2
Jatian jawen yonoti jakon ángelbo Ibo bebon tsinkitai netenra, jakonmanin yoinmis Yoshinribi jato betan jain iká iki.2 Jatianra Ibon yokata iki: —¿Jaweranoaxki mia joai? —akin. Jatianra ja jakonmanin yoinmis Yoshiman yoia iki: —Mai mayaira ea katanke —akin.
3 Jaskáketianra Ibon yoia iki: —¿Nokon yonoti Jobki min oinna? Nato mainra tsoabi já keská yamake, akonkinra ea nokon tee senenhaxonai, kikinbires ponté jakonshamanra jake, jakonmanin yointira yamake, tsoabi ramiatima kopíra kikinni koirametai. Jakonma aká ikenmabi min ea jakonmaananabira, jakonma tene ixon, tewanax jawen ikábo jawebi jakonmanin yointi yamaa iki —akin.
4 Ikaxbira ja jakonmanin yoinmis Yoshiman Ibo yoia iki: —Jawen bichi payótiakin isinhayamara joni jatíbi jakonbires ikai. Japarikaskinra masá teneananbi jawe inonbires jonin ati atipanke.
5 Ikaxbi tanakin jawen bichinko isinhawe, jatianra min bemanainbi miki jakonmai yoyo ikai min ointi iki —akin.
6 Jatianra Ibon ja konmanin yoinmis Yoshin yoia iki: —Jakon riki, mia keena keská já betan awé, ixonbi reteyamawe —akin.
7 Jaskáara ja jakonmanin yoinmis Yoshin, moa Ibo bebonmeax kaa iki, kaxonra jawen bichinko Job ati jakonmabires isin raana iki, jawen taenkoxonbi peoxon maxonbinain kaman rabestankinra aká iki.
8 Jatianra jain manish potati patax yakati Job kaa iki, chiimaponra yakata iki, jainoara jan xoanmeeti kenkex pakex bia iki.
9 Jatianra jawen awinnin yoia iki: —¿Miakayaki jakon iki jenékashamai? ¡Moa jakonmakin Dios yoiax mawáwe! —akin.
10 Ikaxbira Jobnin yoia iki: —¡Ainbó, iresbiresi jakonmai yoyo iamawe! Diossen noa raanxonna jakon jawékibo biai keskáribiakinki, ¿Jawekeskakin non jakonmaboribi bitima iki? —akin. Jaskataxa, jatíbi jakonmabo winotibi, jawen yoyo ikaintanibobi Job ochayamaa iki.
Job betan raenanaibo já oinni bokana
11 Job betan raennanaibora kimisha joni iká iki: Elifaz, Temán mainmea; Bildad, Súah mainmea; jainoax Sofar, ja iká iki Naamat mainmea. Jabaonra jatíbi jakonmabo Job winota ninkáxon, jakon shinan bimaxon, chexakaataitian ikinni kati shinankana iki.
12 Jatian kakinra ochóxonbi Job oinxonbi onanyamareskana iki, jaskatira saí iannanbi winikana iki, kikinbiresi shinan meran chexakaakinra jaton chopabo noshikana iki, jainxonra ja mai poto bochiki potaxbo, ja mai potobo mapokókana iki.
13 Jaskatax já betan main yakákana iki, jatianra kanchis nete itan kanchis yamé jawe joibi yoiyamakana iki, Job chexakatai oinkanara kikinbires jakonma iká iki.