2 SAMUEL
Samuelnin rabé itin wishaa kirika
Saúl mawata Davidkan ninkata
1
Saúl mawata pekáora, amalecitabo betan reteanankin Davidkan jatoaresa iki, jaskáaxa Siclagháin jakiribi kaax rabé neteres iká iki.2 Ikaxbi jawen kimisha nete itínra westíora joni Saúlnin peotainoax joá iki, jawen chopa waxabires itan jawen mapo maibires, onisi chexakatai onanti inon ikax. Davidhiba nokotaxa mainbi bekepinon kaman beota iki, kikin joniakin shinanbainax.
3 Jatianra Davidkan yokata iki: —¿Jaweranoaxki mia joai? —akin. Jatianra ja jonin yoia iki: —Israelitabaon peotainoaxa ea jábati joke —akin.
4 Jaskáketianra Davidkan aká iki: —¿Jaskara ikaxki, jawe winota? ¡Ea yoimenwe! —akin. Jatianra ja jonin yoia iki: —Reteanantiainoaxa sontárabo jabáke, ichara moa mawákanke. ¡Jainoaxibira Saúl betan jawen bake Jonatán mawáke! —akin.
5 Jatianra Davidkan jan joi bea yonoti yokata iki: —¿Jawekeskaxonki Saúl betan jawen bake Jonatán mawata min onanna? —akin.
6 Ja joninra yoia iki: —Jain ikasimabira Gilboa mananman ea iká iki, jainxon en oinnara Saúl jawen yami taxoki koshiax chankata iká iki, jatianra jawen rawíbaon jan reteananti carrobo betan kabáyonin beaibaon moa nokoi bei ikana iki.
7 Jaskataitianra jan pekáori oinkin meraxon ea kenaa iki. Jatianra jan yoia atires ea iká iki.
8 Jatianra miaki tsoa iki ixon ea yokata iki, eara amalecita iki akinra en aká iki.
9 Jatianra neri epatax joxon, ea moa retemenwe akin ea aká iki, jara iká iki chexakakin masá teneibi jiriapari.
10 Jaskáketianra já patax kaxon, natora moa mai tsakaax jayamai ixon onanxon en retea iki. Jainxonra jawen maponkonia maiti betan jawen menexeti en bia iki, mia nokon ibo iketian bexonti kopí —akin.
11 Jatianra David itan jabé ikabo onisi chexakatai onanti inon ixon jaton chopa waxakana iki,
12 jatianra Saúl betan jawen bake Jonatán mawáketian onisi yoyo ianan winikana iki, ja israelitabo, Ibon jonibo jatoaresxon jato retekana kopíribira ikana iki, jaskákinra yantánnon kaman piamakana iki.
13 Japekáora jan joi bea bakeranon Davidkan yokata iki: —¿Miaki jaweranoa iki? —akin. —Eara wetsankoniax joa iki, ea riki amalecita —akinra jan aká iki.
14 Jatianra David saí ika iki: —¿Jawekeska shinanxonki, rakéyamakin Ibon katota joni min retea iki? —iki.
15 Jaskátaananra westíora jawen joni kenaxon, yoia iki: —¡Kaxon moa retetanwe! —akin. Jatianra mawátiakin chachixon amalecita retea iki,
16 ja akaitianra Davidkan yoia iki: —Ibon katota apora en reteke ikaxa minbix mia keshake, jaskara ikax ja mia mawataira, ja min jakonma aká kopíbi, minbix mia mawatai iki —akin.
Saúl betan Jonatán kopi onisi yoyo ika
17 Saúl betan jawen bake Jonatán mawaketianra, David yoyo iananbi winii jatoki bewaa iki,
18 jatian ja bewára Judá jonibo onanmati jato yoia iki. Ja onisi bewaara atikeskabiakin ikon jaskara ikábo yoiai kirika meran wishaa iki. Ja bewára ikai neskati:
19 “¡Eritsipanon Israel!
¡Ja koshi joniboya ikax mia jaton
rabitaira mananmameax
moa mawákanke!
20 Gat jemamea jonibo tsoabi yoiamakanwe,
Ascalón calle jemamea joniboribi yoiamakanwe,
filisteo ainbobora raronake,
itan ikonma dios rabiaibora raroi choronnake.
21 ¡Oi betan nibí, ja Guilboa
mananboki moa jawetianbi manyamabanon,
jainoax keyókana maibo iketian!
Moa jain jawebi xoxotima kopí.
Jainxonra ja reteananai koshi jonibaon,
yami panatibo jimin tsaia iki.
Jaonbora peníyonkana iki.
Itan ja apo Saúlnin yami panatira moa jawen pené jainres keyota iki.
22 Saúl betan Jonatánmanra, jaton espada betan piabo,
reteanankin jaton rawibaon jimín,
itan jaton xenin moa
kerás ayonkana iká iki.
23 Jainoax Saúl betan Jonatánra,
jakon iketian noikana iká iki,
jirianixa potaananyamabekona iki, jainoax mawátiainbira onitsapikaini mawábekona iki.
¡Teté winoa ishtora ikana iki!
¡Leónbo xewina koshibora ikana iki!
24 ¡Israelnin bake ainbobó,
Saúl kopi winikanwe,
jan raoti amí keska kopí chopa, itan lino
chopa oronbires kewéaxonbo mato sawema iketian, jainxon jan raoti oroboribi mato sawema iketian!
25 ¡Jawekeskatiki non joni koshibo
reteanantiainoax mawata!
¡Jonatánra min manan bochikixon retekana iki!
26 ¡Nokon wetsa Jonatán, mia kopíra en masá shinanai!
¡Akonbireskinra min ea jakonha iki!
Min ea noibaara, ainbobaon ea noia bebonres iká iki.
27 ¡Ja reteanantiainoax moa koshi jonibo mawáketianra!
¡Jan reteananti jawékiboribi moa jainres keyota iki!” iki.