2 Ja ea yoyo akainbira, Diossen Shinan emeran jikixon, ea wenina iki. Jatianra ja yoyo ikai en ninkata iki,

3 jainxon ea yoiboresa iki: “Mia, jonira, israelitaboiba en mia raanai, ja jonibora yoitimabo ikax, en yoia akáshamai eki wenikana iki. Jabo itan jaton rekénbora nato nete kamánbi, eki wenitax ramitabo ikanai.

4 Jainoax jaton bakeboribi, jaton keena keskáres akaibo ikax, kikínbires ninkáismabo iki. Jaboibara en mia raanai, ‘neskárai Ibo akin’, min jato yoinon ixon.

5 Jawekeska ixonra mia ninkáxonkanti iki, iamax ayamaribakin, jaskara ikenra yoitimai jaa jonibo iki, ikaxbi westíora profetara jatoiba jake ixonra jabaon onanti iki.

6 Mia, joni, jatoki rakéyamawe, mia yoikanai joinbi, moxabaon itan jakonma xobibaon katea keskátonin shinanmeetibi, itan ninbo icha napo keskain jaaxbi jatoki rakéyamawe. Jainoax ja mia yoikanai joibo ninkataxbi rakéyamawe, itan ja mia omiskanabi ratéyamawe, kikínbires yoitimabo ikanainbi rakéyamawe.

7 Kikinbires yoitima ikanainbira, nokon joi min jato ninkámati iki, jawekeska ixonra mia ninkáxonkanti iki iamax ayamaribakanti iki.

8 Ja en mia yoia keskáakin jakonhakin awé, mia joni, wetsa israelitabo keskati yoitimayamawe. Janxbáwe, ja en mia meniai, min pinón”, akinbo.

9 Jatianra westíora meken, bichi xei wisháya eki meshkataitian en oinna iki.

10 Westíora mekenmanra, ebebonbi ja bichi xei chopea iki. Okenbekonbi wisháyara iká iki: jainra onísti, chexakaati itan ramíti onsá yoia iká iki.