2 Jatian ea janxbáketianra, bichi xei wisháya ea jan pimaa iki.

3 Japekáora ea yoia iki: “Rama nato bichi xei wishá en mia menia xeawe, jatianra mia jan potóti iki”, akin. Ja en piara, kikínbires mishkín keska bata iká iki.

4 Eara yoia iki: “Ja en mia yoia joiboribi kaxon, Israel jonibo yoitanwe.

5 Ja ninkáyamai join yoyo ikanainkora en mia raanyamai, iamax onantikoma join yoyo ikanainko, jaskáayamakinra Israel joniboiba en mia raanai.

6 Ja maibotiibi icha joni ikainra en mia raanyamai, onantima itan atikoma join ikanainko. Mia ikonhakanti ikenbira ja joniboiba en mia raanyamai.

7 Ikaxbi, ja en yoia keskati ikáshamai kopíra, Israel jonibaon mia ninkákantima iki. Jatíbi Israel jonibora jaton keena keskáres akaibo iki, itan kikínbires ninkáismabo ikanai.

8 Jaskara ikenra enbi, mia jato keskaribi imai, tsonbi yoitinin keenma itan min keena keskáres akai.

9 Diamante makan keská chorisha en mia imai, makánbi winoa chorish. Kikinbires yoitima jonibo ixon mia omiskanabi, jatoki rakéyamawe, ratéyamaribiwe”, akinbo.

10 Japekáora ea yoia iki: “Jatíbi en mia yoiaibo netékainxon ninkáwe, itan shinanbenoyamawe.

11 Ja min kaibobo wetsanko bokanabo yoitanwe, abákanon mia ninkákin itan mia ayamabakanon. ‘Neskárai Ibo akin atanwe’ ”, akinbo.

12 Diossen Shinanman ea weninaitianribira, epekaokeax koshi riri ikai niwan keska en ninkata iki, jawen itinkoniaxa kikin koshi Ibo wenita iki.

13 Ja joni keska koshiai jawékibaon peibora, bianananbotani boí titi ikai en ninkata iki, jainoaxa ja toró tarametaibo jato betanbi ikax; ja riri ika ani niwannai keská iká iki.

14 Jainoara Diossen Shinanman weninxon ea pikoa, onísbires itan sinata ea kaa iki, jatianribira Ibon jawen mekenman ea akonbireskin yatana iká iki.

15 Jatianra kaax ea Tel Abibhain nokota iki, Quebar paro kexa, ja israelitabo yataanan boxon jamakana ikátiainko, jawe ati onanaxmabi itan jawe yoiti onanaxmabi, jainra jato betan kanchis nete senen ea baneta iki.

16 Moa kanchis nete senenketianra, Ibon ea yoia iki:

17 “Miara, Israel jonibo koirannai sontáro en mia imai. En mia yoiabora onankanon ixon, ja joiboribi, min jato yoiti iki.

18 Ea joi benxoakai ixon en yoiti iki, jakonma joni mawáti; en jaskákenbi, ja jakonma joni min esetima iki, min jakonma axé jeneaxa mia jati iki, akinbi min yoiamaara, jawen ocha kopi ja mawáti iki, jaskáketianra jaweati min mawámarin, akin en mia yokáti iki.

19 Ikaxbi ja jakonma joni min jaskáakin eseabi, jawen jakonma jawéki itan jawen jokonma axé jenekashamai, jara, jawen ocha kopibi mawáti iki, ikaxbi miara mawáyamai jaresti iki.

20 Jainoax, joni iribati iki, jakon jawékibo akinbi jenexon jakonma akin, jara moa mawáti onsáin en banémati iki; ikaxbi min eseyamaara mawáti iki. Ja jakon jawéki aabeara, en moa ointima iki, jara jawen ocha kopibi mawáti iki, ikaxbi jaweati min mawámarin akin en mia ati iki.

21 Jatian jaskáakin ocha ayamanon ixon, min eseara ja jonin moa ocha atima iki, jatianra min esé ninkatax ja joni japariti iki, itan miaribi mawáyamai jati iki”, akinbo.

22 Jainxonra Ibon, jawen mekenman tii axon ea yoia iki: “Wenítaanan mai teshanpain katanwe, jainxonra en mia yoyo aki kaai”, akin.

23 Jatianra ea wenitax mai teshanpain kaa iki, jainxonra Quebar paro kexaxon oinhantana keskáribiakin, en Ibon koshi oinna iki. Jatianra mainbi bekepinon kaman ea beota iki,

24 ikaxbi Diossen Shinan, emeran jikixon ea wenina iki. Jainxonra ea Ibon yoia iki: “Min xobonko kaax xepótanwe.

25 Oinwe, miara risbikan nexai bokanai, jaskákanara min jonibo betan ikasibi mia pikótima iki.

26 Jainxonra mia yoyo itima akin, min jana en jantaxnamemati iki. Ikonbires yoitimabo ikanainbira, min jato notsintima iki.

27 Ikaxbi jawe yoikaskinra, en mia jakiribi yoyo imati iki, jatianra min jato yoiti iki: ‘Neskárai Ibo akin’. Jaweratobaonki ninkákasai, jabaonra ninkáti iki, ikaxbi jaweratobaonki ninkákashamai, jabaonra ninkátima iki. Yoitima jonibo ixon”, akin.