Chexakaakin jakonma shinanni Job iká
3
Yoyo iamai iitibira Job kepishita iki, ja pikota nete yoiira jakonmai yoyo ika iki.2 Neskatira Job yoyo ika iki:
3 ¡Nokon titan ea bakea yamé jakonmabires ibanon!
¡Ea pikota nete jakonmabires ibanon!
4 ¡Ja netekaya yamé banepainnon iká riki,
jatianra Diossen jawe ayamakeana iki,
itanribi nete xabáyamakeana iki!
5 ¡Yaménon ixon ota kextokan mapopainnon iká riki,
iamax nai koin wison mapopainnon iká riki,
netenbi bari nokaketian ikai keskati, kikin yamé onsakan mapopain iká riki!
6 ¡Ja yamé, kikinshaman yamékan manópain iká riki,
jatianra ja nete, oxe itan baritiabo toponyamakeankana iki!
7 ¡Tsoa bakebi pikotima yamé ipainon iká riki,
raroi jan saa ikanai yamé iamapainon iká riki!
8 Ja akoron Leviatán jatonharesti koshiyabaon,
ja nete jakonma shinanxonpain ikana riki.
9 ¡Ja netenontian, nete xabataitian ikai wishtinbo penéyamapainnonra iká iki,
kikinni noa jaon maxkata ikenbi bari pikóyamapainonra iká iki,
ja nete bei oxnékirannaribi ointima ipainra iká iki!
10 ¡Jakonmabires ibanon jan ea pikota yamé,
onísbires jatinkoniara ea kenekamayamaa iki!
11 ¿Jaweaki nokon titan chixana meranoaxbi ea mawáyamaarín,
iamax pikotibi ipainon ea mawáyamaarin?
12 ¿Jawekopíki jan ea toati kishi jaa iki,
itan jawekopíki ja en xeati xoma jaa iki?
13 Ja neten moa mawata ikaxa,
natotian jakonshamanres ea moa tantikeanke,
14 ja jaton ani jakon xoboamakatitai apobo, itan
jawen joni koshibo moa mawatabo betanra ea ikeanke,
15 iamaxa ea ikeanke, jaton ani jakon xobobaon
icha oroyabi plata bochoakatiai joni koshibo betan.
16 ¿Jaweati poko meranoabi retexon miinpainon ea ayamakanarin,
ja pikotaxmabi mawata bake akanai keskáakin?
17 Miimeetai kamanresa ikai, ja jakonmabaon jato shinan tsokás akananai senennai,
itan ja paxkinnabaonra mawata pekáo, jain jaton tantiti nokokanai;
18 ja yatanxon xepokana iitaibora jain tantikanai,
jan jato teemai koshi jato akí saí akaira, moa ninkáyamakanai;
19 jainra ja ninkakaatai kikin jonibo, itan
ja namanbires jonibobi senenbires ikanai,
ja iboaxon yonokanai jonira, moa jawen ibon yonoyamai.
20 ¿Jaweatiki masá teneti ikenbi Diossen ja bake pikotaitian oinresa iki?
¿Jaweatiki ichabires masá teneti ikenbi Diossen jamaa iki?
21 Janra akai joaimabi mawá manakin,
kopí jawéki jonea iketian benai keskáakin.
22 Mawáketian miinkanaparira,
raroti ja jonin nokoti iki.
23 Diossen imaara jain kaai onannaxmabi joni niai,
jaweraobi katimaakinra bai xepoai.
24 Masá shinanni ea winia riki nokon piti;
chexakaati ea ishi ikara nokon xeati iki.
25 Jatíbi ea jaki raketai,
bebonbires ea jaki raketaira,
eki paketa iki.
26 Eara tantiti atipanyamake, itan jakonshaman shinanra en nokoyamai, tsokasresa en nokoke, ikira iká iki.