OSEAS
Israel jonibaon jakonma akai jato oinmaa, itan jakonma jenekanon ixon Oseasnin jato yoia
1
Nato joira Ibon Beeríkan bake Oseas yoia iki, jatianra Uzías, Jotam, Acaz, jainoax Ezequías jabo Judáin apobo ikana iki, jatianra Joássen bake Jeroboam Israelhain apo iká iki.Oseasnin awin itan jawen bakebo
2 Neskáxonra ja yoikasai joi Oseas meranxon Ibon yoikin peoa iki: “Israel mainmea jonibora ea jenebainax tsinikanke. Jaskáribiakin minribi min awinhanon tsini ainbo bitanwe, jaskáaxon jabé bakeawe; jatianra jabo tsini ainbaon bakebo iti iki”, akin.
3 Oseasninra, Diblaimman bake ainbo Gomer, awinhakin biá moa tooxon westíora benbo bakea iki.
4 Jatianra Ibon Oseas yoia iki: “Ja bake Jezreel akin janewe, Jezreelhainoax ichabires eséki ramita iketian, nenoax basimara apo Jehúkan chiní bakebo en jato masá tenemati iki, jaskara ikenra Israelbo en moa apooma imati iki.
5 Ja netera Jezreel teshanpainxon, jan Israel koshia sontárobo en jato keyoti iki”, akin.
6 Jatianra Gomer tooribixon, westíora ainbo bakea iki. Ibonra Oseas yoia iki: “Ja bake ainbo Lo-ruhama akin janewe, Israel apon ikinna jonibora jakiribi moa en jato noibatima iki. Enra jaton jakonmabo shinanxonresti iki.
7 Ikaxbi, Judá apon ikinabobiribira en jato noibati iki: ea jaton Ibo Diossenra, jato jamati iki. Ikaxbi reteananxonmabira en jato jamati iki, kanótiomaxonbi, espadaomaxonbi, kabayomaxonbi, jainoax kabayobaon boai joniboomaxonbi”, akin.
8 Ja Lo-ruhamanin xoma akin jenea pekáora, Gomer jakiribi tooxon, benbo bakearibaa iki.
9 Jatianra Ibon Oseas yoia iki: “Lo-amí akin ja bake janewe, matora moa nokon jonimabo iki, eara moa maton Diosmaribi iki”, akin.
Israel jonibo jakiribi jakonna
10 Wetsa netebaonra israelitabo,
aniparonkonia mashi keska
icha iti iki.
Jain senena, itan jati icha riki ixon tsonbi toponkin
senenhatimara iti iki.
“Matora moa nokon jonima iki”
Akin Diossen jato atitianbira:
“Matora jiria Diossen bakebo iki”, akin mato ati iki.
11 Jatianra Judá, itan Israel jonibo tsinkiti iki, jaskáaxonra westíora joni koshibicho janekanti iki, jatianra jatíbiainoax Jerusalénhain jakiribi bokanti iki. ¡Jezreelnin netera kikin jakonshaman iti iki!