JEREMÍAS
Israel itan Judá jonibo jakonmaitian jato eseti Jeremías kenaa
Jeremías janbix yoikaata
1
Hilcíasnin bake Jeremíasnin yoia joibo, itan jan aká jawékibo. Jeremías iki, ja Benjamín jonibaon main iká, Anatot jemamea ikon sacerdotebaon rarebo.2 Ibonra Jeremías yoia iki, ja Amónman bake Josías, chonka kimisha baritia Judáin apo inontian.
3 Jainxonra yoiribia iki, ja Josíasnin bake Joacim, Judáin apo inontian, itan ja Josíasnin bake Sedequías, chonka westíora baritia pichika oxe kaman Judáin apo inontian. Ja iki ja Jerusalénhainoa jonibo yatanxon wetsanko jato bokanontian.
Jeremías Ibon kenaa
4 Eara Ibon yoia iki:
5 “En mia joniamatianbira, en mia katota iki; mia pikotamatianbira, nokona inon ixon en mia onantiaa iki; maibotiibi iká jonibaon ikon profeta itira en mia imaa iki”, akin.
6 Jatianra en yoia iki: “¡Jawe ireskiaipanon Ibó! ¡Eara bakeranonyora ikax yoyo iti onanma iki!” akin.
7 Ikaxbira ea Ibon yoia iki:
“Eara bakeranonyora iki iamawe.
En mia kati yoiainko kaxonra,
en mia yoia joibo min jato yoiti jake.
8 Tsokibi rakéyamawe,
mia koirannira ea miibetan ikái. Ea, Ibonra, jaskara yoiai”, akin.
9 Jatianra nokon kexa tii axon, ea Ibon yoia iki:
10 “Nokon joira min kexain en akai.
Ramara ja apobo, itan ja maibotiibi ikábo,
jato yoiti koshiya en mia imai,
mexaxon, min jato poxanon ixon,
ras axon, min jato besheanon ixon,
itanribi jakiribi apakeribaxon,
min jato weninti kopí”, akin.
Jeremíssen rabéakin namá keska meran oinna
11 “Ibonra ea yokata iki:
¿Jeremías jaweki min oinna?” akin.
“Enra oinke Almendro jiwi ponyan”, akinra en aká iki.
12 “Jatianra ea yoia iki: Min yoiara ikon iki.
Jaskara ikenra, ja en yoia joibo senennon ixon en oinnai”, akin.
13 Jawen rabé itínra Ibon ea yokata iki:
“¿Jaweki min oinna?” akin.
“Kentí kobinnaira en oinke,
norteokeax tanxatax, moa chikotibi”, akinra en aká iki.
14 Jatianra Ibon ea yoia iki:
“Jatíbi nato main jaa jonibokira
jan masá téneti jakonmabires norteokeax jatoki chikoti iki.
15 Ea Ibonra, ikon yoiai,
ja norteorikea
jatíbi apobora en kenai.
Ja apobaonra bexon,
ja Jerusalén jikitiainbi
jaton ani yakatibo akanti iki,
jatíbi jan kateaketana makan chiké bebon,
itan jatíbi Judáin iká jemabo bebonra ikanti iki.
16 Ja ea jenea ocharesbo jato masá
tenematira koshi joi en pikoai,
jabaonra incienso ininti, wetsa diosbores
menoxonkana iki, itan ja rabiti
jatonbi akábores rabikana iki.
17 Ikaxbi minbiribi, koshiakin shinanwe;
katanwe, jatíbi ja ati en mia yoiabo jato yoitanwe.
Jatoki rakéyamawe, mia jaskaketianra,
jato bebonxon en mia saki imati iki.
18 Ramara koshiakin aká jema keská en mia imai,
yami witá keská,
bronce chiké keská,
Judá mainmea jatíbiainoa jonibaon
mia akaitian min jato kopínon ixon:
jawen apobo, jawen joni koshibo,
itan jawen sacerdotebo,
jainoax jatíbi ja mainmea jonibora min jato ati iki.
19 Jabora miibetan reteanankanti iki,
ikaxbira miaareskantima iki,
jaskara ikenra mia koiranti kopí ea mibé iti iki,
Ea, Ibonra jaskara ati en yoiai”, akinra ea aká iki.