2 Jainoaxa filisteobo, Saúl jawen bakeboya kaaitian chibani bokana iki, Jonatán, Abinadab itan Malquisúara retekana iki.

3 Japekáora jatikaxbi, Saúl akí bokana iki; jatian ja kanótinin pia potaibaon potaa kaxonra Saúl tsakaa iki, jainoaxa jatoki moa ikonbiresi raketa iki.

4 Jaskákinra jan reteananti jawékinin akinnai yoia iki: —Min espada tsekaxon, ea jan bebánkin chachiwe, ja ikon Dioskon onanma jonibo beyamakanon ixon, ea reteaxa jabo eki shiroi rarokanti iki —akin. Ikaxbira ja akinaitonin, ikonbiresi rakékin akáshamaa iki. Jatianra jawen espada bitaanan, Saúl janbix jaki paketa iki.

5 Jatianra ja akinaitonin oinna moa Saúl, mawá iketian, járibi jawen espadakibi paketax, jabébi mawata iki.

6 Jaskataxa Saúl, jawen kimisha bake, jan akinnai joni itan jatíbi ja jabáyamaabo jawen jonibo ja nete mawákana iki,

7 jatian ja mai teshanpa bekeiba jaa israelitabaon itan ja bari pikotaiori iká Jordánhorikeabaonra, onankana iki; ja Israel sontárobo jabataitian, jatianra Saúl jawen bakeboyabi moa retekanketian, jaboribi jaton jemabo potabaini moa jabákana iki. Jatianra filisteobo jain nokotax, jainbi jaai banékana iki.

8 Ja wetsa nete xabáketianra filisteo sontárobaon, mawá yorabo potai boxon, Gilboa mananman jawen kimisha bakeyabi Saúl mawá rakata merakana iki.

9 Jatianra jawen mapo textekana iki, itan jawen reteananti jawékibora bichinkana iki, jaskáxonra joi boaibo jatíbiain filisteobaon main ja joibo botankanon ixon jato raankana iki, itan jaton diosbo rabiti xobonko ikábaon onannon ixon

10 Japekáora Saúlnin reteananti jawékibo, jaton diossa Astarté rabiti xobo meran akana iki, itan jaton yorara Bet-sán jema chikekan paninkana iki.

11 Jatian Galaadhain iká, Jabes ikainoa jonibaonra, filisteobaon Saúl, itan jawen bakebaon yora chiketen paninkana moa onankana iká iki,

12 jatíbi koshi shinanya Jabes jonibora tsinkikana iki, itan ja yamébira taenbi boboshinkana iki, japekáora Saúlnin yora itan jawen bakebaona Bet-sán chiketemea moa bikana iki, jainxon moa Jabessain banéxonra, ja yorabo menokana iki.

13 Japekáora, Jabessain westíora jiwi naman ja xaobo miinkana iki. Jaskarabo aká pekáora, kanchis nete senen ayunankana iki.