ESDRAS
Jakiribi banéxon benaakin Dios rabiti xoboakana
Ciro apon ja senenhati koshi joi
(2 Crónicas 36.22-23)
1
Ja Ciro, Persia mainmea apo iká, jawen reken baritia iketianra, profeta Jeremías meranxon Ibon joi yoia senenti kopí, Ibonbi Ciro amaa jawen mainxon jatíxonbi ninkáti ja senenhati koshi joi pikoa iki, ja joira joinres itan kirikainribi wishaxon jato onanmaa iki, jara iká iki neskati iká:2 “Ea, Ciro, Persia aponra onankanon ixon neskara yoiai: Ja Ibo, jatíbinin Diossenra, nato mainmea jatíbiainoa apo ea imake, janra ea yoike já rabiti xobo ja Judá main iká Jerusalénhain en ati.
3 Jaskara iketian, Ibon joni ikax mato israelitabo wetsabires inonbi, Diossen mato akinbanon, Jerusalénhainra mato kati iki, Ibo rabiti xobo jato amaira mato kati iki, ja Ibo, Israelnin Dios, ja Diossa Jerusalénhain jake.
4 Ja mawátiainoax texeax nenobi jakanabora, ja patax ikábaon akinti iki, plata, oro, jainoax waka itan wetsa jakon jawékibo menikin, ja Jerusalénhain Dios rabiti xobo jan akantiboribi”, iki ikábo.
Israelitabo jakiribi Jerusalénhain banékana
5 Judá itan Benjamín jonibaon koshibo, sacerdotebo, Levitabo, jatíbi jato Diossen jain kati shinanmaabora, Ibo xoboaxoni Jerusalénhain bonox benxokakana iki.
6 Jatíbi jato patax ikábaon jato akinkin menikanara iká iki plata, oro, jakon jawékibo, jainoax waka, kopí jawékibo, itan jaton shinamanbi jato menikana meskó jawékiboribi.
7 Jatian apo Cironbiribira, ja Nabucodonosornin Jerusalénhain iká Ibon xobonkonia jawékibo, ja Babiloniain boxon jaton diossen xobonko akábo, jato menia iki.
8 Ja jawékibora apo Ciron jato banea iki, Mitrídatessa jato menimaa iki, ja koriki koirannai iketian, jakopi jawékibo toponkin seneaxonra, Judá mainmea jaton joni koshi iketian Sesbasar menia iki.
9 Ja jawékibo toponkanara iká iki: kimisha chonka oro tazón, waranka plata tazón, rabé chonka iskon chichika,
10 kimisha chonka oro pocillo, chosko pacha chonka plata pocillo kikinmatani, itan waranka beshé jawékiboribira ja iki.
11 Ja oro betanbi plata jawékibo toponara, pichika waranka chosko pacha iká iki. Jatíbi ja jawékibora, Sesbasarnin Jerusalénhain jakiribi boá iki, ja yatanxon bokana jonibo betan Babiloniainoax baneti kakin.