11
Min jawékiati jenenko potaara;jawetio basi pekáo min nokoribiti iki.
2 Mia jayata jawéki min atipana
senen yoashiamakin jato meniwe,
nato neten jakonma nokotaira min onanyamake.
3 Nai koin kextó ikaxa,
nato main oi maannai.
Norteori iamax surhori jiwi poxotara,
ja ikainbi banéti iki.
4 Ja niweres oinnaitoninra,
banayamai,
jainoax ja nai koinres oinnaitoninra,
ja baná bimibo tsekayamai.
5 Ja jain niwe boai min onanyamaa keskaakinra, jawen titan poko meranoax bake jaskatax joniai min onanyamake, jaskáribiakinra jatíbi jawéki jonia Diossen akai min onanyamake.
6 Berobo yamékiri banawe, jainxon yantánribi banawe, jawetianbira jaweratoki jakonni ikai ixon non onanyamake, ja non reken banaaki jakonni ikai iamax ja non japekáo akáki jakonni ikai, iamax ja rabébiki bebon jakon ikai ixonra non onanyamake.