2 Ibon oinresara Nabucodonosornin Joacim yataxon, icha jawékiribi ja Diossen xobonkonia bia iki. Nabucodonosorninra yatanxon Babiloniain jato boá iki, jatianra ja iresama jawéki boabo, jawen diossen xobonko jakon jawékibo ikain aká iki;

3 jainxonribira, ja apon xobonko teetai joni koshibaon koshi Aspenaz, neskara ati yoia iki, israelitabo xaranmea ja apon rarebobo, itan kikin jonibaon rarebobo boxonti,

4 jaton yoranko jawe jakonmabi néomabo, metsábo, jakon axéyabo, onan shinanyabo, jawéki ati onanbo, itan ja apon xobónko teeti atipana bake ranonbo. Jabora Babiloniabaon join yoyo iti, itan wishati onanmakanti iká iki.

5 Ja Nabucodonosornin akairibi netetiibi ja bake ranonbo pimakanti, jainxon jan akai vinoribi jato xeamakanti, itan kimisha baritia senen jato axeakantira jato yoia iki, ja onankin senenhaxpari apon yonoti iti ikana iki.

6 Ja bake ranonbo xaranra iká iki Daniel, Ananías, Misael jainoax Azarías, jabora Judá jonibo ikana iki,

7 ja apon xobonko teetai joni koshinra wetsa jane jato menia iki: Daniel janea iki Beltsasar akin, Ananías, Sadrac akin; Misael, Misac akin; Azarías, Abed-nego akin.

8 Danielnin shinana iki ochanaketian apon akairibi pitima jainxon jan akai uva xeatiribi xeatima, jaskákinra ja apon xobonko teetai joni koshi yokata iki, ochanaketian ja apon akairibi jawékiamakaskin jato teatima,

9 Diossenbi amaara ja apon xobonko teetai joni koshín Daniel oinna jakon iká iki,

10 ikaxbira yoia iki: —Nokon ibo apokira ea raketai. Jaskara maton piti itan jaskara maton xeatira jan ea yoia iki, jatianra jatíribi ranonbo keskáma maton bemanan pasná iketian, mato kopí apon ea reteti iki —akin.

11 Ja Daniel, Ananías, Misael jainoax Azarías koiranti koshi imaa joni, apon xobonko teetai joni koshi betanra, Daniel yoyo ika iki, jatianra yoia iki:

12 —Enra mia yokatai nato noa min yonotibo oinnoxon min noa tanati: jato yoiwe chonka nete kaman verdurabires pimaxon, onpaxbichoribi noa xeamakanon ixon.

13 Jatí nete winota pekáora, ja apon akairibi piai bake ranonbaon bemanan betan non bemanan min ointi iki, ja min oinna keskára min nobetan ati iki —akin.

14 Jan jato koirannai joni koshín shinanra, jaton shinan keskaribi iká iki, jaskara ixonra chonka nete kaman jato tanaa iki.

15 Chonka nete winota pekáora, ja apon akairibi piai bake ranonbo xewina jaton yora kikin jakon iketian, bebonbires koshibo ikana iki.

16 Jatianra, jato koirannai joni koshin jaton piti betan jaton uva xeati jan bixon, verdurabichores jato pimaa iki.

17 Jaskáaxon ishton onanti shinan, itan jatíbi meskó kirika wishábo ninkati onan shinan, jainoax jawékinin axeti onan shinan, ja chosko bake ranon Diossen jato menia iki. Namá keská meranxon oinkanabo, itan ja namákanabo jaskara yoii iká riki ixon yoiti onanribira Daniel iká iki.

18 Jatio basi ikax já bebon kati apon yoia senenketianra, ja apon xobonko teetai jato koirannai joni koshin ja bake ranonbo já bebon jato boa iki.

19 Apora jato betan yoyo ika iki, ikaxbira, Daniel, Ananías, Misael jainoax Azarías keská, jatíbi ja bake ranonbo xaranmea westíorabi nokoyamaa iki, jaskara ikaxa apon yonoti jikiax jain banékana iki.

20 Jatíbi jawéki onan ixon, itan shinanya ixon yoiti apon jato yokatara, jawen mainmea onanyabo itan shinanman onanmisbo, chonkaakin bebonbires jato xewina jaskáaxon jakonhakin ati onanbo ikana iki.

21 Jatian moa Ciro apo iká reken baritia iketianra, Daniel Babiloniainbi baneta iki.