Oseas itan beneyanixbi teakaatai ainbo
3
Jatianra ea Ibon jakiribi yoia iki:“Ja mibé raenanaiton noia,
beneyanixbi teakaatai ainbo, jakiribi bixon min awin noiwe.
Jaskáribiakinra israelitabo Ibon noike,
jabaon wetsa diosbo noikankenbi,
jainxon uva choshia bata panhaxon menikana pikanainbi”, akin.
2 Jatianra nokona iti westíora ainbo en biá iki,
chonka pichika plata koríki,
itan kimisha pacha kimisha chonka litro cebada kopía.
3 Enra yoia iki: “Basibires inonbira mia nokona iti iki;
tsiniax min yorán maroyamawe, wetsa jonibi teamayamawe,
itan enribira akonkin senenhati iki”, akin.
4 Basibiresa israelitabo,
apoomabi itan joni koshiomabi ikanti iki,
Dios jawéki menitioma itan ja menoti yoinaomabobi ikanti iki,
jaskara ati Dios keenai jan onanti iresama makanhomabira ikanti iki; itan
sacerdote ixon saweti tariomabobi, jainxon
jan jaton xobo koirana ja rabiti aká jawékiomabira ikanti iki.
5 Nato jaskara winota pekáora israelitabo shinanmeekanti iki,
jaskáxonra jaton Ibo Dios benakanti iki,
jainxonra jaton apo Davidkan aní
keskáakin Ibo benakanti iki.
Jaskara iti senenketianra,
akonkin Ibo benai yoiti ikanti iki, jainxonra Ibon jakon meniaibo bikanti iki.