5
Saii iwe Job, tsonki mia jen akai ixon min ninkánon.¿Jawerato ángelki mia akinnon ixon min yokatai?
2 Westíora onanma jonira jawen sinakanbi mawatai,
jatian ja shinankomabora jawen notsinbi mawatai.
3 Enra oinna iki, onanma joni
jawékinin beboni peokootai,
jaskataxbira ishtonbires jawen xobo ras ika iki.
4 Jawen bakebora moa tsonbi akinti yamake;
joni koshibo ikainxon atikeskabiakin axonyamakanai,
tsoabira jaton paranan iki yoyo iamakanai.
5 Jaton yoá banábora moxa meranoabi bixon,
pikásbaon jato piananai,
itan nomiai jonibo jaton jawéki icha oinnax notsiai.
6 Jakonma jawéki, itan masá tenetira,
mai meranoax pikotaimabo iki,
7 jakonma winóti ikaira, jonin imaa ikai iki,
chii tirikan imaa, chii tsistó noyabainai keskati.
8 Ea iwanxonra Diossiba kaxon,
ea akinnon, jan ea tsokásaibo
Jawen mekenman en jenekeanke;
9 ¡Diossenra icha ani ratéti jawékibo akai,
tsonbira jan akai jawékibo onanti senenma iki!
10 Diossenra nato main oi bemai,
janra jain wai iká maibo mechaai;
11 Diossen akinnara ja naman shinanmeetaibo bebonai,
ja masá tenei shinan tsokásaibora jato akinnai;
12 paranmisti onan jonin, jaskáaxon jato ati shinannabora, Diossen amayamai.
13 Jato ati jawen jakonma shinan akátoninbira, Diossen ja paranmisti onan joni pakémai,
jaskáaxonra jawen jakonma ati shinannabo amayamai.
14 ¡Jato jakonma akasira, yamé meran kaai keskati,
netenbi ja paranmisti onan jonibo niai!
15 Ja jawebioma, itan ja teemakinbi ramiakanaira,
jan jato jakonmaai jonibaon mekenmamea Diossen jato xabaai,
16 ja shinan yosmabo jato akinnaira Dios iki,
¡Diossenra jakonmabaon kexá xepoai!
17 Jaskara ikaxa Diossen notsinnai joni raroshaman iki;
jatíbi Atipanatonin mia notsina omisshamawe.
18 Janra isinnaitian mia benxoai;
Diossen imaara min chexakakin masá teneai,
ixonbira ja chexakatai mia tantimaribai.
19 Westíoraakin axon,
itan wetsatianboribi axon akinra,
jakonma onsáinoa mia xabáati iki,
miara jatíbitian masá tenematima iki.
20 Pitin ititianra mia mawámatima iki,
reteanantitianra mia retekanaketian
en jato amatima iki.
21 Mia jakonma inon ikax yoyo ikánkebira,
mia panati iki, jatianra miki
jakonma nokóketian mia rakétima iki.
22 Pitin iti itan jakonmanin jato abetanaitianra,
mia jaki shiroti iki,
siná yoinabokira mia rakétima iki.
23 Ja makanbaonra min wai tsokasatima iki,
itan ja onsá yoinabo betanra mia jakonres iti iki.
24 Min xobonkora, jatíbi jawékinin mia bebonti iki,
jatian ja min yoinabo min toponara,
westíorabi manotama ikax jatíbires iti iki.
25 Min chiní bakebora mainmea xobi keská icha iti iki.
26 Ja mawátitianra mia yosi koshipari iti iki,
trigo bimi senbó joshina tsekakanai keská.
27 Ninkáwe, moa jaskara ikábo kopí non onannara jaskarakon iki,
non yoia ninkáxon, min onannon,
minbi tanawe, akinra aká iki.