2 “Joní, min kaibobo yoiwe: ‘En imaara wetsa mainmea jonibo betan reteanankanti iki, jatianra jainoa joni koshibaon westíora joni katóxon, jato koirannai sontáro imati iki.

3 Jatian jaton rawí sontárobo ja mai nokoi bei, ochómaitian oinxonra, jonibo benxokaanon ixon, jato koiranti imakana sontáronin jawen trompeta xoon ati iki.

4 Jaweratonki ja trompeta xoon ikai ninkáxonbi ikonhayamai, jatianra jaton rawibaon nokóxon reteti iki, ja mawatara janbix iká iti iki,

5 ja trompeta xoon ikai ninkáxonbi ikonhayamaa kopíra; janbix mawata iti iki, ja ninkáxon ikonhaxa mawáyamakeana iki.

6 Ikaxbi jato koirannai sontáronin, jaton rawí sontárobo nokoti beai oinxonbi, jonibo benxokaanon ixon trompeta xoon ayamaketianra, jaton rawibaon nokoxon jaweti joni reteti iki, jabora jaton ocha kopíbi mawáti iki, ikaxbi minra jato mawámake ixonra, jan jato koirankin oinnai en yokáti iki’.

7 Mia jonira, Israel jonibo jato koirannai iti en imaa iki. Minra nokon joi ninkaxon, en jaskátima yoia joiboribi min jato keshanti iki.

8 Jatian ja jakonma joni mawáti en yoiara iti iki; ikaxbi jawen iká jakon inon ixon min keshanabi iamaaxa, jawen ocha kopibi mawáti iki, ikaxbira jaweati min mawámarin ixon en mia yokáti iki.

9 Ikaxbi min, jaskáyamakin ja jakonma joni jawen iká jakon inon ixon, min keshanabi jeneyamaaxa, jawen ocha kopibi já mawáti iki, ikaxbira mia mawáyamai jati iki”, akinra aká iki.

10 Ibonra yoiribia iki: “Mia joninra, Israel jonibo yoiti iki: ‘Matora ikai neskati: Nonra ichabires jakonma itan ichabires ocha aká iki. Jakopira moa jakon jati non manayamai. ¿Jawekeskaxonki jaskara jati non chibanti iki?

11 Ikaxbi ea jiria Ibo jaxonra akonkin senenhati ixon yoiai, eara keenyamai jakonma jawéki aati joni mawátinin, ikaxbi jawen jakonma iká jenetaananra, jati iki. Israel, ja mia jakonmai jaa jenéwe. ¿Jawekopíki mato mawáti iki?’

12 Mia, jonin, min kaibobo yoiwe: ‘Iti iki westíora jakon joni ochai, ja moa abea jakon jawékininra mawáyamanon ixon jamatima iki, itan jakonma jonin ati iki, jakonma akin jenekin, já mawatara moa abea ocha kopi ikama iti iki. Iti iki jakon joni ochai, ja moa abea jakon aká kopi jayamaira mawáti iki.

13 Ja jakon joni janon ixon en yoiabi, jan jakon jawéki akaiki koshixon jakonma ati iki, jatianra ja moa jakon jawéki abeabo en oinna moa jakonma iti iki, janbi jakonma aká kopira mawáti iki.

14 Jakonma joni mawáti en yoia ikenbira, ocha jeneax jakoni, itan atikeskabiakin jakon ati iki,

15 itan ja ribínxon menikanabo jainxon jato yometsoabo banexonax, itan en menia esébo yoiti ixon senenhai, jainxon moa jakonma jawéki akin jeneaxa, ikontinixbi mawáyamai jati iki.

16 Jaskáakin rama, jakon akí itan atikeskabiakin jakon akíra jati iki, jatianra ja ocha akatiaibo westíorabi en moa shinantima iki’.

17 Min kaibobaonra atikeskabiakin en ayamai ea yoiai; ikaxbi jabaon atikeskabiakin ayamaikayara ikon iki.

18 Jaskara iken jakon jonin ati iki, jakon jawéki akin jenexon, jakonma akín, jakopira mawáti iki.

19 Itan ati iki, jakonma joninbiribi jakonma jenexon, jakon akin itan atikeskabiakin jakon akín, jaskara aká kopira jati iki.

20 Matonra yoiribiai: ‘Ibonra ja atikeskabiakin ayamake ixon’. Ikaxbi enra, mato israelitabo, westíoraxonbo maton aká keskáribiakin, en mato yoipaketi iki”, akinbo.

21 Ja noa yatanxon bokana chonka rabé baritia iketian, jawen chonka oxe itin itan pichika neteya iketian yaméra, westíora joni Jerusalénhainoax jabatax joxon ea yoia iki, ja jaton rawibaon moa jema bichinna.

22 Ja jabata joni eiba joamapari inontian yaméra, jaskara amanoxon Ibon jawen makenman ea tii aka iki, jatian yamékiri joni joketianra Ibon jakiribi yoyo ikai ea imaa iki, jatianra moa yoyo iosma ikí en jeneta iki.

23 Ibonra ea yoia iki:

24 “Nato Israel main iká jemabo ras akanainko jaa jonibora yoyo ikanai: ‘Abrahamra jabicho ikaxbi mai ibo baneta iki; jaskara ikenra noakaya icha ikax ibiresti iki’. Ikira ikana iki.

25 Jaskara iketian jato yoiwe: ‘Neskárai Ibo akin: Matonra nami jimiabi piai, matonra ja rabiti jawékibo axon rabiai, itan mato retemisbo iki, ¿Jatianki maton ikonhai, noara mai ibo iti iki ixon?

26 Matora jan amistiki chipóxon jato ishtonbires ramiaibo iki, en omisai jawékibora maton akai, itan awinyaribi ikaxbira, jatikaxbi mato teaananaibo iki, ¿Jatianki maton ikonhai, noara mai ibo iti iki ixon?’

27 Jainxon jato yoiribiwe: ‘Neskárai non Ibo akin: Ea, jiria Ibo ixonra akonkin senenhati ixon en yoiai, ja jemabo ras akanainko jaaboribira retekanti iki, itan xabain jaabora pimis yoinabaon piti iki, jainxon ja shanka xobo meran jaabo itan kini meran jaabora, isinbaon mawákanti iki.

28 Ja tsoa jonibi jain jaama maira ras ikares banéti iki, jainoax jaki koshiax kikinni rabíkanai jawékibora moa jainres keyóti iki. Israelhainoa mananbora tsoa jonibi jain jaama banéti iki; tsoabira jao winótima iki.

29 Jatian jabaon, ja en omisai ochabo aká kopíra, ja mai tsoa jonibi jain jaama itan janbisresa en jeneti iki, jatianra ea Ibo onankanti iki’.

30 Min kaibobora makan chiké pataxkeax itan xobo xepotiainoaxbo, mia yoii yoyo iki yoianankanti iki: ‘Neri bekanwe, Ibon noki joi raana non ninkánon iki’, ikanti iki.

31 Jaskati beaxa nokon jonibo, jaton axé keskati, mia yoyo ikaitian ninkati, mii bebon yakákanti iki. Ikaxbira, ja yoia keskati ikantima iki. Jakiribi en yoiara ainboki itinres bewakanti iki, ikaxbi ja akonkin shinan meran noikanara koriki iki.

32 Jabaonra mia oinnai westíora joni ainboki bewati onan keskáakinres, metsá jeeya itan arpa jakonhakin teenhati onan. Min joira ninkákanai, ikaxbira min yoia keská jayamakanai.

33 Jaskara ikenra, jatíbi jábo seneni kaai, itan jaskati senenketianra, jabaon nobetanra westíora profeta iká iki ixon, shinankanti iki”, ikira iká iki.