Chosko ani yoina namá meran oinna
7
Wetsa nete, Belsasar, Babiloniain apo iká reken baritia iketianra, Danielnin namá meran meskó jawékibo oinna iki. Ja oxá jishtenatianbira ja namata ikonshaman jawékibo kirika meran wishaa iki. Ja wishaara neskara iká iki:2 “En namá meran oinnara chosko niwe koshi bexon xoon akatonin aniparo jene bechona iki.
3 Jaskataibira ishtonbires, chosko ani onsá yoina, jaskábiresma wetsaresibibo, aniparo meranoax pikota iki.
4 Ja rekenara león jisá iká iki, ikaxbira jawen peí tetekana keská iká iki. Ja en oinnaitianra jawen pei tsekankana iki, mainmea wakexonra, jawen chinita taebaonbicho nichinkana iki, jaskaakanara joni jawen taén nia keská iká iki, jatianra jawen manapo moa jonina baneta iki.
5 Japekáo iká ani yoina oso jisára, benkex jawen pishpachi wetsaorikea xewina keyá iká iki, jawen xeta xaran kimisha pishia, jatianra neskaakin yoikanai en ninkata iki: ‘¡Moa katanwe, min atipana kaman jatíbi pitanwe!’ Akin akanai.
6 Jawen kimisha itin iká ani yoinara, ani ino leopardo jisá iká iki, ikaxbira jawen pekáin chosko peia; itan chosko mapoyaribi iká iki, jara jato ikinon ixon koshi menia iki.
7 Jawen chosko itin iká yoina namá meran en oinnara siná onsá itan kikinbires koshi iká iki. Jawen ani xetabo yamibires, jatíbi jawéki pikinra beshéa iki, ja texeabora jamákin payoa iki. Jatíbi wetsa yoinabo en namá meran oinna keskáma, wetsaresibi ani yoina jawen maponko chonka machanyara iká iki.
8 Ja machanbo oinni iikin, en oinnara wetsa machan maxkocha pikota iki, jatianra ja kimisha machan tsekakana iki, ja senentiainbi pikota machan xabá meniti kopíra akana iki, jawen berora jonina keskábo ikax, kikinni rabiti jawen kexakan ani jawékibo yoyo ika iki.
Jato jaskara ati Diossen shinanna
9 Enra oinkin jeneyamaa iki, koshibaon
jakon yakátibo yasánkanai kamanra en oinna iki,
jatianra westíora Yosi ja wetsa yakátinin yakata
iki. Jawen sawea chopa waxmen keská kikin
joxo, itan jawen boo xopó chopa
keská joxo iká iki. Jawen yakáti itan jan
tarameetai jawen taebora chiibires iká iki,
10 jainoax já bebon pikota westíora parora chiibiresibi iká iki. Já akinnaibora warankabaon waranka itan, já bebon niabora millónbaon millón iká iki. Jato joi benxoaxonai jonibora moa yoyo iki peokokana iki, jatianra jain jaton jaskara akábo wishaa kirikabo chopekana iki.
11 En oinna, ja maxkocha machan rabiti yoyo ikaitian ninkákaskinra en oinkin jeneyamaa iki, jatian en oinni iitaitianra ja ani yoina retéxon itan beshéaxon, menónon ixon chii tiritai meran potakana iki.
12 Ja wetsa ani yoinaboribira moa koshi bichinkana iki, ikaxbira jatian ati senenai kaman jato jamaparikana iki.
13 Yaméra namá meran oinkin en tekiboresa iki. Ishtonbiresa ikanwana iki:
Joni bake jisábi nai koinman joáira en oinna iki,
jara ja Yosi joni ikain kaketian;
já patax imakana iki.
14 Jatianra joni koshi menixon,
ani itan jakon apo imaa iki,
jatianra jatíbi maibotiibi iká jonibaon,
itan jatíbi meskó joiabaon yoiti ixon jawen joi ninkáxonkanti iki.
Jato ikinnai koshi ikára jatíbitian jaskábires iki,
ja ikinnai apo ikára jawetianbi keyótima iki.
15 Ea, Danielra, kikinni raketa iki; jatianra jatíbi en oinnabo jaakinres en shinanna iki,
16 ja charokanainoara westíora joni pataxon en yokata iki, jatíbi ja ikábo onantiakin ea yoinon ixonra en yokata iki. Ea yoitininra keena iki, jatianra ea neskáakin yoia iki:
17 ‘Nato chosko onsá yoinabora, ja nato neten jaton koshi iti chosko apobo iki.
18 Ikaxbi japekáora koshi Diossen, jonibo koshi ixon, jato ikinti imati iki, jaskara ikanara jatíbitianbires iti iki’.
19 Jawen chosko itin iká, onsá yoinaki jawe yoii iká iki ixonra kikinhakin en onankasa iki, ja wetsabo keskáma kikinshaman wetsaresibi iketian, jawen jisá ikonshaman jaki rakétibires: jawen xetabo yamibires, jawen mentsisbo bronce yamibires; jatíbira natexa iki itan beshéa iki, jainoax ja texeabora jamákin payoa iki.
20 Ja jawen chonka machanki jawe yoii iká iki ixonra en onankasibaa iki, jainoax ja maxko machan beroya itan kexaya ikax rabiti jakonmabiresi yoyo ikaki, jawe yoii iká iki ixonra en onankasa iki, jara ani machanbo xewina koshi iká iki, jatianra já xabá meniti kopí kimisha machan paketa iki.
21 Jainxon en oinnara ja machanman Diossen jonibo betan reteanankin, jatoaresa iki,
22 jatianra ja Yosi jatoki nokotai kaman, ja koshi Diossen jonibo atikeskabiakin jato akinna iki, jaskataxa ja Diossen jonibo, jatian apo ixon jato ikinti moa senena iki.
23 Jatianra yoia iki:
‘Ja chosko itin iká onsá yoinara nato main
ja chosko itin iká apo iti iki,
jatíribibo keskáma wetsaresibira iti iki.
Jatíbi nato mainmeabora keyokin jato piti iki,
jatora beshéakin jamáti iki.
24 Ja chonka machanra
nato main ja chonka apo itibo iki.
Jabo iká pekáora wetsa koshi apo jato ikinnai iti iki,
ja reken ikábo keskáma wetsaresibi,
jaskara ixonra ja kimisha apo
moa jato naman paketi iki.
25 Koshi Dioskira jakonmai yoyo iti iki, jainxonra
jawen jonibo jato keyo keyobainti iki, ja
Diossen jaskara ati yoia esébo, itan jaskáakin fiesta
axontibora moa wetsakeska iti iki, jatianra ja
Diossen jonibo jawen keena keskáres
jato ati iki, kimisha baritia wetsa naponbekonra
jato jaskáati iki.
26 Ikaxbira ja joi benxoaibaon
jawen koshi bichinxon,
kikin jatíbi ras akanti iki.
27 Jatianra apobo ixon jato ikinkanti iki,
jato ikinti atipana koshiaxon,
itan jakonhakin jonibaon jato oinkanara iti iki,
jatíbi maibotiibi nato mainmea jato ikintira, Diossen jonibo menia iti iki.
Ja apo ikára jatíbitian iti iki,
jatianra jatíbi nato mainmea jemabaon
axonti iki, itan yoiti ixonkanti iki’, akin.
28 Neskatira senennai ja en yoia joi. Jatianra ea, Daniel, ja en oinna jawékibo jaakinres shinanni raketi ea pasnata iki, ixonbira ja en oinna jawékibo tsoabi jawebi en jato yoiamaa iki”.