Ibon Israel join aka
4
Ibon yoiai,ninkakanwe israelitabó.
Jara nato main jaa jonibo betan join ikai,
nenora moa ikonshaman jonibo yamake,
senenhayamabobirakanai, non Ibora jaskara iki ixon
jaskáaxon onanti shinanbobira jatona yamake.
2 Ikonma ikenbi jansoi ikon riki iki ikaibo, itan jansoaibo,
jato retemaibo itan yometsoaibo,
wanoyanixbi itan benoyanixbi teananaibo, jainoax jakonmamisaibo,
jainoax chibamai retemisaibo, jatíbi jaskarabora kaike.
3 Jakopíra ja main jaa jonibo ikonbiresi onis meran ikanai;
jaskatira jain jaabo moa koshioma ikanai;
inaatima itan noyai yoinabo betanbi aniparonkonia yapabora mawatai.
Jakonma akábo Sacerdotebo Ibon yoixona
4 Neskárai Ibo:
“¡Tsonbira wetsabo jakonmanin yoinxon notsintima iki!
Sacerdotebó, matobichobiribira en join akai.
5 Yamé itan netenra mato ochan paketi iki, jainxonribira
profetabo maton ochamaketian,
en mato keyoti iki.
6 Nokon jonibora onan shinanhoma ikax keyokana iki,
jakopíra mawákana iki.
Jatian mia, sacerdotera,
jato jaskáaxon onanmati shinanman mia keenyamaa iki,
sacerdotenin teeainra en moa mia imayamai.
Ea min Diossen esekan, jaskati mia shinanbenoresaitianra,
min chiní bakebaon ea shinanbenoti iki.
7 Sacerdotebo kaiketianra, bebonbires eki ochakana iki;
jaskara ikenra rabititianbi, en mato rabinmai.
8 Nokon jonibaon jaton ocha soanon ixon, kopíaitonin piira mato jake;
jaskara ikenra nokon jonibo ochatinin mato keenai.
9 Ja jonibo akai keskáribiakinra,
sacerdotebo jaton jakonma aká kopí, en jato masá tenemati iki.
10 Nokon tee axonkin jenexon piaxbira,
mato pikás tantitima iki;
itan yorankinbira maton bakeatima iki.
Israelnin jawéki diosbo rabia
11 Ja yoranti itan
paentininra jakon shinan keyoai.
12 Nokon jonibaonra, jatonbi jiwi ja rabiti akábo, jawéki onannoxon yokatai;
jiwi xateshokobobi yokáxonra rama iti jawékibo onankanai.
Yoranti shinanman jato iboara nokon jonibo,
jaton shinan wetsaorita ikanai:
jaton Dios jenetaananra yorantires shinankanai.
13 Ja manan keyábo ikainxon itan mai matobo maxkatenxonra,
incienso ininti menoxon, itan ja menoxonti jawékibo menikanai,
jainxonribira roble, álamo, itan encina jiwibo
jakonshaman ota namánxonboribi jaskarabo akanai.
Jaskara kopíra maton bake ainbobo tsiniax yorán maroaibo jikikana iki,
itan maton baban ewabo beneyanixbi teakakanai.
14 Ikaxbira ja maton bake ainbobaon, icha jonibo teamainbi en jato masá tenemayamai,
maton baban ewabobira beneyanixbi tsiniax teakaatainbi, en masá tenemayamai,
matoribira ja tsini ainbobo betan ikai;
ja wetsa diosbo rabikin yoranai ainbobo betanra,
jawéki menii mato tsinkitai,
¡Jaskáaxon jawéki ati onan shinan maxkata jonibora jaskaraton keyotai!
15 Israel mia, tsiniax teamisaibi,
Judátanibires ochayamabanon.
¡Mato Gilgalhain boyamakanwe,
Bet-avénhainbi mapéyamakanwe,
Ibonbira onanke ikibobi iamakanwe!
16 Israel jonibora yoitimabo iki,
westíora waka awin siná keskára ikanai;
jaskara iketianki, ¿Jakon metsáshaman pastonkonia
carnero bakebo akai keskáakin mato Ibon koiranti iki?
17 Mato israelitabora, jatonbi aká diosbaon keeni kikinni meketa iki.
¡Jaskara iketian areskanwe!
18 ¡Moa paenxon tsini ainbo akira jeneyamakanai!
Jaskákinra, jakon atin keenyamakin, jan rabinti jakonmares akanai.
19 ¡Ja ikonma dios rabiaibora rabinkanti iki, jaskataxa moa janbiskanti iki!