2 Belsasarninra, jawen papa Nabucodonosornin Dios rabiti xobonkonia, Jerusalénhainoa bea oro vasobo, oro tazónbo beti jato yoia iki.

3 Ja vasobo betan tazónbo moa bekanketianra, ja apon awinbaon, itan jawen merati awinbaon jainxon jawen ani joni koshibaon, jan xeakana iki.

4 Jatíxonbira vino pae xeakana iki, jaskáaxonra ja oro aká, plata aká, bronce aká, yami aká, jiwi aká, makan ja rabiti aká jawéki rabikana iki.

5 Jaskákanaitianbira joni yamankobi westíora meken pikóxon, xenin ikai lámpara joékan tenaa, ja ikana chité meran jishti iketian oinkana, xobo chiké joxo ikainko metotinin wishaa iki. Ja wishai meken oinnaxa apo,

6 raketen yatana taenkoniaxbi peokootax maponko kamanbi saki iká iki.

7 Jaskatira saí ika iki, jatianra onanmisbo, onanbo, itan wishtin onanbo ja Babiloniainoabo jato kenaa iki, jatianra jato yoia iki: —Jan nato chiketen iká yoyo axon jaskati iká onantiakin ea yoiketianra, púrpura chopa jakon sawemaxon, oro cadena teomaxon nokon main ja kimisha itin iká joni koshi en imati iki —akin.

8 Jatíbi ja apon yonoti onan jonibora ja chité meran jikikana iki, ixonbira ja wishá tsonbi onanxon jaskara yoia riki ixon, onantiakin apo yoiti atipanyamakana iki.

9 Jatianra apo Belsasar kikínbires akin raketen yatanna iki, jatiobi jawen bemananra kikínshaman pasná iká iki. Jawen joni koshibaonra jawe ati onanyamakana iki,

10 jawen bake, jainoax jan chania bea kikin jonibo saí ikanaitian ninkataxa, jain ikana chité meran jikixon jawen tita apo ainbaon yoia iki: —¡Mia apo jatíbitian jabanon! Jakonma shinanni raketi pasnáyamawe,

11 mia apo iká mainra, jakon Diossen shinanman jakinna westíora joni jake. Min papa apo inontianra, jawen mapón shinannai jishtibires iká iki, jaskáaxon jakon ati onan shinanyara iká iki, kikínbires onan shinanya ikaxa diosbo keská iki. Jaskara iketianra min papa apo Nabucodonosornin, nato mainmea onanyabo, shinanman onanmisbo, onanbo jainoax wishtin onan jonibaon koshi iti ja joni janea iki,

12 Daniel, Beltsasar akin apon janea meran moa tsoa jaskara iosma keská shinan jaketian, ishtonbires onanai iketian, jainoax jaskáaxon jawéki ati onan shinanya iketian, namá jaskara yoii iká onan iketian, joné joibo onantiakin yoixon atikoma jawékibo ponteai iketian. Daniel kenawe, janra ja chiketen iká wishaa onantiakin mia yoiti iki —akin.

13 Danielra apo bebon bokana iki, jatianra apon yokata iki: —¿Miarin Daniel, ja nokon papa apo Nabucodonosornin, Judeainoa jato yatanxon benontian mia bekana joni?

14 Miimeranronki diosbaon shinan iki ixonra ea yoikanke, min shinan ponté, mia jawéki onan, jainoax mia onan shinanyara ea yoikanke.

15 Nato nokon mainmea bebonbires onan jonibora, neno ikanke ja joibo yoyo axon jaskara yoii iká onantiakin ea yoiira bekana iki, ixonbira jawebi onanyamakanke.

16 Jaskara ikenbira, yoikanai en ninkáke, onantima jawékibo onantiakin yoixon, atikoma jawékibo min ponteai. Ja joibo yoyo axon, jaskara yoii iká onantiakin min ea yoiketianra, púrpura jakon chopa sawemaxon, oro cadena teomaxon, ja kimisha itin iká nokon mainmea jaton joni koshi kikin en mia imati iki —akinbo.

17 Jatianra Danielnin yoia iki: Min ea menikasai jawékibo minnabi ibanon, ja min xobo meranshaman iti min ea yoia wetsabo imanoxon yoiwe. Jawe binoxomabira ja chiketen wishaa, joibo jaskara yoii iká riki ixon en mia yoiti jake.

18 “Min papa, Nabucodonosor riki, koshi Diossen apo imaxon kikin mai menia, kikinbires koshira imaa iki, kikinbiresi ninkakaatai itan jakonman rabikanaira imaa iki.

19 Ja koshi menia kopíra, jatíbi jemameabo, jatíbi mainmeabo, jainoax jatíbi meskó joia jonibo jaki shiroyamakin jakonhakana iki, jainoaxa já bebonmeax saki ikana iki. Jaskara ixonra jan akasaibo retexon, iamaxon jan jamakasaibo jato jamaa iki; jatíribibora koshi jikimaa iki, jainxonra jatíribibo koshi pikoxon jato namanbires imaa iki.

20 Ikaxbira bebonbires jawen rabíti shinan já meran bochoketian, jainxon jawen keena keskáres aketian itan rabiketianra, ja apo ikax koshi itan anibires ninkakaatai iitai moa bichina iki.

21 Moa jonibo betan iamaira janbiribi iká iki, jaskataxa yoina keská baneta iki; niimeranoa burrobo betanra jaa iki, wakabaon akai keskáribiakinra xobi pia iki, nibikan akára jawen yora mechata iki, jatíbi nato main apo iká jonibo jato ati koshia riki koshi Dios ixon onanai kaman, itan janra jawen keenbo jan jato ikinti jato koshi jikimai ixon onanai kamanra jaskara iká iki.

22 Jatianra rama mia apo Belsasar iki, ja jonin bake, jaskara ixonra ja winotabo min onanke, jaskara ikaxbira namanshoko shinanmeetax mia jakon jaama iki.

23 Jaskáyamaira, ja naikanmea Iboki mia shiroke, Diossen xobonkonia vasobo betan tazónbora jan xeanoxon mesanko min jato bemake, jaskáaxonra, ja min chania beabo betan jabaon mato xeake, jainxonra oro, plata, bronce, yami, jiwi itan makan akana diosbo min rabike; ja diosbaonra oinyamai, ninkáyamai, jawebi onanyamake. Jaskara ixonra, jan mia jamaa Dios min rabiamake, jatíbi min akaibora jan amaares min akai iki.

24 Jaskara kopíra, ja joibo wishati ja meken jan raana iki,

25 MENE, MENE, TEKEL y PARSÍN iki iká,

26 ja joibora neskara yoii iká iki: MENE: Jatio basi mia iti netebora, Diossen moa topona iki; jaskáxonra jain senenres mia iti aká iki;

27 TEKEL: Min iwera moa balanzanin topona iki, jatianra jatí min iwe iti senenma namanbires iká iki;

28 PARSÍN: Mia apo iká maira moa naponbekon kaxkea iki, jara medobo betan persabo meniti iki”.

29 Jatianbira apo Belsasarnin jato yoia iki, Daniel jakon chopa púrpura sawemati, jainxon oro cadena teomati, jaskáaxonra jatíbi jato ninkámakana iki, jatianbi peokootax Daniel, jawen kimisha itin iká ja mainmea jaton joni koshi iká iki.

30 Ja yamébira Babilonia jonibaon apo, Belsasar retekana iki,

31 jatianra Mediainoa Dario ja main apo iká iki. Ja Dariora sokota chonka rabé baritiaya iká iki.