2 iketian ea yokata iki: —En oinnara mia kikinni onisa iki. ¿Jáweki mia winota? Miara isinai jisáma iki, jaskara ikaxa min atikoma jawéki jake —akin. Ea jaskáara ani raketen ea yatana iki,

3 jatianra en apo yoia iki: —¡Nokon apo ikaxa jatíbitian mia jake! ¿Jawekeskatiki ea onístima iki, jain nokon anibo minmeeta jema moa jakonmayona iketian, jainoax jawen xepótibo moa menokana iketian? —akin.

4 Jatianra ea apon yokata iki: —¿Jaweki en mia axonti iki? —akin. Jatianra ja naikamea Dioski menikaatanan,

5 ja apo en yoia iki: —Min shinanna jakon itan min oinna ea akinti jisá iketian, ja Judá jema ikainko min ea rannon ixonra en mia yokatai, jainra nokon anibo minmeeta iki, kaxon jakiribi en jemaatanon —akin.

6 Apon ea yoyo akaitianra, jawen awin já patax yakata iká iki, janra ea yokata iki: —¿Ja mia kaaiki jawetio basi iti iki? ¿Jawetianki mia joríbati iki? —akin. Jatian kaax jatio basi iti en yoiara, ea raantinin keena iki.

7 Jainxonra en yoiribia iki, jan oinna jakon iketian, bari kaiorikea Éufrates paronkonia, joni koshibo boxonti kirika wishaxon ea meninon ixon, Judáin kaaitian jaton main ea winómakanon ixon;

8 jainoax wetsa kirika wishá Asaf boxontira en yokata iki, ja apon, nii koiranna ixon, Dios rabiti xobo xepótibo ati, makan chiké xepóti ati itan ea jain jati xoboati ea jiwi meninon ixon. Jatianra jakonbires Diossen ea akinna, apon jatíbi jawéki ea menia iki.

9 Ja bari kaiorikea Éufrates paronkonia joni koshiboiba nokóxonra, apon kirika bomaabo en jato menia iki, westíora tsama kabáyonin boaibo sontárobora ea koiranni ebetan bokana iki, ja sontárobaon koshin ikinhanan jato koirannayabo.

10 Ikaxbi ja Horónhainoa Sanbalat, itan ja amonita joni koshi Tobíasnin ninkatara, ja israelitabo jato akinnai joni nokota, kikinshaman jaton keenma iká iki.

11 Jain kati kikin ochó ikenbira ea Jerusalénhain nokota iki. Jatian kimisha nete moa jain ikaxa,

12 yamé wenitax, pikókaini jaweti joniya ea kaa iki, ixonbira Jerusalénhain ja ati ea Diossen shinanmaa tsoabi en yoiayamaa iki. Wetsa yoinabo boyamakinbira, jan peyakax ea kaai yoinabicho en boa iki.

13 Ja yamébira mai Teshanpaori iká xepótinin pikotax, Dragón jene jokonaiori iká manish potati xepótiain ea kaa iki, Jerusalén chikéki jawekeska iki ixon en oinnara, moa poxaxon jawen xepótibo menokana iká iki.

14 Japekáora ja jene jokonai xepótiori, itan ja apon ianshoko ikáori ea kaa iki; ikaxbira ea jain kaman nokóyamaa iki, jan peyakax ea kaa nokon yoina, jain winóti atipanyamaketian.

15 Yamépari iketianra wean kaaori mapéxon, ja chikéki jawekeska iki ixon oinna pekáo, ja teshanpaori iká xepótinin jikiax, jainoax ea katanainko jakiribi ea kaa iki.

16 Ea jain katana, itan, ja akí ea katanaribira joni koshibaon onanyamakana iki. Jatian kamanbira ja Sacerdote judíobo, ja iresama jonibo, jaton joni koshibo, itan jan ea tee akinti jonibo jawebi en jato yoiamapari iká iki.

17 Jaskara ikenra en jato yoia iki: —Matonbira kikinhakin onanke noara jakonmain iki ixon, Jerusalénra moa jakonmayonpaketai, xepótibora moa menokana iki. Ebetan rabékanwe, Jerusalén chiké benaakin aríbanon akanwe, jatianra moa noki shirokantima iki —akin.

18 Jatianra Diossen akonbireskin jakonhakin ea akinna en jato yoia iki, jainxon apon ea yoia joiboribi en jato yoia iki, jaskáakin en jato yoiara neskákana iki: —¡Jakiribi chiké ati tee moa peonon akanwe! —iki. Jatianra kikin jakon shinanyanix, nonra ati atipanke, ati riki, iki yoianankana iki.

19 Ikaxbira ja Horónhainoa Sambalat, ja amonita joni koshi Tobías, itan ja árabe joni Gesem, noa jaskatai onanax noki shiroi, itan noa jawemabi shinankin noa rabinhai neskákana iki: —¿Jawe akasiki mato iitai? ¿Matonki apo jakonmaati shinanai? —ikibo.

20 Jaskákanaibira en jato yoia iki: —Ja naikanmea Diossenra noa bebonmati iki. Jatian noa jawen yonotibaonra jakiribi chikékin peoai, matonra noa jawe yoiti yamake, itan jawe ointi yamake, matoma riki ja Jerusalén jan koshiaabo —akin.