2 “Mia jonin, nokon janenko ja Israel pastorboki ea ramitai yoiwe: Neskárai Ibo akin: ¡Jawe ireskiai, ja jatonbinix koiranmeetai Israel pastorbo! Ja pastorbaonkayara carnerobo koiranti iki.

3 Matonra leche xeai, chopa akinbora maton lanaya akai, jainxonra carnero awin xoashamanbo maton reteai, ikaxbira ja carnerobo maton koiranyamai.

4 Ja carnero yosmashokobora maton akinyamai, isinaibora maton raonyamai, jaton tae xatéra maton neaxonyamai, wetsaori kainbira maton biamai, manókenbira maton benayamai, jaskáatitianbira maton akonbireskin rishkikin itan ramiaresai.

5 Jaskati pastorhoma ikaxa, nokon carnerobo, jatíbiain janbisai, jaskáketianra siná yoinabaon piai.

6 Jatíbi mananbotiibi itan mai keyábaonra janbisa iki, jatíbi maibo ikainra wetsaori bokanai, itan tsonbira jatoakin shinanyamaa iki, jainxon benayamaa iki.

7 ‘Jaskara iken pastorbo, jakonhakin nokon joi ninkakanwe.

8 Ea, jiria Ibonra akonkin senenhati ixon en yoiai: Nokon carnerobora pastorhoma iketian meskó siná yoinabaon yatanxon ea pikin keyonankanai. Ja nokon pastorbora, carnerobo benaibi boyamakanai. Ja pastorbora carnerobo koiranyamai jatonbinix koiranmeetaibores iki.

9 Jaskara ixon pastorbo, nokon joi ninkakanwe,

10 ea Ibo ixonra mato yoiai: Eara maton rawí iki ixonra, en mato onanmai, nokon carnerobo kopí matoki ramíkinra en mato akai; enra nokon carnerobo moa mato koiranmayamai, moa maton koiranwetsayamanon ixonra, nokon carnerobo kopi kopíaxon en moa jakiribi biti iki, moa maton piboresyamanon ixon’.

11 Ea, Ibonra yoia iki: Ramara enbix, ea nokon carnerobo koirannai ikai.

12 Pastornin jawen carnerobo janbisketian, akonbireskin shinanai keskáribiakinra, enribi nokon carnerobo akonbireskin shinanti iki; ja wetsa nete niweaba bei yaméketian, janbisax beyamai jainbi banetabora jato kopi kopíaxon en jakiribi biti iki.

13 Wetsa mainmeabo pikoxon tsinkixonra, en jaton mainbiribi boti iki. Israel mananmamea pastobo pimanoxon, jainxon wean ikainboribi, itan jatíbiain ja joni jaainkobo.

14 Ja Israelhain manan keyábo ikainko, jakon pastoshamanbo pimanoxonra, en jato boti iki. Jainra jakon pastoshamanbo piax, tantikanti iki.

15 Eabi, nokon carnerobaon pastor ixonra, jato tantimanoxon en boti iki. Ea, Ibonra ponté yoiai.

16 Ja manota carnerobora en benati iki, ja wetsaori boabora en jato beti iki, ja tae xatéyabora en jato neaxonti iki, ja yosmabora en jato akinti iki, jainxon awin xoashamanbo betan koshibora en jato koiranti iki. Ja atikeskabiakinra en jato koiranti iki.

17 Ea, Ibonra yoiai: Ninkakanwe, nokon carnerobó: Juezsen ati keskaakinra, en mato akai ja carnero beneshokobo wetsaori axon itan cabra beneshokobo wetsaori axon akin.

18 ¿Jakon pasto piaxbiki mato tantiamai, jaskákinki ja texeabo maton jamatai? Itan matonra onpax bexnanshaman xeai, jaskáribaxonbira maton taen potaai.

19 Ja maton jamáyona pastora, nokon carnerobaon piti iki itan ja maton potáayona onpaxa xeakanti iki.

20 Jaskara kopíra ea jatíbi atipana Ibon, mato yoiai: Enbira mato yoipakeai atikeskabiakin, carnero awin xoábo wetsaori axon itan oshibo axon akai keskaakin.

21 Ja yosmashoko carnerobora maton weranmanbires ochóa iki, itan machamanbires jakonmakin werankinra, maton jabámaa iki.

22 Ikaxbi enra nokon carnerobo jakiribi biai. En amayamaara moa maton yatanborestima iki. Atikeskaakinra, ja carnerobo en akai.

23 Nokon yonoti David-ra, en jakiribi banémai, janra westíora pastorbicho keská ixon, nokon carnerobo koiranti iki. Itan jara jaton pastor iti iki.

24 Ea, Ibora, jaton Dios iti iki, itan nokon yonoti David-ra jaton koshi iti iki. Ea, Ibora, jaskati yoyo ike.

25 Jabo betanra jaskara senenhabekonti joi en akai, jawe iamai ikoni jakon mato inon ixon. Siná yoinabo ja mainmea potaxonra, nokon carnerobo xabábires ikain jakonshaman ikanon ixon en ati iki itan manish meran oxakanon ixon.

26 Ja nokon manan katemakinra, en jato jamati iki, jainxonra en jato jakonhakin shinanti iki; ja ititianbora en jatoki jakon oi bemati iki.

27 Ja xabáinoa yobinbora bimiti iki, jatian ja mainmea tsekakanti iki, jaskataxa jaton mainbiribi jaabo jakonbires jakanti iki. Jawetianki nokon jonibo, ja yanka yonokin bokanainoa en jato pikoai, jatianra ea Ibo onankanti iki.

28 Wetsa mainmea jonibaonra, jabo moa jakiribi iboakantima iki, siná yoinabaonra moa jakiribi jato pitima iki. Jatianra moa tsonbi rateyamaa jakonbires jakanti iki.

29 Ja banábora ikonbiresi xoxoti iki, jatianra jabaon moa jakiribi jawékiatinin ikin, masá tenetima iki, wetsa mainmea jonibora moa jakiribi jatoki shirotima iki.

30 Jatianra ea jaton Ibo Dios, jato betan iketian ea onankanti iki, jainxonra Israelbo nokon joniboribi onankanti iki. Ea, Ibonra, ponté yoiai.

31 Mato nokon carnero tsamabora xabaa ikáinoa iki. Eara maton Dios iki. Ea, Ibonra, ponté yoiai”, akinra ea aká iki.