5
Sacerdotebaon neskara ninkakanwe;jainxon Israel jonibaon akonkin ninkakanwe;
mato ja apon xobon ikábaonribi ninkakanwe:
Maton jakonma akábo yoixonra en mato masá tenemati iki,
Mizpá jema ikainra mato iká iki westiora jan jato paketi trampa keská,
itan Tabor mananman jan jato yatanti ani rika peanakana,
2 Sitim mai teshanpain iká, pozo kikínbires nemin keskára mato iká iki.
Jaskara iketianra en mato masá tenemati iki.
3 Israelitabo jaskati jaara en onanke;
Israel jonibora en onanabo iki.
Israelitabora moa tsini banékanke,
Israel jonibora moa jato jakonmanin tsaike”.
4 Jaton jakonma aká kopíra ja jonibo,
Diossiba nokoti atipanyamake.
Tsinin jato iboara moa Ibo
onanyamareskanai.
5 Ja Israelbo rabitara jatonbinix jan jakonmanin yoinmeeti iki;
Ja israelitabora jaton jakonmaninbi paketaibo iki,
¡Jatianra, Judáribi jato betanbi paketai!
6 Jaton carneroboyabi itan jaton wakaboyabira,
Ibo benai bokanti iki,
ixonbira moa jato potabaina iketian,
moa nokokantima iki.
7 Ibo betanbicho iamakana kopíra,
jaton bakebo wetsa papayabo iki.
Jaskati yoitimakana iketianra, westíora oxebi min waibo moa keyóti iki.
Israel jonibo itan Judá jonibaon masá teneti
8 ¡Ja reteanankin ati machan Gabaainxon xoon akanwe,
jainxon Ramáinxon trompeta xoon akanwe!
¡Bet-avénhainxon onsá ikai onantiakin keshankin xoon akanwe!
¡Benjamín jonibo saki imakanwe!
9 Israel jonibo jatobires tsamá ikanabora en jato yoiai,
jaskara winoti bokanaibora ikonshaman iki ixon:
Israelitabo en jato masá tenemai netera,
jatíbi en jato ras akanaana jakonma iti iki.
10 Ibora neskatai:
“Ja Judáinoa joni koshibora, mai bichinmis
jonibo keská iki.
¡Jaskara ikenra kikinni sináxon, en jato masá tenemati iki!
11 Israel jonibora ramiareskanai,
moara jawe jawékiomabi ikanai,
ja ikonma diosbo chibantinin keena kopíra,
jaskara ikanai.
12 Israel itan Judá jonibo jato masá tenemakinra,
mansaman jiwi pikin keyobotanai keskáakin en jato ati iki,
13 Israel itan Judá jonibora isinkanti iki,
jatianra Israel jonibo,
jato akinnon ixon yokati Asiria ani apoiba bokanti iki,
ikaxbira jan jato benxoatima iki,
jainxonra jaton payóbo jato raonxontima iki.
14 Leónman bikin jato akai keskáakinra,
Israel itan Judá jonibo en jato ati iki;
enbi beshéakin jato kaxkepakeaxa, ea kati iki;
en jato boaitianra tsonbi ea jato potamatima iki.
15 Noa ochaara ikon iki ixon
onantaanan, jabaon ea benakanai kamanra,
nokon itinko ea karibati iki.
¡Ja masá tenekinra, ea benakanti iki!” ikira Ibo iká iki.