2 nokon wetsa Hanani jaweti joni betan Judáinoax joax eki nokota iki. Jatianra ja Jerusalén itan ja jabáketian boyamakana judíoboki jawekeska iki ixon en jato yokata iki.

3 Jatianra ea yoikana iki: “Ja yatanxon bokaskanabi jabatax ja mainbi banetabora, kikinshaman atikomabires jawékiain ikanai, jainoaxa rabin meranbires ikanai. Jerusalén chikébora moa poxakana iki, jawen xepótibora moa keyokin menokana iki”, akin.

4 Jaskara joibo ninkataxa, ea yakatax winia iki, jaweti netera ea kikinbiresi onisa iki, jaskákinra en ayunana iki, jainxonra ja naikanmea Dios en yokata iki;

5 jatianra en yoia iki: “Ibo, naikanmea Dios, koshi itan onsá Diossé, mia noiabo itan yoiti ixon min ati yoia joi senenhaibora, jato betan ja senenhabekonti joi min akábo, akonkin jatibitian min jato senenhaxonai;

6 enra mia yokatai ja netenyabi yamé, ja min joni israelitabo kopí en oranai, min ea ninkáxonon ixon. Enra onanke, noa israelitabo miki ochaara ikon iki, ¡Nokon rarebobo betanbira ea miki ochaa iki!

7 Mii bebonra noa jakonmabires iká iki, min joni Moisés meranxon min noa menia ja senenhati joibo, ja esébo itan min koshi joibora non senenhayama iki.

8 Min jato yoini shinanwe, noa ochaketian jatíbiain maibotiibi noa janbisatira min yoia iki;

9 ikaxbi miki yoitixon, ja ati min yoia joibo non senenhaketian, jatíbiain maibotiibi janbisa ikenbi, ja mai pasennenainoabi min noa biti iki, jakonbires jatinko jain min xobo iti min katotainko jakiribi noa boti min noa yoia iki.

10 Min yonotibo itan min jonibo riki noa, min ani koshi shinanman jakonmainoa kopiaxon min noa biribaa iki.

11 Ibó, enra mia yokatai, ja en mia orana ninkawe, itan jatíribi min yonotibaon mia yokataboribi ninkáwe, jaton shinanra mia rabitires iki. Jainxonra en mia yokáribiai, jakonbires min ea imanon, itan apon ea noibanon ixon shinanmawe”, akinra en aká iki. Jatianra ea iká iki ja apo Artajerjes xeamai teetai.