Ibora en rabiti iki
103
Jatíbi nokon kayayaxonbira en Ibo rabiti iki;nokon shinan, nokon kaya itan nokon yorayaxonbira,
jawen jakon jane en rabiti iki.
2 Jatíbi nokon kayayaxonbira, en Ibo rabiti iki;
jan ea jakon jawéki meniabora,
westíorabi ea shinanbenotima iki.
3 Janra jatíbi jakonma en akábo moa ea shinanxonyamai,
itan jatíbi nokon isinbo ea benxoai,
4 janra mawá kini meran raanyamaxon ea jamai,
janra ea bebonbires noia iki, itan bebonbires noiba iki,
5 janra jatíbitian kikin jakon
jawékires ea meniai,
itan teté keská itiakin, nokon shinan ea bakeranon imaxonai:
6 Ibonra akonkin ja atikeskabiakin jaton akábo yoixonai,
ja ramiakana masá teneaibo.
7 Moisés itan Israel jonibora,
Diossen jato onanmaa iki, jan akai jawekibo, itan jan aká jawekibo.
8 Ibo riki akonkin jakonhamis itan onísamis;
jara manátia iki itan jatíbi noimis iki.
9 Jatíbitianra noa notsinyamai, itan jawen sinára jatíbitianma iki;
10 non jakonmabo aká iken, itan non ocha kopí
ayorakin masá tenemati ikenbira noa ayamai;
11 jan rabiaibo noiara kikínshaman ani iki,
ja mai manaon iká nai kikinshaman ani keská riki.
12 Non ochabora noibakeax moa ochóke,
jaokeax bari pikotai betan jao bari kaai ochó ibékona keská riki.
13 Ibora, jan rabiaibo betan iki,
jawen bakebo akonkin noibai papa keská riki;
14 janra onanke jawe noa akárin ixon:
noara mai poto iki ixonra, kikinhakin onanke:
15 Jonin jati netera xobi keská iki;
nii meranoa joa ikai keskatira toetai:
16 ishtonbires niwe xanan akára moa yamai,
jatianra tsonbi jakiribi jaakin moa shinanyamai.
17 Ikaxbi Ibon noimis shinanra jatíbitian iki,
jan rabiaibaonara jaskara iki;
ja atikeskabiakin akaira jain keyota yamake,
ja jatíbi jonibo kaibetanaibaonara jaskara iki,
18 jato betan ja senenhabekonti joi senenhaibaona,
itan jawen esekan yoiai akí shinanbenoyamai yoiti ikaibaonara jaskara iti iki.
19 Ibonra jawen yakati naikan aká iki,
jatian ja apo ikaxa jatíbi jawékinin ibo iki.
20 ¡Koshi ángelbó, Ibo rabikanwe!
Matora ja ati senenhaibo iki,
matora ja ati yoia ninkatax yoiti ikaibo iki.
21 ¡Mato jatíbi jawen sontárobaon, Ibo rabikanwe,
matora jawen tee axonaibo iki, itan jawen keena keská akaibo iki!
22 ¡Jatíbi ja Ibon joniabaon jakonman rabikanwe,
ja jan ikinnaton jakanabaon jatíbiainxon rabikanwe!
¡Jatíbi nokon kayayaxonbira en Ibo jakonman rabiti iki!