2 Japekáora ja mainmea jato ikinnai jatíbi joni koshibo kenati jato yoia iki, sontárobaon joni koshibo, jemamea joni koshibo, jato shinankiinai joni koshibo, koríki koiranmakana joni koshibo, jato joi benxoaxonai joni koshibo, jato joi benxoaxonaibaon koshibo, jainoax ja mainmea wetsa joni koshibo, jatíbi jabo jato kenatira jato yoia iki. Jan jato amaa joni jisá jaskaati iketian jato onanmakin.

3 Ja mainmea jatíbi joni koshibora, ja joni jisá aká onanni fiesta akí tsinkíkana iki.

4 Peokanon ixon jan jato yoiti imakanatoninra, moa peokanon ixon yoikin koshín jato saí aka iki: “Ninkákanwe jatíbi jemamea jonibó, jatíbi mainmeabó itan jatíbi ja meskó join yoyo ikaibó:

5 Trompeta, flauta, cítara, lira, salterio, gaita, jatíbi ja bewakin ati jawékibo ikaitian ninkatatianbira, ja apo Nabucodonosornin joni jisáakin oro jato amaa chirankooxon maton rabiti iki.

6 Jatíbi ja joni jisá aká chirankooxon rabiamaibora, jatianbi horno tiritai meran potakanti ikii”, akinbo.

7 Jaskara iketianra, ja icha joni jain tsinkitabaon jatíbi jan música atibo akana ikaitian ninkáxon, ja oro akana joni jisá chirankooxon rabikana iki.

8 Jatíribi caldeobaon oinna, Judá jonibo jan jato ramiati atibires iketianra apo Nabucodonosorhiba kaxon,

9 yoikana iki: —¡Mia apo jatíbitian jawe, jainoax min jane jatíbitian ja shinanti ibanon!

10 Minra yoia iki, jatíbi jan música atibo akana ikaitian ninkatatianbi, jatikaxbi chirankooxon ja joni jisá rabiti,

11 jaskara iketian jaweratobaonki ayamai jabora horno tiritai meran potakanti iká iki.

12 Jaskara ikenbira, jaweti Judá jonibo jake, Babilonia mainko jakonhakin tee anon ixon min jato koshi imaabo, jabaonra jawekeskaaxonbi min diosbo rabiamakanai, min joni jisá oro jato amaxon chankanaribira rabiamakanai. Jabo riki Sadrac, Mesac itan Abed-nego —akin.

13 Jatianra Nabucodonosor ikonbiresi sinata iki, jainxora Sadrac, Mesac, Abed-nego já bebon beti jato yoia iki. Jatianra moa já bebon ikanaitian,

14 jato yokata iki: —¿Ikonrin nokon diosbo maton rabiamai, itan ja oro joni jisáakin en jato amaaribi maton rabiamai?

15 ¿Ja música ikai ninkatatianbi, ja en jato joni jisaakin amaa beokainxon rabinox moa mato benxokaatarin? Maton rabiamaketianra, ja horno tiritai meran mato potakanti iki; ¿Jaskaketianki jawe diossen mato jamati iki? —akinbo.

16 Jatianra yoikana iki: —Nato jawékira jaskarama iki ikaxa noa miibetan join iti yamake.

17 Ja non rabiai non Diossenra, ja horno tiritai meranoa noa pikoti iki, jatíbi min noa jakonma akasaibira noa xabaati iki.

18 Ikaxbi, min noa chii meran potatima ikenbira, min diosbo non rabiamai, ja oro joni jisaakin akana bebonribira noa chirankooyamai, rama min noa onanwe —akin.

19 Ja joibo ninkataxa Nabucodonosor, ja kimisha bake ranonki sinati jawen bemanan joshina iki. Jaskáxonra jaskaai axekana bebonbires kanchis akin horno xanaati jato yoia iki;

20 japekáora Sadrac, Mesac, Abed-nego jabo nexati, jawen kikin koshi sontárobo yoia iki, jaskáaxon ja horno tiritai meran jato potatira yoia iki.

21 Ja kimisha bake ranonra, jaton joni koshi ixon saweti chopayabipari ikenbi, nexaxon horno tiritai meran potakana iki.

22 Jatianra apon joi jatianbi senenhati iketian akin, horno kikinbiresi ketéketian ja kimisha bake ranon ja meran potaitian, sontárobo chiikan yatana mawákana iki,

23 ja bake ranonbora nexáyabi horno meran pakékana iki.

24 Jatianra Nabucodonosor ishtonbires wenita iki, jaskáxonra jan shinanman akinnai jawen jonibo yoia iki: —¿Ja nexayonxon non chii meran potaa joniboki kimishama iki? —akin. Jaskara riki akinra akana iki.

25 —Enra oinnai chosko joni moa nexaa chorokootabo, chiikan jaweayamaa ja meran jakonshamanres boanhatankanai, jatian jawen chosko itin iká jonira ángel jisá iki —akin jato aká iki.

26 Jaskara yoitaananra, Nabucodonosor horno patax kaax, saí ika iki: —¡Sadrac, Mesac, Abed-nego, koshi Diossen jonibó, jainoax pikotax neri bekanwe! —iki. Jaskaara ja kimisha joni chii tiritai meranoax pikókana iki,

27 jatianra ja mainmea jatíbi joni koshibo jain tsinkitabo, ja bake ranonbo patax boankana iki, jaton yorabo oinkanara chiikan jaweaama iká iki, jaton maponkonia boobo, itan jaton sawea chopabo menotama, jainoax koin itsabobi poayamakana iki.

28 Jatianbira Nabucodonosor neskati saí ika iki: “¡Sadrac, Mesac, Abed-negonin Dios rabikanwe, jawen yonoti jonibo joi senenhaibo iketianra jato jamanon ixon jawen ángel raanke, ja apon yoia joira senenhayamakana iki, jaton Diosma iketian wetsa dios chirankooxon rabiamatianbi mawátininra keenkana iki!

29 Jaskara iketianra rama en yoiai, jawerato joniki nato bake ranonbaon Dioski jakonmai yoyo ikai, jara jaxkakanti iki, jainoax jawen xobora chiimapobicho tsamátiakanti iki, wetsa jemameabires inonbi, wetsa mainmeabires inonbi, wetsa joiabires inonbi, jaskara ikaxa jaskáakin jato jamati atipana wetsa dios yamake”, akin.

30 Jaskata pekáora apon ja kimisha bakeranon, Babilonia mainmea bebonbires jakon jaton joni koshibo jato imaa iki.