Ibon imaa maibotiibi jakonshamanres jati
2
Nato riki Judá betan Jerusalén jaskara itibo yoia, namá keska meranxon, Amóssen bake, Isaíassen bia joibo:2 Ja senentiain iká netebaonra, Ibo rabiti xobo jain iká manan,
wetsa mananbo xewina keyá inoxiki,
jawen keyakanra jatíbi mananbo winonoxiki.
Ja wetsa main iká jonibora,
jatikaxbi jain bekanti iki;
3 icha jonibora jain nokotax
neskati yoyo ikanti iki:
“Neri bekanwe, Ibon mananman
mapénon akanwe,
ja Israelnin Dios rabiti xobo ikáinko,
jaskati jati jan noa axeanon ikax,
itan jaskati jati noa onanmanon ikax”, ikibo.
Ja Jerusalén mananmanxon, itan ja Jerusalén jemankoxonbira,
jawen esé noa Ibon onanmati iki.
4 Ibonra maibotiibi jaton ikábo, itan jatíbiainoa icha joni,
ja ramianani iikanaibo jato yoixonti iki.
Jaton espadabora jan mai karanbetiakanti iki,
jan chachimisti kenshobora moa hoz beneti iki.
Tsoa jemabira wetsa jema betan reteanankasi itima iki,
tsonbira jaskatax reteanantinin axeti, moa onantima iki.
5 ¡Bonon bokanwe, Israel jonibó,
Ibon joé meran ninon akanwe,
jaskara iti Ibon noa onanmaa keskati janon akanwe!