2 Jainoax Ben-hinom teshanpain katanwe, Tiestos Xepóti iká bekeiba, jainxon ja en mia yoiai joi yoitanwe.

3 Neskáakin jato yoiwe: ‘Judá apobó itan Jerusalénhain jaa jonibó, natora jatíbi atipana Ibo, Israelbaon Diossen joi iki, ninkakanwe: Enra matoki anibires onsá jawéki raanai, jatíbi jan nato joi ninkatabora ikonbiresi rakékanti iki.

4 Ea potabainxonra, israelitabaon nato mai iresabires imakana iki; jainxonra ja ikonma diosbo incienso inínti menoxonkana iki, jatonbi itan jaton reken papabaonbi, jainxon ja Judá apobaonbi onannama, jainra jawe jakonma akáma jonibo retekana icha jimi iká iki.

5 Jainxonribira, jainxon jawéki menotibo axon, ja dios Baal axonkin, jaton bakebo jatiobi keyokin menokana iki, ja jawékira iká iki en jato ati yoiama, jara nokon shinan meran yamabobi iká iki.

6 Ninkakanwe, jaskara ikenra netebo nokoti kaai nato main jane moa Tófet itima, Ben-hinom teshanpa ikáribira itima iki, jainxon jato retekanai teshanpa ikákayara jawen jane iti iki. Ea, Ibonra onantiakin yoike.

7 Nenonxonra ja Jerusalén jonibo, itan Judáinoa jonibaon jaskara ati shinannabo en ras ati iki. Jaton rawíbo, en amaara jatoareskanti iki, jaskáaxonra jato retekanti iki, jatianra tetébaon, itan siná yoinabaon jaton yora piti iki.

8 Ja jemara tsoa jonibi jain jaama itiakin en imai, ja oinnax rakékantibires. Jatíbi jain winotaibora akonbireskin ras akana oinnax ratetax, rakékanti iki.

9 En amaara jaton bake benbobo itan jaton bake ainbobo pikanti iki, jatianra jato retenoxon jaton rawibaon ja jema katekanketian pitin iki jatonbinix piananankanti iki’.

10 Jaskara yoia pekáo, ja mibé iká jonibo bebonxon ja chomo beshéakin toewe,

11 jainxon jato yoiwe: ‘Jatíbi atipana Ibonra neskara yoia iki: Nato jonibo itan nato jemara, en besheati iki, mapó chomo beshéaka moa jakiribi jakonhatikoma ikai keskáakin. Jatian icha mawákanketianra jain jato miinti moa yamaketian, jonibaon jaton mawábo Tófet-iain jato miinti iki.

12 Ja jema betanbira jawen jonibo en jaskáati iti iki. Tófet keskáshamanribira ja jema en imati iki. Ea, Ibonra onantiakin yoike.

13 Ja Jerusalén xobobo, ja Judáinoa apobaon jain apo iká xobobo, jatíbi joétai wishtinbo jainxon incienso ininti menoxonkatikanai xobo pekábo itan jaton diosbo menikin uva xeati chikokatikanaibora, Tófet keskáribi moa kerás iti iki’ ”, akin.

14 Jaskara aká pekáora, Jeremías Tófethainoax karíbaa iki, jawen janenko yoyo iti Ibon jain raanainra kaa iki, jatianra Ibon xobon jikitiain chankáxon, jatíbi jonibo jato yoia iki:

15 “Ja jatíbi atipana Ibo, Israelbaon Diossa neskatai: ‘Nato jema itan jatíbi maxko jemankobora, jatíbi jaskaraton masá teneti en yoiabo en raanai, nokon joibo ninkákashamakin jaton keena keskáres akana iketian, ikira ikai’ ”, akin jato aká iki.