Ibo betan jakiribi inoxon Israelnin yoia
6
Jatikaxbi neri bekanwe, non Iboki noa jakiribi bokanon.Janra noa beshéakin xateyona iki, ikaxbira noa benxoati iki,
noara xatea iki, ikaxbira noa raonti iki.
2 Basimabires noa benxoaketianra,
noa jabé jakanti iki.
3 ¡Ibo onanti kopí koshinon akanwe!
Non Ibora noki joái,
bari pikotai keskáshaman ikon riki,
jenetian itan baritian,
mai mechaai ishtonbires oi beai keská kikínshaman ikon riki.
Ibon israelitabo yoishokoa
4 Ibora neskatai:
“¿Israel jonibó, enki mato jaweati iki?
¿Judá jonibó, enki mato jaweati iki?
Maton ea noiara,
yamékiri wishnin koin keská iki,
nete xabataitian nibí manan keská iki,
ishtonbires winotai riki.
5 Jakopíra nokon joi yoiai jonibo meranxon,
en mato beshéakin kaxkeyona iki;
profetabo meranxonra nokon joinbi en mato retea iki.
Atikeskabiakin en akaira joé keská pikóti iti iki.
6 Maton noitininra ea keenai,
ea yoina retexonyamakanwe;
eara ikon Dios iki ixon onankanwe,
ea menikin yoinabo jatiobi keyokin menoyamakanwe”.