Jerusalénhainoabo ramita
25
Sedequías apo iká moa iskon baritiaya iken, jawen chonka oxe itin, itan chonka neteyaribi iketianra, apo Nabucodonosor jawen sontároboya, Jerusalénhainoabo betan reteanani bokana iki, tsoabi pikótimaakin xepokana iki. Ja boax jema bebon tsamáxonra, janmeax reteananti ja jema katemakin jan mapetibo tapoakana iki.2 Ja jemara xepokana iki, moa chonka westíora baritia, ja Sedequías apo iká inontian kaman.
3 Moa basiaitianra ja jemamea jatíbi jaton jawékiati pikin keyokana iki, senentianhinbira ja baritianbi jawen chosko oxe itin, iskon neteya iketian, ja jemamea jonibo moa ikonbiresi jawékiatinin ikana iki, itan ja jonibaon pitibobira yamaa iki.
4 Jatianra ja jema katea ani chité kiniakana iki, jaskaaxa ja Babilonio sontárobaon jato xepoa ikenbi, ja apo jatíbi jawen sontároboya ja jemameax ja yamébi jabákana iki. Ja rabé chiké ikáinoa xepótininra pikókana iki, ja apon xobo patax joa banábo ikátoninbi, Jordán teshanpain bai kaatoninra bokana iki.
5 Ikaxbira Babilonia sontárobaon, Sedequías chibankana iki, boxonra Jericó mai teshanpainoa nokokana iki. Jatianra jawen sontárobo, jatikaxbi já potabaini moa janbiskana iki.
6 Jatianra apo Sedequías jawen bakeboyabi yatanxon, Babiloniabaon, ja Babilonia apoiba bokana iki, Hamat main iká Ribláin. Jainxonra Nabucodonosornin Sedequíassen masá teneti yoia iki,
7 itan jawen jishnonbira, jawen bakebo textexon retekana iki. Jatianra ja Sedequíasbiribi, bero tsekananxon cadenanin nexaxon, Babiloniain boti jato yoia iki.
Babiloniabaon Dios rabiti xobo ras akana iki
(2 Crónicas 36.17-21; Jeremías 39.8-10; 52.12-30)
8 Moa Nabucodonosor Babiloniain apo iká, chonka iskon baritia iken, jawen pichika oxe itin kanchis neteya iketianra, Nabuzaradán apo koirannai sontárobaon koshi Jerusalénhain nokota iki,
9 jainxonra ja Ibo rabiti xobo, apon xobo, jainoax ja jemamea jatíbi xobobo menoa iki, ja kikin jonibaon xoboboparira aká iki,
10 jainxonra ja chibani jabé boá sontárobaon, ja Jerusalén katea ani chikébo ras akana iki.
11 Japekáora Nabuzaradánman jawen sontárobo betan, ja Jerusalén jemanko texea jonibo, itan ja Babilonia apo betan moa noa ibanon ika jonibo, jainoax jawéki atin menín jonibo, jato reken bokanontian texeabo, jatíbi jabo jato yatanxon Babiloniain bokana iki.
12 Ja kikínbires jawebioma jaweti joniresa, jainbi jenekana iki, abákanon jain uva waiati maibo orokin ixonra jenekana iki.
13 Babiloniabaonra, rabiti xobo meranoa bronce akana jawékibo toekana iki: witábo, jainoax jaki koshiabo, jainoax jain onpax akanai ani tanki, jatíbi broncera Babiloniain bokana iki.
14 Jain chiimapo ati kenchá, palabo, besteti keskábo, cucharonbo, itan jatíbi bronce akana jan rabikin atibora bokana iki.
15 Jaskáribiakinra ja sontarobaon koshin, jatíbi oro akana jawékibo betan plata akana jawékibo boá iki: jan tsiste biti kenchábo, itan kenpobo.
16 Jatian ja rabé witá, jainoax jan onpax ati ani tanki, itan ja Ibo rabiti xobo jan koshiati apo Salomónman jato amaabora, jaweti iweyaki iká iki ixon, topontikoma iká iki.
17 Ja witábaon keyára iká iki posaka metro winoabo, ja pekatenra iká iki rabé metro keyá bronce tapo, ja katemaira kini werebaina, itan ja granada bimi keskaraton raoakanabo iká iki. Jatíbi jabora broncebires iká iki.
Judá jonibo yatanxon wetsa main bokana
18 Ja apo koirannai sontárobaon koshi Nabuzaradánmanra Seraías, kikin sacerdote, ja rabé itin iká ikon sacerdote, Sofonías, jainoax ja rabiti xobo xepoti koirannai kimisha joni jato yatana iki.
19 Nabuzaradán betanra jawen joni koshibaon, israelita ja sacerdotemabo jato yatana iki: ja sontárobaon koshi itan ja jemamea pichika joni jan apo eseai, ja sontáro iti joni biai jaton koshi, jainoax ja sokota chonka onankana kikin jonibo.
20 Nabuzaradánmanra jatíbi jabo Ribláin, ja Nabucodonosor ikain jato boá iki.
21 Jainxonra apon, Hamat mainxon retenon ixon jato yoia iki. Jaskáxonra Judá jonibo, jaton mai ochóbires jato bokana iki.
Ja texea israelitabo Egiptonko jabata
22 Safánman baba, Ahicamman bake, Gedalíassa, Judáin baneta jonibo jato ikinnon ixon, Babilonia apon Nabucodonosornin jaton koshi iti janea iki.
23 Jatian ja Judáinoa sontárobaon koshibora, jawen jonibo betan jaskara ninkatax, Gedalías betan yoyo iki, Mizpánko bokana iki. Jábo iká iki, Nataníasnin bake, Ismael; Careanin bake, Johanán; Tanhúmetnin bake Seraías, Netofainoa; jainoax Jaazanías, Maacainoa westíora jonin bake. Jaton jonibora jato betan bokana iki.
24 Jabora jawen sontároboyabi, akonkin senenhanoxon Gedalíasnin jato yoia iki, Babilonia sontárobaon koshiboki rakéyamakanwe akin, ja mainra jakonbires mato jati iki, jatianra ja Babilonio apo maton yoiti ixonti iki, jaskataxa mato jakonbires iti iki, akin.
25 Ikaxbi jawen kanchis oxe itinra, Ismael, ja Nataníasnin bake, itan Elisamanin baba, ja Judáinoa apon rarebo, chonka jonia Mizpánko nokota iki. Jainxonra jatixonbi ja Gedalías, itan ja Judáinoa sontárobaon koshibo, jainoax ja jabé iká Babiloniainoa jonibo, jato retekana iki.
26 Jatianra Babilonia sontároboki raketi, yosiboyabi bakebo itan jatíbi sontárobaon koshibo, Egiptonko jabati bokana iki.
Babilonia apon Joaquín pikoa
27 Ja Judáinoa apo Joaquín, moa kimisha chonka kanchis baritia presoakana ikenra, moa baritia chonka rabé oxeya iketian, jawen rabé chonka kanchis nete itin, Evil-merodac, Babiloniain apo ikí peokoota iki, janra jawen noibamisti shinan Joaquín oinmaxon, cárcel meranoa pikoa iki,
28 jakonhakin jakinxonra, ja Babiloniainoa apo ikábo bebonbires iresama imaa iki.
29 Jaskáara Joaquínman, jayá preso ipachoai chopabo moa sawekin jenea iki, jatianra mawatai kaman apo betanbi pii jaa iki.
30 Jaskáaribakinbira, Babilonia apon, jan jawen jawéki biti netetiibi Joaquín koriki menia iki.