Jeremíasnin rawí Pashur jaskara winóti yoia
20
Jatianra Pashur, ja Imernin bake, sacerdote itan Ibo rabiti xobo koiranaibaon koshi ixon, Jeremíasnin ikamatianbi nato joi yoiaitian ninkáxon,2 rishkionxon, cepo meran jawen tae ati jato yoia iki. Ja Benjamínman Bochikia Xepóti ikain, ja Ibo rabiti xobo pataxbi.
3 Westíora nete pekáora ja ceponkonia moa Jeremías jato pikomaa iki, jatianra Jeremíasnin Pashur yoia iki: “Min jane Pashur ikenbira, Ibon wetsa jane mia ake, min janera Magor-misabib iki.
4 Jaskara ikenra Ibon yoiai: ‘Minbix, itan mibé raenanaibaona jaki rakéti onsára en mia imai; min oinnonbira mibé raenanaibo reteanantiainxon min rawibaon jato retekanti iki. Jatíbi Judáin jaa jonibora Babilonia apo, itan jawen sontárobo en jato meniti iki, janra yatanxon Babiloniain boxon chichikanin chachixon jato reteti iki.
5 Jainxonribira nato jemamea jaton icha jakon jawékibo jaton rawíbo en meniti iki, jatíbi jato jayata itan jaton kopí jawékibora en jato meniti iki, jainoax Babiloniain bokanon ixonra, Judáinoa apobaon jatíbi kikin kopí jawékibo en jato meniti iki.
6 Jatian mia, Pashur, jatíbi min kikin rarebobo betanbira yatanxon Babiloniain mia bokanti iki. Jainoaxa mia mawáti iki, jainra mia itan jatíbi mibé raenanaibo jansoakin jaskara itibo min jato yoikatitaibo betanbi mia miinkanti iki’ ”, ikira iká iki.
Chexakaakin Jeremíasnin Ibo keshana
7 Ibó, minra ea parana iki,
jatianra enbi mia paranmaa iki,
miara ebebonbires koshi iká iki,
jaskákinra min eaaresa iki.
Jatíbitianra ea oinxon osankanai;
jatikaxbira eki shirokanai.
8 Ea yoyo ikaitiibira jakonma iti, itan keyóti joibores en yoai;
jaskaraira min joi yoiai kopíra,
jeneyamakin ea jakonmakin yoikanai,
itan eki shirokanai.
9 Wetsatianra ea ikai: “Moara en Ibo shinanyamai,
jawen janenkora jakiribi ea moa yoyo imai” iki.
Ea jaskataitianra ja emeran iká min joi, keyomis chii tiri keská ikai,
xao kamanbira ea menoai.
Moa en yoikashamaabira jenetikoma iki.
10 Jakomanin yoinmis jonibo
joikanaira en ninkatai:
“¡Jatíbiainra jaki rakéti onsá jake!”
Neskatira yoyo ikanai: “¡Neri bekanwe, jakonma akátonin yoinnon akanwe!” ikibo.
Nokon ebé raenanaibora
en jakonma atin manákanai.
Neskatira yoyo ikanai:
“Paranxonra non abirati iki, nonhareskin;
jatianra kopikin já non ramiati iki”, ikira iká iki.
11 Ikaxbi Ibó, miara
ebetan iki, ja reteanannai joni
tsonbi jaarestima keská;
ea ramianoxon chibanaibora pakékanti iki,
itan eareskantima iki;
jaton keena ayamaaxa, rabinkanti iki,
ja jakonma ikanara, jawetianbi
shinanbenotima iti iki.
12 Jatíbi atipana Ibó,
miara atikeskabiakin onanmis iki,
jonin kikin chichokea shinanbira min oinnai,
jaskáakin ja jonibo jato masá tenemati ea onanmawe,
jaskara ikenra akanaketian ea miki koshiai.
13 ¡Iboki bewakanwe, Ibo rabikanwe!
Janra ja jakonmabaon mekenmamea, ja paxkinnabo jato xabaai.
14 ¡Jan ea pikóni netera jakonma iká iki!
¡Ea pikoi nokon tita bakenna nete jakonma ibanon!
15 ¡Jawen benbo bake pikota joi boxon jan nokon papa raromaa jonira jakonma iti iki!
16 ¡Jatíbitian yamatiakin Diossen jemabo ras aka keská, ja joni ibanon!
¡Chexakati saí ikanai yamékiri ninkabanón,
ja reteananti keshai ikaira bariapan iti iki,
17 jaskara ikenra nokon titan chixana meranoa ea Diossen mawámayamaa iki!
Jaskara ikaxa nokon tita ikeanke ea jain miinmeeta,
jatianra jawetianbi ea pikóyamakeana iki.
18 ¿Jaweakiki chexakaati, itan masá
teneti kopíres ea pikota iki,
rabín meranbires mawánoxki ea iká iki? ikira Jeremías iká iki.