ISAÍAS
Jaskara iká itan jaskara rama iti Isaíassen wishaa kirika
Judáinoa, ochares jonibo
1
Isaías, Amóssen bakenra, Judá betan Jerusalén, rama jaskara wínoti kaai joi, namá keska meranxon bia iki, ja Uzías, Jotam, Acaz, jainoax Ezequías, jabo Judáin apo ikánontian iká iki.2 Naikan ikábaon, itan main ikábaon, ninkakanwe
Ibora neskatai:
“Bakebora aniai kaman en koirana iki, ikaxbira
jakonmai eki yoitimakana iki.
3 Waka benenra jawen ibo onanke, jawen ibon
yoina kenera burron onanke; ikaxbi ja nokon joni Israelbaonra,
ea onanyamakanai, itan ninkáyamarakanai”, ikira ikai.
4 ¡Jawe iresai, ochares jonibó,
jakonma bochoya jonibó,
jakonma akaibaon chiní bakebó,
jakonma onanxonbi akí axeabaon bakebó!
Iboibakeaxa ochókana iki;
Israelnin Jakon Dios jeneaxa,
matonbiribi mato iká iki.
5 Matora ikonbiresi yoitimai,
mato masá tenemakin
jain maton yora isinhatira moa yamake.
Jatíbi maton mapora xatébires iki,
jatíbi maton koshira moa keyóke.
6 Tae rebonkoniaxbi maton mapónko senenra, mato isinai iki;
jatíbira xatébires, chakáabires,
peké chopetabo iki;
tsonbira raonxon chopan neaama iki,
chexá tantinon ixonra tsonbi xenin sikaama iki.
7 Jatíbi maton maira, jain jawebi xoxoyamai jawebioma banéke,
maton jemabora chiikan aká tiritai.
Mato bebonbira maton yoá banaabo
maton rawíbaon piai.
Jatíbi keyotara moa jain jawebi xoxoyamai mai baneke,
ja Sodoma keyota iní keskaribi.
8 Jerusalén bichoresa banéke,
uva wai napo jabicho pei xobo yakata keská,
melón wai napo jabicho peota yakata keskára banéke,
ja jemabichora rawíbaon katea iki.
9 Jatíbi atipana Ibon noa jawetires
texeayamaara, ramashokobi
Sodoma betan Gomorra iní keska noa ikeanke.
Jaskáakinshaman Dios rabiti
10 Sodoma joni koshibó,
Ibon joi ninkakanwe;
Gomorra jemamea jonibó,
non Diossen mato onanmaitian akonkin ninkakanwe.
11 Ibora ikai neskati:
“¿Jaweatiki ichaira yoinabo ea menikin menoti maton beai?
Carnerobo maton jatiobi ea menoxonaitonra ea moa jatsanke,
waka bakebaon xenibaonribira ea moa jatsanke;
ja waka bene bakebaon jimiki,
ja carnero bakebaon jimiki,
ja cabra bakebaon jimikira ea kerasai.
12 Matora ebebon joai, ikaxbi,
¿Tsonki ja nokon xobo chité meranoa jema xabáin jikiti mato yoia?
13 Ea menikin, iresabires jawékibo moa beyamakanwe;
jabo maton menoa koinra en moa teneyamai.
Oxe bená iketian, itan tantiti nete iketian,
ja mekei tsinkítira maton jonibo kenai,
ikaxbi jonibaon jakonmaakin
fiesta akaibora en teneti atipanyamake.
14 Ja oxe bená iketian maton fiesta akaibo,
itan ja maton tsinkíti akaibora en omisai;
¡Matonra ea kikinhakin tsokasmai,
enra moa teneyamai!
15 Orankin bochiki maton meken,
sananaitianra, en mato oinyamai;
ichaakin maton orannaibira en ninkáyamai.
Maton mekenbora maton jato retea jimin aká kerás iki.
16 ¡Chokíkanwe, kerásma ikanwe!
¡Maton jakonmabo ea oinmayamakanwe!
¡Jakonma akin moa jenekanwe!
17 ¡Jakon akí axekanwe,
koshixon ja atikeskabiakin jakon akanwe,
ja masá tenemakanai akinkanwe,
kachianabo atikeskabiakin jakonhakanwe,
benomaata jaskara axonti iketian, jaon paranan ikin axonkanwe!” iki.
18 Ibora ikai:
“Neri bekanwe, nato jawéki yoyo ixon non benxoanon.
Maton ochabo kikin joshin keska ikenbira,
waxmen keska joxo en imati iki;
amikan pokoa keská ikenbira,
waxmen keska joxo en imati iki.
19 Yoiti itin keenxonra,
ja main banaa ikai kikin jakon yoabo maton piti iki;
20 ikaxbi yoitimai jenékashamaaxa,
reteanantiainoax mato mawáti iki”.
Ibonbira jaskara yoike, iki.
Jerusalén jema Ibon jakon imaa
21 ¡Jerusalén, jawekeskatiki jakon ikín akonkin senenhai ikaxbi,
tsini ainbo keská mia baneta!
Moatianra min jonibo atikeskabiakin
jakon akí pontéshamanres jakátikanai,
ikaxbi ramara retemisbores jake.
22 Plata keskara mato iká iki,
ikaxbira kerás manish tsamata keská mato baneta iki,
jakon uva jene xeati keskára mato iká iki,
ikaxbira onpax keskares,
mato baneta iki.
23 Maton joni koshibora kikin yoitimabo,
itan jakonma yometsobo betan raenanaibo iki.
Jatíxonbira, jansoxonti kopí koriki
menikana bireskanai, itan
jawékibo menireskanon ixonra benakanai.
Kachianabora atikeskabiakin jakonhayamakanai,
benomaata ixon biti jawekibora,
jato oinxonyamakanai.
24 Jaskara kopíra,
jatíbi atipana Ibo, Israelnin Koshi ikai neskati:
“¡Jainresa moa iti iki! Enra jaton akábo, ja nokon rawíbo yoipakexonti jake.
Enra ja akana kopí jato masá tenemai.
25 Mia akinra jakiribi nokon meken en sananti iki,
itan jatíbi min manish kerás tsamatara en keyokin menoti iki;
jatíbi ja min kerása en mia soaxonai.
26 Moa ikátiai keská juezboya itira jakiribi en mato imai, itan
ja peokooti ikáni keská, jan
mato eseti joniboyara en mato imai.
Jaskarabo en moa aká pekáora,
jakiribi mato janekanti iki,
‘Atikeskabiakin jakon akai Jema’, ‘akonkin senenhai Jema’, akin.
27 Atikeskabiakin en akaiton,
itan jaskatax xabakaati en akaitonra, Jerusalénhainoa jonibo, eki jakiribi banékantiakin en jato imati iki;
28 ikaxbi enra jato beshéati iki ja yoitimabo,
itan ja ocharesbo, jatian ja
eon keenyamakin ea potabainabora mawákanti iki.
29 Ja mato ikonbiresi jan keenai encina jiwi, itan
ja joa waikira mato rabinti iki,
jainxon ja atimabo rabiai ikáx.
30 Encina jiwi pei siwata keská, itan
ja joa wai onpaxen shoo
akama keskára mato iti iki.
31 Ja koshi jonira, arroz xaka choshi keska baneti iki,
jan teexon aká jawékibo
betanbira menóti iki,
ja rabébira jatianbicho menoti tiríti iki,
jatianra tsoabi jan nokaati yamati iki”, Ikira Ibo iká iki.