2 Jaskákinra kenamaa iki meráyabo, shinanmanres onanmisbo, yobébo itan onanyabo. Jabora boax apo bebon ikana iki,

3 jatianra jato yoia iki: —En namataki jawe yoii iká iki ixon onankaskinra, en jaakinres shinanai —akin.

4 Jatianra ja shinan onan jonibaon arameo join ja apo yoikana iki: —¡Jatíbitian mia kikin ikax jabanon! Mia kikin ixon, nato min yonotibo min namata noa yoiwe, jatianra jaskati iká riki ixon onantiakin mia non yoiti iki —akin.

5 —Neskara atira en shinanke —akinra apon jato aká iki: —Jaweki en namata ixon maton ea yoiamaketian, itan ja en namataki jawe yoii iká iki ixon maton ea yoiamaketianra, mato beshéakin xatekanti iki, jainxonra maton xobobo manish tsamata keskáres banétiakanti iki.

6 Ikaxbi jaweki en namata ixon maton ea yoiketian, itan ja namáki jawe yoii iká iki ixon onantiakin maton ea yoiketianra, icha jawéki en mato meniresti iki, enra mato akinti iki, jainxonra aniakin en mato rabikaamati iki. Jaskara iketian, ja en namataki jawe iká iki ixon ea yoikanwe, jainxon jawe yoii ikarin iki ixon onantiakin ea yoikanwe —akin.

7 Ja shinan onan jonibaonra jakiribi yoia iki: —Min namata noa yoiwe, jatianra jaskara yoii iká riki ixon onantiakin mia non yoiti iki —akin.

8 Aponra jato yoia iki: —Enra kikinhakin onanke. Jaskara ati en moa shinannara maton onanke, jakopíra mato basiai.

9 Jaskara iken, ja en namata yoiamaxonra, jatíxonbi senenbires maton masá teneti iki, janso itan ikonma ea yoinoxonra maton shinanke, matora manatai jaskara ati en shinanna moa en atima. Jaskara en namata, ea yoikanwe, jaskáxonra en onanti iki, jawe yoii ikárin ixon maton onantiakin ea yoiti atipana —akin.

10 Jatianra onanbaon yoia iki: —Nato netenra tsoabi yamake. Ja onantinin keenai non tsoabi yoiti. Jainoaxa, jawetianbi tsoa apobi yamaa iki, bebon koshi itan kikinbires atipanya ixonbi, shinanmanres onanmisbo, iamax onan shinanya jonibo jaskara jawéki ati jato yokata.

11 Min ati noa yoiara kikinbires atikoma iki, jan yoitira tsoabi yamake, diosbaonparira yoiti iki; ¡Ikaxbi jabora jonibo xaran jaamabo iki! —akin.

12 Jaskara ninkataxa apo kikinni sinata iki, jaskáxonra Babiloniainoa jatíbi onan shinanya jonibo jato reteti joi pikoa iki.

13 Ja joi jatíbiain ninkakaaketianra, Daniel itan jabé ikáboribi retenoxon benakana iki.

14 Jatianra shinanshamanax itan onantishamani, Arioc betan Daniel yoyo ika iki, jara apon sontárobaon joni koshi ixon onan jonibo moa jato retei iká iki.

15 Jatianra Danielnin yokata iki: —¿Jawekopíki apon nato ja senenhati joi ishtonbires pikoa? —akin. Ariocninra jaskara kopí aká onantiakin yoia iki.

16 Jaskáara Daniel apoiba kaa iki, já betan jawetio basitani imatira yokata iki, jan namataki jawe iká iki, jainoax jawe yoii ikárin ixon onantiakin yoiti kopí.

17 Jaskáa pekáora jawen xobon kaxon, jatíbi jaskara winotabo jabé ikábo, Ananías, Misael, Azarías jato yoia iki,

18 ja Babiloniainoa jatíribi onan jonibo betan jato reteyamanon ixon, ja onantima namá onantiakin yoiti kopí, naikanmea Diossen akinon ixon yokátira jato yoia iki.

19 Ja yamébira, Daniel Diossen akinna iki, ja onantima namá jaskati ikára onantiakin yoia iki. Jaskara aká kopíra naikanmea Ibo Dios rabikin

20 neskara joibaon aká iki:

24 Jaskata pekáora, Daniel Arioc oinni kaa iki, jara Babiloniainoa onan jonibo jato reteti apon yoia iká iki, jatianra yoia iki: —Onan jonibo reteyamawe. Apoiba ea boé, jan namatara jatíbi onantiakin en yoiti iki —akin.

25 Jatianbira Ariocnin apo Nabucodonosorhiba ja Daniel boá iki, jainxon apo yoia iki: —Ja yatanxon bekana Judá jonibo xarameara westíora joni en nokoke, min namatara onantiakin jan mia yoiti atipanke —akin.

26 Jatianra ja Beltsasar akin janekana Daniel apon yoia iki: —¿Minki ea yoiti atipana, jaskara en namata, jainxon ja namáki jawe yoii iká iki ixonki min yoiti atipana? —akin.

27 Danielninra yoia iki: —Tsoabira onan yamake, shinanman onamisbora yamake, onanyaribira yamake, wishtinbo onanaribira yamake, jabo min onankasai ja joné jawéki jan mia onanmatira tsoabi yamake.

28 Ikaxbira westíora Dios naikan jake joné jawéki onantiakin pikoai, janra mia onanmake jaskara jawéki rama winoti kaibo. Min oxaxon namá meran min oinnabora jaskara yoii iká riki ixon onantiakin en mia yoiai:

29 Miara min oxatiain iká iki; jainxonra jaskara jawéki rama iki kaai shinanna iki, ja joné jawékibo onantiakin pikoatoninra jaskara ikí kaaibo onanmaa iki.

30 Earibira ja joné jawéki onanmaa iki, jara jatíbi jonibo xewina onan iketian ea akáma iki, min namata jaskara yoii iká riki ixon onantiakin yoiti kopí ea akára iká iki, jaskáaxon min shinan meran akábo onanti kopí.

31 Namá meranra, min oinna iki, joni keská kikin aniosi penébires itan onsábires mí bebon wenitai.

32 Ja joni jisátonin mapora iká iki meskoama orobires; jawen xochi betan jawen ponyan plata; jawen poko, itan jawen kishira, bronce iká iki;

33 jawen rabé witax yamibires; jainoax jawen taé pakex yamiribi, ja wetsa pakex jawen taéra mapó iká iki.

34 Min ja oinnaitianra, mananmameax tson weranamabi westíora makan tsekékiranax, ja joni jisákan taeki pakéxon beshéakin roroa iki.

35 Ja yami, bronce, plata itan oro, jabora ishtonbires poto baneta iki, bariaitian trigo xemea pei choshi, jawebi yamatiakin niwen boa keskára iká iki. Ikaxbira ja joni jisáki paketa makan ani, manan banéxonra jatíbi mai mapoa iki.

36 Ja namára neskara iki. Ramara jaskara yoii iká riki ixon en mia yoiai.

37 Miara jatíbi apo xewina iki, ja naikanmea Diossen mia imaa, koshi shinanra mia menia iki, icha koshira mia menia iki, jakon ninkakataira mia imaa iki,

38 ja oro mapoyara neskara iki, jatíbi jonibaon koshi, yoinabaon koshi itan peia yoinabaon koshi, Diossen mia imaa.

39 Mia iká pekáora, jato ikinnai wetsabo mii namanhori koshimatani janoxiki, jainoax ja kimisha itin iká jato ikinnaibora, ja bronce iki, jatíbi mai iboa koshibora iti iki.

40 Japekáora jawen chosko itin iká koshi ixon jato ikinnaibo, yami keská koshi iti iki; yamín jatíbi xatexon ras ati keskáakinra, wetsabo jatíbi jato ras ati iki.

41 Minra oinribia iki, pakex jawen taé metotiyabi mapó aká, jainoax wetsa pakex jawen taé metotiyabi yamibires; ja yoii ikára neskara iki, jan jato ikinna jonibora rabé tsamá ikanti iki, yami keská koshi ikaxbira yami betan mapó meskota min oinna iki.

42 Ja tae metotibora iká iki pakex yamibires, jainoax wetsa pakex mapó, nato jaskara yoii ikára, ja koshi ikaxbi koshimaribi iti yoii iká iki.

43 Jatian min oinna yami betan mapó meskota keskatira, ja joni koshibo wetsa mainmeabo betan joi senenhabekonax wanoax jainbicho tsinkíkanti iki; jaskataxbira westíora yorabicho keská ikantima iki, ja yami betan mapó meskóti atipanyamaa keskára ikanti iki.

44 Jaskáakin jabaon jato ikinnai kamanra, jawetianbi ras atima itan wetsa mainmeabaonbi jatoarestimaakin, naikanmea Diossen tsonbi ras atima jato ikinai apo imati iki, jaskáaxonra jatíribibo jatíbi jato keyoti iki, jaskáaxa jabichores jatíbitian iti iki.

45 Jaskara yoii iká riki, ja mananmameax westíora makan tson weranamabi tsekékirani joxon jaki pakékin ja yami, bronce, mapó, plata, ja oro potobichores itiakin banea, min oinna. Rama jaskara winoti kaira, kikin Diossen mia oinmaa iki. Ja namára ikonshaman iki, jainoax ja onantiakin yoiara jaskarakon iki —akin.

46 Jatianra apo Nabucodonosor Daniel bebon chirankootax, maikibi bekepinon kaman beota iki, jatianra jawékibo betan incienso ininti meniti jato yoia iki.

47 Japekáora Daniel yoia iki: —Maton Diossa jatíbi diosbo xewina koshi iki; apobaon Ibo riki, jainoaxa joné jawékibo onantiakin pikoai iki, jaskara iketianra nato joné jawéki min onantiakin pikoke —akin.

48 Jaskata pekáora apo bebon ani koshi Daniel imaa iki, jainxonra icha itan kikin jawékibo menia iki; jaskáribiaxonbira Babilonia mainmea koshi jikimaa iki, jainxonra ja mainmea jatíbi onan jonibo xewina jaton koshi imaa iki.

49 Danielnin yokáketianra, apon ja Sadrac, Mesac itan Abed-nego, ja Babilonia mainkonia jakonhakin tee ati ani koshibo jato imaa iki. Danielra apon xobonkobi baneta iki.