jawékibaon mapo manaonra westíora xabá ratétibires, chichóbi jishti penébires en oinna iki.

23 Ja xabá namanra, ja joni keska koshiai jawékibaon peibo pontéshamani peatax bianananabo ikax, ja rabé pein westíoraxonbo, jaton yora rakoabo iká iki.

24 Jainxonra ja peibo boi titi ikairibi en ninkata iki, westíora paro jenetiax riri ikai keská, jatíbi atipana Ibo yoyo ikai keská, itan sontárobo tsinkitax riri ikai keskára iká iki. Jatian moa tsasixonra, jaton peibo namánhakana iki.

25 Ja jaton mapo manaon iká xabá masenenra, riri ika iki, itan tsasiaitiibira jaton peí namánhakana iki.

26 Ja xabá mananhora, westíora ani yakati zafiro makan akana keská en oinna iki, ja yakátininra westíora joni jisá yakata en oinna iki.

27 Jawen cintora keská ikainoax bochikira, yami charáa axon akonbireskin penéakana keská, chiikanbires katea en oinna iki, itan namanra ponté chiikeskares en oinna iki. Penekanbires kateara iká iki,

28 westíora nete, oi beaitian nai koinhain Diossen koshkí, pikota keskára iká iki. Jaskáxonra jatíbi jawen kikin pené koshi Ibon ea oinmaa iki. Ja oinnaxa ea mainbi bekepinon kaman beota iki.