2 Jara iká iki kanchis benbo bakeya, itan kimisha ainbo bakeya,

3 jainoax kanchis waranka carneroya, kimisha waranka camelloya, ja teemai waka benebo rabébo jainbichobo kataxa iká iki pichika pacha, burro awinbo iká iki pichika pacha. Jainoaxibira iká iki ja iboaxon yonoai jawen yonotibo kikinbires icha. Jara iká iki ja bari pikotaiorikea jonibo xaran, jato winoa kikinbires icha jawekia joni.

4 Jobnin bakebora jaton xobobotiibi wetsan aká pekáobo chibanmakin tsinkixon jakon pitibo axon jawékiakin fiesta akí axekana iká iki, jatíbitianra ja akaitiibi jaton kimisha poi kenakana iki.

5 Ja tsinkíxon jakon pitibo jawékiakin fiesta akana senennaitiibira, Jobnin jawen bakebo kenakatitai, yamékirishoko wenixonra, jawen bakebotiibi yoinabo jatiobi keyokin menoa iki, Dios bebon jakon ikánon ixon. Jatíbitianra Jobnin jaskara aká iki, jaton shinan meran Dios jakonmaakin yoiax, nokon bakebo ochabirake iki ixon shinanxon.

6 Wetsa netera naikan jawen yonoti jakon ángelbo Ibo bebon ikana iki, jatianra ja jakonmanin yoinmis ángelribi jato betan iká iki.

7 Jatianra Ibon yokata iki: —¿Jaweranoaxki mia joai? —akin. Jatianra ja jakonmanin yoinmis Yoshiman yoia iki: —Mai mayaira ea katanke —akin.

8 Jatianra Ibon yoia iki: —¿Nokon yonoti Jobki min jawekeska oinna? Já keska jonira nato main tsoabi yamake, ea tee axonkinra akonkin senenhai, kikinshaman ponté jakonra jake, tson jakonmanin yointira yamake, tsoabi jakonma atima kopíra koiranmetax jake —akin.

9 Ikaxbi ja jakonmanin yoinmis Yoshiman yoia iki: —Akonkin mia tee senenhaxonkinra yankabires ayamai.

10 Min amayamaara tsonbi ramiayamai, jabi, jawen awin betan jawen bakebobi, jawen jayata jawékibobi; jan akaibora jatíbi min jakonhakin shinanxonai, já riki nato main jatíbibo xewinna kikinbires icha wakaya.

11 Ikaxbi jatíbi jawéki bichinxonra min ointi iki, min bemanainbira mia yoii jakonmai miki yoyo iti iki —akin.

12 Jatianra ja jakonmaakin yoimis Yoshin Ibon yoia iki: —Jakon riki. Min keena keská Jobnin jawékibo awé, ixonbi jabi jawekeska jakonmabi ayamawe —akin. Jatianra ja jakonmanin yoimis Yoshin, Ibo bebonmeax Jobhiba kaa iki.

13 Wetsa nete, Jobnin benbo bakebo betan jawen ainbo bakebo jaton wetsa rekenman xobonko tsinkixon jakon piti jawékiakin fiesta akí ikanaitianra,

14 westíora joi beai joni Jobnin xobonko joá iki, joxonra yoia iki: —Waka benebo mai toemai noa iketian, itan ja burro awinbobiribi noo ochóma xobi pii iikanaibira,

15 noa rateresi Sabá jonibo noki nokókanke, wakabora yometsokanke, chichikaninra ebé teetai jonibo retekanke. Eabichora kenekaatax mia keshani joke —akin.

16 Ja jonin yoikin senenhamabira, wetsa joni nokótoshixon neskara yoia iki: —Kaná pakéxonra jan carnero koiranaiboyabi carnerobo reteke. Eabichora kenekaatax mia keshani joke —akin.

17 Ja jonin yoikin senenhamabira, jawen kimisha itin joni joxon yoia iki: —Kimisha tsamá caldeobo bexonra noa camellobo yometsoakanke, chichikaninra jonibo retekanke. Eabichora reteyamakana mia keshani joke —akin.

18 Ja jonin yoikin senenhamabira, jawen chosko itin wetsa joni nokóxon neskara yoia iki: —Min benbo bakebo betan min ainbo bakebo, min reken baken xobonko tsinkíxon icha jakon pitibo jawekiai ikanaitianra,

19 jain tsoa jonibi jaama mananhorikeax ishtonbires niwe bexon, jatíbioxon xobo shakonkin min bakeboki poxake. Jatíbi min bakebora mawáke. Eabichora kenekaatax mia keshani joke —akin.

20 Jatianra Job wenitax, kikinbiresakin masá shinanni chexakakin, jawen chopa noshia iki, itan kikinni maxtana iki, jaskataxa Dios rabii beota iki.

21 Jatianra neskata iki: —Jawebiomara nato neten ea joá iki, jawebiomaribira nato netemeax ea kati iki. Ibonra ea menia iki, jaskara ixonra Ibonribi ea bichinke; ¡Ibora jakon iki! —iki iká iki.

22 Jatíbi jaskara jakonmabo winókenbira, Job ochayamaa iki, jawe jakonmabira Dioski yoyo iamaa iki.