Elifaz rekeni jato betan yoyo ika
4
Jatianra Elifaznin Job yoia iki:2 Neskara en mia yoia min siná ikenbira,
mia yoiamai netéresti en atipanyamake.
3 Enra kikinhakin onanke,
icha jonira min axea iki,
paxkinnabora koshi shinan min jato bimaa iki;
4 onisabo koshi shinan jato bimatira mia join maxkáyamaa iki,
shinan paxnaabora min jato akinna iki,
5 ¿Jaskara ikaxbiki, min masá teneai kopí,
rama min shinan paxnaax mia koshi shinan keyotai?
6 Mia iki Dios akonkin senenhaxonai,
min ikára mia ponté joni iki,
¿Jaskara ikaxbiki mia kikinni Dioski koshiamai?
7 Shinanwe, jakia westíora ponté joni, jakonma aká ikenmabi jaki jakonmabires paketa iki, ixon.
8 Jaskara iká oinxonra en onanke,
jaweratobaonki jakonma akai,
jaskara jakonma banaa ixonra jaribi tsekakanai.
9 Jakonma akaibora, sináxon, Diossen,
jato keyoai, westíoraakin jatoki xoon akátoninres.
10 Kikinni sinati ren ikax leónbo keotai keskákanaibira,
jaton xeta sekexon Diossen jato netémati iki.
11 Ja piti nami nokoyamaax león ikai keskatira mawákanti iki,
jatianra león bakebo ikai keskati jaton bakebo janbiskanti iki.
12 Eki joi nokotara netéshoko iká iki, ea joi yoii baxexaira,
shokoresshoko en ninkata iki.
13 Jonibo jatikaxbi yamé oxaketianra,
jakonmabires namatax, ea tantikaskinhamaa iki.
14 Raké shinanmanra ea yatana iki,
jatíbi nokon xaoyabira ea saki iká iki.
15 Nokon bemanain niwen ea xoon akára, ja nokon boobo charóbaina iki.
16 Jainki tsoa iki ixonra en onanna iki,
jawen ota iaketanara en oinna iki,
ixonbira jawekeska jisárin ixon en oinhamaa iki.
Jatíbira netéres iká iki.
Japekáora neskati yoyo ikai en ninkata iki:
17 “Mawatai ikaxa Diossen oinna, atikeskabiakin akai joni tsoabi yamake.
Tsoabira Diossen oinna já bebon senen joni yamake.
18 Nin jawen ángelbokibira, Dios koshiamai.
Ja ángelboribira senenma iki,
19 ¡Jaskara ikenra jonikaya mai potonko mano xoboa keská,
bebon koshima iki,
jakayara mansan atin teemabires bitaxti iki!
20 Yamékiri iamax yantanra moa yama ikai;
ja mawatara moa jatíbitian iki,
jatianra tsonbi moa jakiakin shinanyamai.
21 Jonin jatira keyotai ikax yoman xatea keská iki,
ja onan shinan biamabira mawatai”, iki ikai.