Apo Nabucodonosor shinan keyota
4
“Ea, apo Nabucodonosor keenai riki, jatíbi jemamea jonibo, jatíbi maibotiibi, jatíbi meskó joiabo nato neten jaabo jawe iamai jakonshaman, itan icha jakon jawékinin bebona ikantinin.2 Anibires jan manaiti jawékibo, bochikia koshi Diossen ebetan aká maton onantininra ea keenai.
3 ¡Jawen aká jawékibora anibires jan manaitibo iki, itan jaskara iosma jawékibo iki! Já apo ikára jatíbitian iti iki, jawen koshira tekíkaresi jawetianbi keyótima iki.
4 Eara, jakonbires nokon jakon ani xobo meran jaa iki, icha jawékinin bebonxonra en jakonshaman shinanna iki.
5 Ikaxbira wetsa yamé, oxai rakáxon namatax ea rateta iki, jatianra jabo shinanni itan ja en oinnabaon akonbireskin ea rakémaa iki.
6 Jatianra Babiloniainoa jatíbi onan jonibo ea oinni bekanti en jato yoia iki, ja en namataki jawe yoiai ixon ea yoikanti kopí.
7 Babiloniainoa jatíbi ja onanyabo, shinanmanres onannaibo, onanbo, wishtin onanbo eiba bekanketianra, en namata en jato yoia iki, ikaxbira jaskara yoii iká onantiakin ea yoiti atipanyamakana iki.
8 Ja senentiainbira Daniel joá iki, jawen janeribi Beltsasar nokon dios kikinman rabikin en janea, jara ochaoma Diossen shinanxona jaa iká iki, jatianra en namata neskáakin en yoia iki:
9 ‘Beltsasar, shinanmanres onanai jonibaon koshi; enra onanke jakon Diossenra mia shinanxonai, jaskara ixonra jatíbi joné jawékibo min onanke. Ninkawe, en namá meran oinnara neskara iki, jaskáaxon jaskara yoii iká onantiakin ea yoiwe.
10 En oxai rakáxon namatara neskara iká iki:
Westíora jiwi kikin keyáshaman mai naponbekonshaman nia.
11 Ja jiwira aniax kikinshaman raston, itan
jawen xama naikibi mepia,
jaskara ikaxa ochó mai senenainxonbi oinna jishti iká iki.
12 Jawen pei kikin metsáshaman,
jainoax jawen bimi kikínshaman icha,
jatíbi jato jawékiamati senenra iká iki.
Mainmea yoinabora ja naman otai tsinkita iki,
noyai yoinabaon naabora jawen poyanbaon iká iki,
jainoax jatíbi nato netenmea jonibaonra,
jan jati jaibakea jawékiati bia iki.
13 En namá meran oinnara, naikameax westíora jato koirannai sontáro keská ángel ishtonbires paketa iki.
14 Jatianra neskati saí ika iki:
Ja jiwi poxakanwe, jawen ponyanbo xatekanwe,
jawen peibo ras akanwe,
jawen bimibo janbis akanwe.
Jawen ota naman iká yoinabo jabábanon,
jawen ponyain iká peia yoinabo jabábanon.
15 Ikaxbi ja jiwi boró jawen taponyabi
tsekayamakin jainbi ja main jenekanwe; yami
betan bronce cadenanin nexakanwe, jaskáaxon ja
mai xobi meranbi jenekanwe. Jaki nibí manbanon,
jainxon ja mainmea yoinabo betan xobi pibanon.
16 Jawen shinan moa wetsaresibi ibanon, jaskatax
yoina keská banébanon, jatianra kanchis baritia
kaman jaskara jakonma iti iki.
17 Nato jaskáakin masá tenetira
jato koirannai
jakon ángelbaon yoia iki,
bochikia Diossa jatíbi atipana koshi shinanya iki,
jonibo apo imati, ja imatinin
kenaabora jan jato apo imai ixon,
jatíbi jonibaon onantira iká iki,
ja jonibo xaranmea namanbiresa
westíora main joni koshi imai’.
18 Ea apo Nabucodonosornin, namatara jaskara iká iki. Beltsasar, rama, jaskara yoii iká riki ixon onantiakin ea yoiwe, nokon mainmea onan jonibaonra westíoraxonbi jaskara yoii iká onanyamake; ikaxbi minra jaskara yoii iká onantiakin yoiti atipanke, jaskara ikenra jakon Diossen shinan mii meran iki”, akin.
19 “Jatianra Daniel, ja Beltsasar akin akanai, jawetio basishokopari shinanni jain iká iki, jaki beai shinanbaon ratea. Jaskatainbira ea, apon, en yoia iki: ‘Beltsasar, ja en namata kopí itan jaskara yoii iká kopí masá shinanyamawe’, akin. Jatianra Beltsasarnin yoia iki: ‘¡Jawe ireskiai, min rawíboki jatíbi ja namakan jaskara iti yoiabo pakébanon!
20 Ja jiwi keyá itan raston min oinnara, naikibi nokota ikax, ochó mai senenainxonbi jishti iká iki,
21 jawen pei metsáshamanbo, jawen bimi ichaira ikax jatíbi jato jawékiamati senen, onsá yoinabora ja naman otai bekana iki, jawen poyanbaonra peía yoinabaon naakanai iká iki,
22 ja jiwira mia iki, koshi itan kikinbiresa mia baneta iki, miara nai keyá kamanbi nokota iki, jaskara koshi ixonra jatíbi mai min iboa iki.
23 Min oinnara, jato koirannai westíora jakon ángel naikameax paketax neskati yoyo iká iki: Ja jiwi rerakanwe, jaskáaxon beshéakanwe, ikaxbi jawen boró taponyabi mainbi jenekanwe; yami itan bronce cadenanin nexakanwe, jaskáaxon ja mainbi xobi meran jenekanwe. Jaki nibí manbanon, jainxon abánon kanchis baritia senenai kaman yoinabo betan mainmea xobi pikin, iki.
24 Natora bochikia koshi Diossen mia jaskáakin masá tenemati yoii iká iki.
25 Miara moa jonibo betan iamai yoinabo betan jaai kaxon, wakan akai keskáribiakin xobi min piti iki, jainxonra min yora nibikan mechaati iki; Bochikia koshi Diossenra jawen koshín jatíbi koshi iká jonibo, jato ati atipanke iki ixon, min onannai kaman kanchis baritia senen mia jaskara jati iki, jaskara ixonra jawen keenabo jan jato ikinti koshi jikimai.
26 Ja jiwi boró taponyabi mainkobi baneti ikára, Diossa koshi iki ixon min onanketianpari, jakiribi mia imakanti yoii iká iki.
27 Jaskara iketian, min nokon esé chibanwe, pontéshamanres iwé, moa ocha wetsayamawe; min jakonma akaibo moa jain senenres jenewe, jaskáxon jawebioma onitsapibo akinwe. Jaskataxa mia jawe iamai jakonshaman ikax, itan jawékinin bebonkaresi mia jabirati iki’ ”, akin.
28 Jatíbi ja jaskara iti apo Nabucodonosor yoiabora moa senena iki:
29 Moa westíora baritia winota pekáora, Babiloniain jawen jakon ani xobo bochiki xabá ikain jawe ayamai apo kawantani,
30 neskati yoyo ika iki: “¡Oinkanwe, Babiloniara kikinshaman ani iki! Enra, nokon ani koshin, ea apo ixon nato nokon mainmea ani jema itiakin, en atipana oinkanon ixon en aká iki”, iki.
31 Aponra yoyo iikinbi, naikameax neskati yoyo ikai joi ninkata iki: “Apo Nabucodonosor, joi ninkawe, miara moa apo iamai;
32 jonibo betan iamaira moa yoinabo betan mia jati iki; kanchis baritia senenai kamanra, wakabaon akai keskáakin min xobi piti iki. Koshi Diossa jatíbi nato netenmea maibotiibi jato ati koshia iki ixon, min onanai kaman, itan já riki jawen keenbo jan jato ikinti, jato koshi jikimai ixon min onanai kamanra, mia jaskara iti iki”, iki ikaibo.
33 Jaskataitianbira ja masá tenemati yoia moa senena iki, jatianra Nabucodonosor jonibo xaranmeax pikota iki; wakabaon akai keskáaribiakinra xobi pia iki, nibikanra jawen yora mechaa iki, jawen boo betan jawen mentsisra nenketa iki, tetekan pei keska, itan jawen mentsis keskára iká iki.
Nabucodonosor benxoa
34 “Jatio basi en masá teneti iká moa senenketianra, ea, Nabucodonosornin, naiori oinna iki, jatianra nokon shinan keyota ea moa benxoa iki, jaskataxa koshiya Dioski ea jakonni yoyo ika iki, jara jatíbitianbires en neskara joibaon rabia iki:
‘Jawen koshi shinanra jatíbitianbires iti iki;
ja apo ikára jatíbitian tekíkaresti iki.
35 Já bebonra nato mainmea
jonibo jawemabi iki.
Janra naikan itan nato main
jawen keena keská akai.
Jawen koshin akaitianra tsonbi ja bechiteti yamake,
jaskara akaira tsonbi yokáti yamake’.
36 Jaskánontianbira jakiribi nokon jakon shinan moa pontekin en bia iki, ea apo ixon en jato jakonhakin ikinnai, ea jakonhakanai itan kikin en bia iki. Jan ea shinankinaibo betan jan ea mai koirankina ani joni koshibora ea oinni bekana iki, jatianra nokon main joni koshi jakiribi ea jikiax, moa ikátiai bebonbires koshi ea iká iki.
37 Jaskara iketianra, rama ea Nabucodonosornin en rabiai, ani riki ixonra en shinanai, naikanmea Apora aniakin kikinman en rabiai, jaskara ikenra jatíbi jan aká ikonshaman, itan atikeskabiakin aká iki, jaskara ixonra iresama shinanmeetaibo jato namanbires shinanmeemati atipanke”.