Mapokan teetai joniki yoinmeeta joi
18
Eara Ibon yoia iki:2 “Tenaman katanwe ja mapokan teetai jonin xobonko, jainoara en mia joi yoiti iki”, akin.
3 Ea, Jeremíassa, naman ipakexon, ja mapokan teetai joni en nokoa iki, jan mapó raseneatinin akí iitaitian.
4 Ja akai jawéki jakonma iketianra, jakiribi ja mapóbi aríbaa iki, jawen keena keskashamanhakin akai kamanra aká iki.
5 Jatianra ea Ibon yoia iki:
6 “¿Enki nato jonin mapó akai keskáribiakin mato, israelitabobi, atima iki? Matora nokon mekenman iki, mapokan teetai jonin mekenman iká keskaribi. Ea, Ibonra onantiakin yoike.
7 Ea keenxonra wetsatianbires, westíora mai iamaxon westíora apo, kikinhakin keyokin ras ati en yoiti iki.
8 Ikaxbi ja main ikábaon jaton jakonma jeneketianra, jan en jato masá tenemati shinannaton jato masá tenematima iki.
9 Wetsatianra en shinanai westíora main jaa jonibo, iamaxon westiora apo, jatibinin jato bebonmati.
10 Ikaxbi ja jonibaon ja mainxon jakonma aketianra, ja ati yoia en moa ayamai, jatianra jakon jawékibo en jato benxoaxona moa axontima iki.
11 Jerusalénhainoa itan Judáin iká jonibo jato yoiwe ea, Ibonra yoiai: ‘Mato ramianoxon shinannira ea iitai; mato masá tenematira en shinanai. Moa jakonmai jaai jenékanwe; bebon jakonni jakanwe itan jakon jawékibo akanwe’, akin.
12 Jaskara ikenbira jabaon mia yoiti iki: ‘¡Yankabires yoyo iamawe! Non keena keskábiribira noa jakasai, non shinan meran yoitimakinra jakonma jawékibo non chibanai’ ”, akin.
13 Jaskákinra, Ibon yoia iki:
“Maibotiibi ikábo jato yokáwe,
neskara jawékiboribimein wetsabaon ninkata iki.
¡Israel jonibaonra
onsá jakonmabires jawéki aká iki!
14 ¿Líbano manan maxkaten shanka ikain wishnin
matsi tsamataki wetsatianbo keyota iki?
¿Ja mananmameax matsi jene
maannaiki tsosinti iki?
15 Ikaxbi nokon jonibora eon shinanbenokana iki,
incienso iníntibora ikonma diosbo menoxonkanai.
Nokon moatian jaskara ati shinanna esé
chibanyamakinra maton shinanres
akáx mato benota iki, itan manota iki.
16 Jaskatira jaton mai, tsoa jonibi jain jaama banetax,
jatíbitian jaki shirokanaires iká iki.
Jatíbi jan winotaibora
kikinni rateti boski ikanti iki.
17 Eara, bari pikotaiorikea niwe keska ixon, Israelbo en jato janbismaa iki;
jaton rawiboibakeara en jato jabámati iki.
Jaton masá teneti nete nokoketianra,
maton jakon ayamaitian, jakonmaires ea matoki yoyo ika iki”, akin aká iki.
Profeta ramiati shinan akana
18 Jonibora yoyo ika iki: “Jeremías nobé iamanon ixon jaskáaxon potati shinanon akanwe. Jabaon noa axeati sacerdotebora jawetianbi noa maxkátima iki, jabaon noa esetibo onanboribira noa maxkátima iki, jabaon Diossen joi noa yoiti profetaboribira noa maxkátima iki, Retekanon ixon jakonma aká riki ixon yoinon akanwe. Ja yoiai jawebi ikonhayamanon akanwe”, ikira ikana iki.
Jeremíasnin orana
19 Jeremíassenra yoia iki: “¡Eapari akonkin ninkawe, Ibó!
¡Nokon rawíbo ea yoii ikaibo ninkáwe!
20 ¿Jakomaninki non jakon kopíati iki?
¡Jabaonra ea reteti shinanke!
Shinanwe jaton paranan ikí yoyo ikira
ebetan beibanana iki, moa jatoki
mia kikinni sináyamanon ixonra en mia yokata iki.
21 ¡Ikaxbi rama, jaton bakebo
jato piti retemawe, iamax reteanantiainxon jato mawámawe;
ibakanon jaton awinbo benomati itan bakeomabo baneti!
¡Abánon retemis isiman jaton jonibo mawámakin,
itan jaton bake ranonbo reteanantíainoax mawábakanon!
22 Jato ati ratereskin westíora tsamá yometsobo raanwe;
¡Abákanon raketi sion ikanai ninkákin!
Jain ea niatira mai chinikanke,
jain winoti ea pakéti trampara moa akanke.
23 Ibó, ikaxbi minra, ea jaskáaxon reteti shinankanabo jatíbi onanke.
¡Jaton jakonma aká kopí enra jato moa shinanxonyamai iki iamawe,
jaton ochabaonribi shinanbenoyamawe!
¡Mibebon jato pakémawe, kikinni sináxon jato masá tenemawe!” akinra aká iki.