PROVERBIOS
Onan shinan yoii iká kirika
Jakonhakin yoia joibo
1
Ja Israelhainoa apo, Davidkan bake Salomónman yoia joibo,2 jaskara kopí akára neskara iki:
onan itan jan axeti joibo jato onanmati kopí yoiabo,
itan jaskati ikáshamanbo yoia joibo,
onankanon ixon jato akinti kopí yoiabo,
3 jan axeti shinan biti, jakon katóti onan shinanya iti,
atikeskabiakin akai iti, ponté iti itan teneti onan iti;
4 bakeranonbo onan shinan maxkata iketian bimati,
jainoax onan imati itan moa ninkata jawéki kikinhakin shinanti jato onanmati.
5 Jaweratonki onan ixon ninkatai jara bebon onan ikai, itan ishton jaweki onannaitoninra, jatiankaya atibires iki,
jainxon bebonbires shinan onanboai,
6 jaskáaxon onanbaon yoiai joibo ninkáti kopí,
joibo onanti kopí, jainxon onantiakin yoia itan
yoikanabo shinanmanres onanti iketian.
7 Ja onan shinanya itira peokootai; ja non
Ibon jakon ixonti yoia keská ikainkoniax,
ja onanmabaonra onan shinan betan jan axeti joibo iresabires akin shinannai.
Bakeranonbo jaskáakin eseti
8 Salomónmanra yoia iki:
Nokon baké, ja min papán mia jaskára iti axeaibo ninkáxonwe,
itan ja min titan, mia jaskára iti axeaibo jeneyamawe,
9 jaskara ikaxa mina jan keenti metsati raoti iti
iki: teoti keská, itan kopí maiti keskára iti iki.
10 ¡Nokon baké! Ocharesaibaon mia parankasa,
¡Jato amayamawe!
11 Jawekeska ixon mia yoikanti iki: “Nobé, jowé akin;
jaskara atin noa keenai kopíres,
jakonma akáma ikenbi non retenon
ja joni joai kaman neno jonénon akanwe.
12 Mawá minti kini meran pakéketian, mawakan jato xeai keskáakinra,
jakon jonibo ikenbi non jato reteti iki.
13 Jatíbi meskó jawéki kopíara noa iti iki,
¡Jatíbi yometso jawékibaonra, non xobo bochoati iki!
14 Nobé iwé, itan min biabo noaribi meniwe,
non bia jawékibo itan min biaboyabi non meskonon”, akin.
15 ¡Ikaxbi jato betan kayamawe, nokon baké!
Jabaon jakonma akainko jato betan iamawe,
16 jabora ishtonbires jakonma jawéki akaibo iki;
¡Retemisi boira ishtonkanai!
17 Moa isábaon oinkenbira,
yankabires ja trampa akaibaon ponténkanai,
18 ja jonibora jatonbinix iti trampa pontenai keská iki,
jaskataxa jatonbinix onsá meran banékanai.
19 Jaskara riki ja bebonbires itin keenaibo:
bebonbires itin kenaitoninbira jato reteai.
Onan shinanman jato kenai
20 Callebo itan plazabo
ikainxonra, jonin akai keskáakin ja onan
shinanman jawen joi jato ninkámai;
21 xepótiainxonbora koshín yoixon, jawen joi jato ninkámai,
ja jainshaman jonibo jemameax tsinkitainkoxonra jato ninkámai:
22 “Shinan onanti maxkata bakeranonbo,
jakonmai shiroresaibo jainoax shinan maxkatabo,
¿Jawetian kamanki shinan maxkata iti maton noikin jeneai,
jakonmai shiroiki mato rarokasesai,
jaskákinki ja axeti maton iresabires shinannai?
23 Netékainxon ninkakanwe,
jakon inon ixon en mato notsinnai,
jatianra en onanna en mato axeati iki;
itan nokon iresama shinanra en mato yoiti iki.
24 Ninkati jonon ixon, en mato kenaabira,
maton ea ninkáyamaa iki.
25 Jaskákinra, nokon esébo maton omisa iki;
jakon inon ixon en notsinnara mato keenyamaa iki.
26 ¡Rabinti jawéki matoki nokóketianra en osánti iki!
Mato raketen mawataitianra, ea matoki shiroti iki,
27 jawetianki matoki rakéti jawékibo itan atikoma jawékibo,
jainoax jan manáti yamaax masá tenetibo joai,
itan jatíbi jawéki keyomis mayániwe keská joai.
28 Ja netepari maton ea kenaabira,
en mato jen atima iki;
itan ea benakinbira maton ea nokotima iki.
29 Jaskara ixonra onan shinan maton omisai,
itan Ibo rabitininra mato keenyamai.
30 Nokon esé bitinra mato keenyamai;
jakon iti en mato yoiabora maton iresabires shinannai.
31 ¡Ja mia iikirana jawékininbira mia masá tenemati iki!
¡Maton jakonma abea shinanbora ichabires iti iki!
32 Ja shinan onanti maxkatabora, jaton onanma shinanmanbi reteti iki,
ja onanmabora jakonhakin jatonbi shinanyamai kopí keyoti iki;
33 ikaxbi jaweratoki ea netékainxon ninkatai iki,
jara jakonbires jati iki, itan jaki rakéti onsá jawékibi yamati iki”.