Jan joniaa rabii iká
104
¡Jatíbi nokon kayayaxonra en Ibo jakonman rabiti iki!¡Miara koshi iki, Ibo itan nokon Diossé!
Miara kikínbires koshi iki itan penekan raota iki;
2 miara joébires rakótinin rakota iki.
¡Minra chopa akai keskáakin nai peana iki!
3 ¡Taxkétimaakinra koshiakin jene besenen
min xobo witábo min nichinna iki,
onno bochikira min aká iki!
Min imaara nai koinbo min carro ikai;
¡Niwe pein peyakaxa mia kaai!
4 Niwebora min joi boaibo iki,
itan chii tiríbora mia tee axonaibo iki.
5 Jan koshiatibo axonra ja pekaten mai min aká iki,
jawetianbi ja ikainoax taxkétimaakinra min aká iki.
6 Aniparo neminman mai mapoara
chopan mapoai keská iká iki.
Mananbora jenen mapoa iká iki.
7 Ikaxbira min notsina, jatian moa jene boá iki;
min joi tirin ikai keská ninkataxa, jene ishtonbires boá iki.
8 Mananbaon mapetax itan
mai teshanpainbo ipakeax, itan
iibaini boaxa, jainbiribi iti
onantiakin min akáinko boá iki,
9 jain senen iti min yoiara winoyamaa iki,
moa jakiribi mai mapotima kopíra iká iki.
10 Ja jene jokonaibora,
ja manain paro ikainbo min bomai.
11 Ja onpaxa nii meranoa yoinabaon xeai;
ja xeaxa nii meranoa burrobo jaton nomi tantiai.
12 Parobo kexara,
isábaon naa akai;
¡Jainoaxa, jiwi ponyanmameax isábo keotai!
13 Min bochikia xobonkoxonbira,
manánbo min mechaai;
niweaba bemaxonra mai min raromai.
14 Minra yoinabo xobibo xoxomaxonai,
jonibaon jainoa jawékianoxon,
banai yoabora min xoxomaxonai,
ja mainmea jawékiakanon ixon,
15 ja trigo jawékiaxa koshikanai,
ja uva xeati, xeai jaaxa rarokanai,
jatianra xeni winoabires jaton bemanan pené imai.
16 Ja Líbanoain iká Ibon banaa konxan jiwibora,
kikinhakin onpaxen kachitabo iki.
17 Jainra ja maxkoshoko isábaon naakai,
jainoax ja pino jiwibora manxanbaon jati iki.
18 Ja manan keyabora cabrabaona iki,
jainoax shankabora conejobaon joneti iki.
19 Oxera jan nete toponti min aká iki;
barinra onanke jawetianki jishtima iti iki.
20 Moa min yamémaketianra,
nii meranoa yoinabo jokonai.
21 Leónbora nami yamaketian keotai;
Diossen piti meninon ixonra yokákanai.
22 Ikaxbi bari pikókenra moa bokanai,
jatianra jaton kininkobo rakákanai.
23 Jatianra joni jawen teetiain kaai pikotai,
jatianra yaménon kaman teetai.
24 ¡Ichabires jawékira min aká iki, Ibó!
Jatíbira onan ixon jakonhakin min aká iki;
¡Nato maira jatíbi min jonia jawékibo bochobires iki!
25 Jainra aniparo naxbá itan pextin iki,
ja meranra topontimatibires, ani itan maxko yoinabo jake;
26 jainra waporobo boai,
jainra ani yoina Acoron Leviatán iki,
ja jain tsininon ixon min aká.
27 Jatíbi jabora mion manatabo iki,
ja pikasaitian min piti menitinin manatabora ikanai.
28 Min jato meniara, jabaon biai;
ja bixonra jakonhirabo piax potókanai;
29 min jato oinyamaara, icha rakékanai;
jatian join min jato bichinara, mawákanai,
jatianra moa jakiribi mai poto banékanai.
30 Ikaxbi ja join min yoinaboki raanketianra
jakiribi joniai,
jaskáaxonra nato mai min benái.
31 ¡Ibon pené koshira keyoisma iki!
¡Ibora, jan jonia jawékibaon raroai!
32 Jan mai oinketianra shakotai;
¡Jan tii akara manánbo koinnai!
33 Ea japariax, jiriapari ikaxa,
nokon Ibo Dioski iká bewábo ea bewati iki.
34 Nokon shinanbo Ibon keenshaman ibanon,
jaibaresa raro en nokoai.
35 ¡Nato mainmea ochaya jonibo keyóbanon!
¡Jakonmabo moa yamabakanon!
¡Jatíbi nokon kayayaxonbira,
nokon Ibo en jakonman rabiti iki!
¡Ibo ibanon ja rabikanai!