Israelbo senenma iká
2
Eara Ibon yoia iki:2 “Jerusalén jonibo yoitanwe;
jakonhakin ninkákanon ikax saí itanwe:
‘¡Ibonra jaskara yoiai!
Enra shinanai mato bake ranon inontian en yoia maton akonkin senenhakatiai,
awinhakin jato biti keskáakin
en mato biara maton ea noia iki,
jatianra jain jawebi xoxoyamai mananman ninontian
maton ea chibana iki,
ja main banaara jawebi xoxoyamai’
3 Israelra nokonabiribi iti en imaa iki,
nokon yoá kikin jakon en tsekaa keskára iká iki.
Wetsanbires jato ramiaketianra
en jato masá tenemaa iki,
jakonmabires jan masá tenetira en jatoki raana iki.
Ea, Ibonra onantiakin yoike”, akinra aká iki.
4 Jacobnin chiní bakebó, jatíbi Israelnin rarebobó, Ibon joi ninkakanwe.
5 Ibonra jato yoia iki:
“¿Jawe jakonma eibakea nokoaxki,
maton rekenbo eibakeax ochókana iki?
Jawemabi diosbo rabikin peoaxa,
jatonbinix jawemabi banékana iki.
6 Egiptonkonia en jato pikoa ikenbira,
ea benati shinanyamakana iki,
jain jawebi xoxoyamai mananmanra en jato boá iki,
mai manxan itan ketóbiresa iká iki,
jain onpax yama, kikin onsára iká iki,
ja maira tsoabi jain jaama iká iki,
jainra tsoabi winóyamaa iki.
7 Nato mai jakonhainra en jato bea iki,
jainoa yoá jawékiakanon ixon,
itan jaton aká kikin jakon yoábo
jawékiakanti kopí.
Ikaxbira bexon nokon mai jaskátima ikenbi maton mekeyamaa iki,
jaskáaxonra nokona ikenbi ja maiki maton ea kerásmaa iki.
8 Sacerdotebaonra ea benayamaa iki,
jato esé onanmai nokon jonibaonra
ea onankashamakana iki,
joni koshibora eki yoitimaa iki,
jatianra profetabo ikonma dios Baalnin janenkores yoyo ikana iki,
jatianra ja rabiti jatonbi aká jawemabi ikenbi jares rabikana iki”, akin.
9 Jaskara ikenra, Ibon yoia iki:
“Ramara ja matoyabi maton bakebo, itan
maton bababaon jakonma akábo yoixonkin en peoai.
10 Ja bari jikiaiori iká nasinkobo kaxon ointankanwe;
jan akonkin ointi Cedarhain joni raankanwe,
abanon ikonrin ixon oinkin,
11 ikon Dios onanma mainmea jonibaon jaton diosbo jenexon wetsa bikana.
¡Jaton diosbo ikonmabo ikenbira wetsabo chibanyamakanai!
Ikaxbira nokon jonibaon ea jenea iki,
ea koshi ikenbi,
ja rabiti akana jawemabi ikenbira
ja chibankin ea jenekana iki.
12 ¡Jaskara iken, ratéwe, naiká!
¡Kikinni raketi saki iwe!
Ea, Ibonra, onantiankin yoike”, akin.
13 “Nokon jonibora rabé rabeti ochakana iki:
eara jenekana iki, jan jati onpax
jokonai keská ikenbi,
jaskáaxonra jain onpax ati jatonbi akana iki,
jara pozo toeta ikax jain onpax banéyamai”.
Senenma iká kopí Israelnin masá tenea
14 Ibonra yoia iki: “Israel jonibora yanka yonokaataima iki;
jabora yanka yonokanti pikotama iki
Jaskara ikenki.
¿Jaweati, maton rawibaon maton jawéki mato bichinnai?
15 ¿Jaweakiki jato akí,
mato leónbo koshin keotai keskatai?
Jaton maira jawebioma maton banémaa iki;
jaton jemabora maton ketea iki,
jatianra tsoabi jain moa banéyamaa iki.
16 Egiptonkonia Menfis betan Tafnes ikainoa
sontárobaonra matoaresxon mato rabinhakana iki,
maxtanhai keskáakinra mato akana iki.
17 Ea jenea kopíra mato jaskara winota iki,
ea maton Ibo Dios ixon,
jaskati jati en mato onanmaa ikenbi.
18 Jatianra ramaki ¿Jawe jakon maton biai
ja Egiptonko Nilo onpax xeai kaxon?
¿Jawe jakonki maton akai, Asiriain
Éufrates onpax xeai kaxon?
19 Maton jakonma akátoninbira, mato masá tenemati iki,
ja ebé ixon ati senenhayamaa ixonra,
maton masá teneti iki.
Shinankanwe, jaskara jakonma, itan masá shinanti riki,
eakaya maton Ibo Dios ikenbi, rabiamakin maton ea jenea, iki ixon mato oinnon.
Ea jatíbi atipana Ibonra jaskara yoike”, akin.
Israel yoitimaa
20 Ibonra yoia iki: “Mato eki yoitimaara moa basi iki,
eki yoiti itinra mato keenyamaa iki.
Matonra ea yoia iki: ‘Mia tee axontininra ea keenyamai’.
Jatíbi mató keyábotiibi,
itan jatíbi jiwi ichashaman peia namanmeaxa mia teakaata iki.
21 Jakonshaman uva jiwi banai keskáakin en mato akára,
kikinbires jakon uva bero xoxo keska mato iká iki.
¡Ikaxbira mato bebonbires jakonma ike,
matorin ixonra moa en mato onanyamake!
22 Ikonbiresi mato lejianin chokitabi,
itan jatíbi ja mato kenaiti jabónman mato ikábira,
ebebon maton ochan kerás jareske. Ea, Ibonra, onantiakin yoike.
23 ¿Jawekeskaxonki maton yoiti iki: ‘Noara
ochaama iki, ikonma diosboribira non rabiamaa iki ixon’?
Shinankanwe mai teshanpainxon maton akáboki jawekeska iká iki,
jatíbi ja maton akábo shinankanwe,
matora camello awin jawen tae
chorishin jatíbiain ishtoi kawantanai keská iká iki;
24 ináma burro awin jawen keen shinan akáx nii meran kawantani
paxkinxon koshín joinhatanai keskára mato iká iki.
Ja ikasaitianra tsonbi bechiteti atipanyamake.
Jawen benen benaara paxkinyamai,
jatíbitianra ja ikasaitian ati iki.
25 ¡Israelbo, zapatooma ishtokin maton tae ramiayamakanwe,
nomiira mato tetaraxnake!
Ikaxbira maton ea yoia iki:
‘Ikáma, ikonma diosbo rabikin jenetira atikomabires iki;
wetsabaon ikonma diosbora non noike, nonra rabikin jeneyamai’, akin.
Atibi Israel masá tenemati
26 Yometso merakana rabinnai keskatira,
Israel rabinti iki, apobo, joni koshibo,
sacerdotebo, profetabo itan jatíbi jonibora rabinkanti iki;
27 matonra jiwi yoiai: ‘Miara nokon papa iki’, akin,
itan makanbiribi maton yoiai: ‘Miara nokon tita iki’, akin.
Eki jakonmai yoyo ikinra, maton ea ninkáyamaa iki,
Jaskara ikaxbira, onsá oinxon maton ea yoiai:
‘¡Noa akinniwe!’ iki.
28 Judá jonibó, ¿Ja matonbi aká diosboki jawerano iki?
¡Maton diosbora maton jematii icharibi iki!
¡Jaskara iken jabo bebánon,
rabintibires jakonmain
mato pakéketianki mato akinti atipana ixon non oinnon!
Judá jonibaon atibi masá teneti Diossen yoia
29 ¿Jatíbi mato eki yoitimaa ixonki,
jawe jakonma en aká maton ea yoixonti iki?
Ea, Ibonra, onantiakin yoike.
30 Yankabiresa maton bakebo reteanantiain en jato mawámaa iki,
jaskákin en jato onanmakasabira axeyamakana iki.
León siná keskabo ixonra, maton profetabo matonbi retea iki.
31 Ramatian jaa jonibo ixon,
matonribi Ibon joi netékainxon ninkákanwe:
Israelbo, ¿Matonaki ea, jain jawebi
xoxoyamai manan keska jain tsoa jatima iká iki?,
¿Ja mainki ota iká iki?
Nokon jonibó, ¿Jawe akiki mato yoyo ikai:
Noara moa xabakaatabo iki; jawetianbira mia non rabiwetsayamai iki mato ikai?
32 ¿Ainboki benonontian saweni jawen metsá
pené jakon, itan jan raotibaon shinanbenoti iki?
Jaskara ikenbira, nokon jonibo,
ikonbiresi eon shinanbenokana iki.
33 ¡Matora jaskaxon joni
nokoti onanshaman iki!
¡Matora jakonmanin axekanainko jato axeai ainbo iki!
34 Jawebiomabaon itan jakonma akamabaon
jimin akára maton chopa tishibires iki,
ja jonibaon jakonma akaira jawetianbi
rátereskin maton nokoama iki.
35 Ikaxbi jatíbi jaskara ikenbira maton yoiai:
‘Nonra jakonma akáma iki.
Diossa eki sinatama iki ixon’.
Jaskara ikenra, noara ochaama iki ixon maton yoiboresaitian,
jakonmaanoxon maton akábo en mato yoixonti iki.
36 ¿Jaweatiki jaskara ati maton shinanabo jenexon ishtonbires maton wetsa keska shinanna?
Asiriabaon mato akinyamani keskáakinra, Egiptobaon mato akintima iki.
37 Jatianra Egiptonkoniax kikinbiresi
rabina mato jakiribi joti iki,
jaskara ikenra ja mato jaki koshiaibaon ea keenyamaa iki,
jatianra jabetan ixon jawekopíbi maton bitima iki”, akin.