Dios shinanti itan raroti
12
Rama mia bake ranonpari ixon Jan mia jonia shinanwe, ja atikoma netebora nokotamapari iki; ja baritiabo nokóketianra mia iti iki: “Ja baritia winotaibaonra jan raroi ea jati jawe jakonbi ea bexonyamai”.2 Jan mia jonia rama shinanwe, bari, oxe itan wishtinbaon tenaa nokaamatianbi, jainoax oi bea pekáo nai koinbo japariketian shinanwe.
3 Netera nokoti kaai, jatian ani xobo koiranaibo saki ikanti, jatian koshi jonibo moa beotabo ikanti; jan renekanai reneti texeabora ichamashoko iti iki, jatianra moa renekantima iki; ja ventananin oinnaibaon, oinnabira moa jishtimai peokooti iki.
4 Ja nete nokóketianra, ja calleori kati xepótibo moa xepóti iki; ja reneti ikaibora ninkátimai moa keyópaketi iki; isábo keotaira moa ninkátima iti iki, bewakanaibora moa ninkátima iti iki;
5 manan keyáki rakétira iti iki, jainoax bain katira onsá iti iki.
Almendro jiwira moa joai peokooti iki,
chanponra jawen iwenbi mia paxkinmati iki,
alcaparra jiwin moa yorantinin keenmayamai keskatira, jonin kénbo moa yamati iki.
Jonira jatíbitian jawen jain itinko kaai, ja mawáketian callemeax winikanaira ninkákanti iki.
6 Ja plata cadena tesetamatianbi, ja oro kentí toeti beshetamatianbi jan mia jonia shinanwe; ja wean kexakeax chomo toeti beshetamatianbi, pozonko jan risbí pania mayatai toró beshetamatianbi ramabi shinanwe.
7 Ja nete nokoketianra min yora jakiribi mai poto baneti iki, moa ikátiai keskáribi, jatianra kaya Diossiba kaai, jan menia iketian.
8 Ea, joi yoiai joninra, jakiribi yoiai:
¡Iresabires riki, iresabires riki!
¡Jatíbira iresabires iki!