2
Jatianra maton wetsabo, maton jato yoiti iki:“Ja Diossen jonibo”, akin.
Jainoax maton poibo:
“Ja onitsapitabo”, akin.
Israel jonibo senema iká
2 Ibonra yoiai:
“¡Maton tita jakonmanin yoinkanwe,
jara moa nokon awinma iketian,
ea moa jawen benemaribi iki!
¡Moa tsinii jenébanon!
¡Moa jaon keenaibo amakin jenebanon!
3 Jenéyamaitianra, chopa jopémaxon:
ja pikota neten iní keská en imati iki,
jain jawebi xoxoyamai mai keská, itan
mai manxan keskára iti iki,
jainxonra en nomi retemati iki.
4 Jawen bakebora en noibatima iki,
tsinixon akábo iketian.
5 Jaton titara tsinia iki;
moa rabín keyotaxa, neskati yoyo ika iki:
‘Eon keenaibo benaira ea kati iki,
nokon piti itan nokon onpax, nokon lanan, jainoax,
nokon lino,
nokon xeni itan ea xeati meniaibo benai’.
6 Jaskara iketianra jawen bai moxán xepoxon,
en katemakin chikéti iki,
jawen baibo nokoyamanon ixon.
7 Jaon keenaibo chibani
kaxonbira jato nokotima iki;
jatora benati iki, ixonbira jato nokotima iki.
Jatianra iti iki:
‘Nokon reken benera en jakiribi biai,
já betan ikaxa rama ea iitai bebonbires ea jakon iti iki’.
8 Ikaxbira en meniaibo jan onankashamaa iki,
ja trigo, uva xeati itan xeni;
jawen ja rabiti jawékibo anon ixon jan plata, itan oro kaimaxonaira ea iká iki;
9 Jaskara iketianra, nokon trigo, nokon uva xeati, ja tsekatitian
en biribati iki,
jainxonra nokon lana, nokon lino en biribati iki,
jan mato rapoti en mato menia.
10 Jaon keenaibaon oinnonra jishtibires itiakin,
en chopaoma imati iki.
¡Nokon mekenmameara tsonbi ea bichintima iki!
11 Jawen raroti fiestabo, jainoax ja oxe bená iketian akaibo,
jawen tantiti netebo,
jainoax jatíbi jawen meskó fiesta akaibora, en keyoti iki.
12 Jawen uva waibo betanbi jawen higo waibora en keyoti iki.
‘Nato riki ja eon keenaibaon ea jan kopíakin menikana ikira ipachoai’.
Jabora manish bonko en banémati iki,
jatianra inaatima yoinabaon piti iki.
13 Eon shinanbenotaanan, ja rabiti aká jawéki ininti meni iita iketian, jainoax jaon
keenaibo chibani kanox, meosotibo betan teotinin raoti íita iketianra,
ja ainbo en masá tenemati iki.
Ea Ibo ixonra, onantiakin en yoiai.
Ibo Diossen jawen joni Israelbo noia
14 Jaon keenkinra, eon keentiakin en yoyo ati iki:
jain jawebi xoxoyamai mainko boxonra,
jawen jointianixbi eon kenni shinanmeetiakin en yoyo ati iki.
15 Japekáora jawen uva waibo jakiribi en meniti iki,
jatian ja Acor mai teshanpara, ja ainbo jan jakonhai nokótinin manáti en imati iki.
Jainxonra Egiptonkoniax pikotai neten, itan ja bakeranontian ikátiai keskáribiakin, ea ixonti iki.
16 Jatianra ‘Mia riki nokon Baal akin atitianbi’
‘Nokon bené akin ea ati iki’.
Ea, Ibo ixonra onantiakin yoiai.
17 Jatianra jawen kexainoa Baalbaon janebo
en moa bichina,
moa jawetianbi, janewetsatima iki.
18 Ja netebora, Israelbo akinti kopí,
jaskara senenhabekonti joi en ati iki,
inaatima yoinabo jaweatima, noyai yoinabo jaweatima,
jainoax ronobo jaweatima; nokon jonibo jakonshaman tantinon ixonra, en imaa,
kanóti, espada itan reteanantibo moa yamati iki.
19 Israel, miara jatíbitian nokon awin ikax,
esekan yoiai keská nokon awinkonshaman mia iti iki,
akonbireskin en mia noia kopí.
20 Enra, mia awinhaxon,
mia yosmahayamakin en senenhati iki,
jatianra nokon Ibo riki ixon, min ea onanti iki.
21 Ea, Ibo ixonra onantiakin en yoiai:
Ja nete nokóketianra en nai yoia,
naikan maiki oi bemaketian,
22 main trigo xoxoti iki,
uva xeati itan xenira jati iki,
jatianra Israel icha jawékiatia iti iki.
23 Nokonabiribi itiakinra, nokon
jonibo jain iti en jato mai meniti iki;
Lo-ruhamaara en noibati iki,
jatianra Lo-amí en yoiti iki:
‘Matora nokon joni iki’, akin, jatianra jan ea ati iki:
‘¡Miara nokon Dios iki!’ ” akin.