2 Jaskákinra, jawen yonotibaon yoia iki: “Mia jan akinti itan mia koiranti, westíora xontako beneoma non mia benaxonbanon, jatianra miibetan oxaxon mia xanaati iki”, akin.

3 Jatianra ja Israel mainmea jatíbiain westíora metsá xontako benakana iki, jatianra westíora nokokana iki, jawen jane iká iki Abisag, Sunem jemamea, jara apo boxonkana iki.

4 Ja Abisag iká iki kikin metsáshoko, janra apo koirana iki, jainxonra jawéki axona iki, ikaxbira jawetianbi apon já yoranyamaa iki.

5 Jatianribira Davidkan Haguit betan bakea Adonías, jaki jakonmai peokooti, eara apo ikai, iki iká iki. Janmeax reteananti carrobora bia iki, cabayoninmeax reteananti jonibo, itan já koiranai itibora, pichika chonka joni bia iki.

6 Jawen papanra, jawetianbi jaskara ayamawe akin ayamaa iki, ja min akaiki, jaweati min jaskáai akinra yokáyamaa iki, Adoníassa iká iki Absalón pekáo pikota, kikin metsá joni.

7 Sarvianin bake, Joab, itan sacerdote Abiatar betanra, jaskara ati shinan aká iki, jaskákinra jabaon akinna iki.

8 Ikaxbira ja sacerdote Sadocnin, ja Joiadanin bake Benaíassen, nin profeta Natánman, nin ja apo jaki koshia joni Simeikanbi, jainoax ja David koirannai sontárobaonbi Adonías akinyamakana iki.

9 Jaskánontianra, Adoníasnin tsinkíxon aniakin jawékiati aká iki, ja Roguel jene jokonai iká ochóma, Zohelet shanka patáxon. Carnerobo betan waka benebora jato retemaa iki, waka bene ramakaya aniai kikin xoáboribira aká iki, jaskáaxonra jawen wetsabo, ja apon bakebo, jainoax jatíbi Judáinoa apo tee axonai joniboribi jato kenaa iki;

10 ixonbira profeta Natán, Benaías, ja David koirana sontárobo, jawen wetsa Salomón, jatíbi jabo jato kenayamaa iki.

11 Jatianra Natán Salomónman tita Betsabé betan yoyo ika iki, jatianra yoia iki: —¿Minki moa ninkata, Haguitnin bake Adonías, non ibo David onanmayamai moa apo iká?

12 Neri jowé, min bake Salomón betanbi mia jaskatax jati kopi en mia esenon.

13 Apo Davidhiba kaxon, neskáakin yoitanwe: ‘Minra ja akonkin senenhati ixon yoia iki, mia iká pekáo nokon bake Salomón apo itaanan, ani yakátinin yakáxon jato ikinti. ¿Jatian jawekopíki, Adonías moa apo iká?’ akin.

14 Jaskati apo betan mia yoyo ikaitianra, ea jikiti iki, jatianra min yoia joibora ikon iki ixon en yoiti iki —akin aká iki.

15 Jatianra Betsabé apo betan yoyo iki, jain iká chitéain kaa iki. Ja apora moa yosiora iká iki, sunamita xontako Abisagnin koiranna.

16 Betsabéra apo bebon main bekepinon kaman beota iki, jatianra apon yokata iki: —¿Jawe en axontininki mia keenai? —akin.

17 Jatianra jan yoia iki: —Min Ibo Diossen janenko, akonkin senenhati ixonra, min ea yoia iki, mia iká pekáo ja nokon bake Salomón apo ikax, ja ani yakátinin yakáti.

18 Jaskara ikenbira Adonías moa apo ike, jara min onannama iki.

19 Waka benebo betan rama aniai waka bake benebo, itan icha carnerobora jato retemake, jaskáaxonra min bakebo kenake, jainxonra ja sacerdote Abiatar betan ja sontárobaon koshi Joab kenake, ixonbira ja mia akinni teetai min yonoti Salomón kenayamake.

20 Ramaki, mipekáo tsoa apo ikai ixon min yoitininra jatíbi Israel jonibo manata ikanai.

21 Jaskáyamaketianra, mia mawáketian, nokon bake Salomón betanbi ea retekanti iki —akin.

22 Betsabé jaskati apo betan yoyo ikaitianra, profeta Natán nokota iki,

23 jaskáxonra jaskara iká apo onanmakana iki. Jatianra ja profeta apo bebonmeax, maikibi bekepinon kaman beota iki,

24 jainxonra yokata iki: —¿Mia iká pekáo Adonías apo itiki min yoia iki?

25 Jaskara ixonra rama ipakexon jato retemake, waka benebo, ramashaman aniai waka bake benebo, jainxon icha carnerobo, ja axonra min bakebo kenake, ja sacerdote Abiatar itan ja sontárobaon koshi capitánboribira kenake. Jainra jabé pii ikanai, xeaira ikanai, jainoax saí ikanai: ‘¡Apo Adonías jabanon!’ ikibo.

26 Ixonbira, ea kenayamake, nin ja sacerdote Sadoc, nin ja Joiadanin bake Benaíasbi, nin ja min bake Salomónbira kenayamake.

27 ¿Ea nato min yonoti yoiamatianbiki mia iká pekáo min yakátinin yakáti tsoa min yoia iká iki? —akinbo.

28 Jatianra apo Davidkan Betsabé kenati jato yoia iki. Ja apoiba nokotaxa, Betsabé apo bebon chankata iki.

29 Aponra akonkin senenhati ixon yoia iki: —Jan ea jatíbi masá teneainoa xabáaka Ibon janenkora akonkin en yoiai,

30 Israelbaon Ibo Diossen janenkora akonkin senenhati ixon en mia yoiai, ramabira en mia senenhaxonai: Min bake Salomónra, nokon toan ani yakátinin yakatai, jaskatax ea iká pekáo apo ixon jato ikinti iki —akin.

31 Betsabéra, apo bebon mainbi bekepinon kaman beota iki, jaskataxa koshin neskata iki: —¡Jatíbitian nokon ibo, apo David jabanon! —iki.

32 Japekáora ja sacerdote Sadoc, profeta Natán, Benaías, ja Joiadakan bake kenati apo Davidkan jato yoia iki. Jabo apo bebon joketianra,

33 jan jato yoia iki: —Nokon joni koshibo betan botankanwe, nokon bake Salomón, nokon mulan peyasanxon Gihónhain botankanwe;

34 ja sacerdote Sadoc itan profeta Natánman, Israelbaon apo iti onantiakin Salomón imaketianra, carnero machan maton xoon ati iki, jainoax mato koshín saí iti iki: ‘¡Apo Salomón jatíbitian jabánon!’ iki.

35 Jaskata pekáo jan amistiaxon koiranxon botankanwe, nokon ani yakátinin, yakábanon, nokon toan apo ixon, jato ikínbanon, Israelbo itan Judábaon joni koshi já itira en yoia iki —akin.

36 Jatianra Joiadanin bake Benaíassen, apo yoia iki: —¡Jaskara ibanon, min Ibo Diossen jaskara imabanon!

37 Ja miibetan ikátiai keskáribii, Salomón betan Ibo ibanon, mia nokon ibo Davidkan akátiai bebonbires ja apo ixon abanon —akin.

38 Japekáora ja sacerdote Sadoc, profeta Natán, Joiadanin bake, Benaías, cereteobo itan peleteobaon, boxon Davidkan mulan ja Salomón peyásankana iki, jaskáxonra Gihónhain bokana iki.

39 Jainxonra ja Diossen carpa xobonkonia, westíora machan xenia bixon, sacerdote Sadocnin apo imakin Salomón machita iki. Ja aká pekáora carnero machan westíoratonin xoon aka iki, jatianra jatíbi jonibo saí ika iki: “¡Apo Salomón jatíbitian jabánon!” iki.

40 Jainxonra jatíxonbi chibankana iki, flautabo xoon aabainnira bokana iki. Ja raroi saí ikanaitianra, mai kaxketai keská iká iki.

41 Adonías itan jatíbi ja kenaabaonra ja saa ikanai ninkáxon pikín jenekana iki. Ja machán xoon ikai ninkataxa, Joab iká iki: —¿Jawekopíki jemameax kikínbiresi saa ikanai? —iki.

42 Já yoyo ikainbira, ja sacerdote Abiatarnin bake Jonatán nokota iki. Adoníasninra yoia iki: —Jikiwe, miara iresama joni iki, enra onanke, minra jakon joibo noa bexonai —akin.

43 Jatianra Jonatánman Adonías yoia iki: —Jaskarama riki, en mato yoiaira jakon joima iki. Non ibo apo Davidkanra, Salomón moa apo imake,

44 ja imanoxonra, ja sacerdote Sadoc, profeta Natán, Joiadakan bake Benaías, cereteobo itan peleteobo yoike, Salomón betan kati, jaskáati yoiara jabaon apon mulan peyásanke.

45 Jainxonribira ikon sacerdote Sadoc betan profeta Natánman, Gihónhainxon moa apo imakin onantiakin yoike, jainoax banetira kikin raroshaman bokanke. Jaskatira ja jemameax saa ikanke, ja ikanai riki maton ninkata.

46 Jainoaxribira Salomón moa ani yakátinin yakáke,

47 jainoax ja apo Davidkan joni koshibora moa rarokinni bokanke, Diossen jatíbinin Salomón jabebonmanon ixon, itan Davidkana bebonbires ani maia iti kenxonkinra yoikanke. Ja apo Davidkanbira jawen oxatiain beoxon Dios rabike,

48 jatianra neskáke: ‘Ibo jakon ibanon, Israelbaon Dios, en oinnon ixonra rama westíora nokon bake chiní ani yakátinin yakámake’ —iki.

49 Jatianra ja Adoníasnin kenaa jonibo saki ikana iki; jatianra jatikaxbi wenitax, jaton ikainbiribi moa bokana iki.

50 Adoníassibira, Salomónki raketi wenitax Dios rabiti xobonko kaa iki, jain jonéti benai kaxonra, jainxon yoina menotiainoa machán yatana iki.

51 Jatianra wetsa joni Salomón yoii kaa iki: —Ninkáwe, Adoníasbira miki raketai, jain koiranmeeti benaira kake, onsá jakonmanin anaketian machan yatanax jaki chipotira kake. Miara yokatai ramabi min yoiti, akonkinra en yoiai, enra reteyamai iki mia iti —akin.

52 Jatianra Salomónman yoia iki:

53 Jatianbira Salomónman ja yoina menotiainoa pikokanon ixon jato raana iki. Jainoax kaaxa, apo Salomón bebon Adonías beota iki, jainoara jawen xobonko katanon ixon yoia iki.