2 Ja Elcanara iká iki rabé awinya, Penina betan Ana. Ja Peninara iká iki rabé bakeya, ikaxbi Anara iká iki jayaoma.

3 Jatíbi baritiatiibira Elcana, jawen jemameax Silonko kaai pikókatitai, jainxon jatíbi atipana Ibo rabianan itan jawéki menixon menoxoni. Jainra sacerdote Elikan bake rabé iká iki, jaton janera Ofni betan Finees iká iki, jaboribira Ibon sacerdotebo iká iki.

4 Jatian ja Elcananinra, ja jawéki Dios menixon menoxonaitiibi, Penina jatíbi jawen benbo bakeboyaxon itan jawen ainbo bakeboyaxonbi jawékianon ixon jato piti menikatitai,

5 ikaxbi ja Anara bebonhira noia ixon jakon pitishamanbores menikatitai, Ibon bakeaisma imaa ikenbi.

6 Jakopíra, Penina ja rawía ikax, jaki sinati shirokatitai, jawen shinan naman akananti kopí, Ibon bakeaisma imaa iketian.

7 Jaskatira baritiatíibi, ja Ibo rabiti xobonko Ana kaaitian, Penina jaki sinákatitai; jaki jaskataitian winikinra Anan piamakatiai.

8 Jaskákinra jawen bene Elcananin neskáakatiai: “Aná, ¿Jawekopíki mia winiai? ¿Jawekeskati onískinki min piamai? ¿Eaki mina, ja chonka bakeyaati winobainbires jakonhirama iki?” akin.

9 Ja Silonko inontianra, iitibi piá pekáo Ana wenita iki. Jatian ja sacerdote Elí iká iki, ja Ibo rabiti xobo xepoti ochóma jikitiainko, westíora ani yakatinin yakata.

10 Jatian Ananra jakonmabires shinankin itan winiananbi Ibo yokákin neskáa iki,

11 neskara axontira yoia iki: “Jatíbi atipana Ibó: Ea min yonoti ainbaon masá shinannai min oinna jakon iketian, itan ea shinanxon, westíora benbo bake min ea meniketianra, jatíbitian min tee anon ixon en mia meniti iki, jatian min tee ati en menia onanti inon ixonra, jawen boo en xatenantima iki”, akin.

12 Jaskati Ana basiora Ibo bebonmeax yoyo ikaitianra, Elikan jawen kexain oinna iki;

13 ikaxbi ja ainbora shinan meranres yoyo ika iki. Jawe joibi ninkáyamakinbira; jawen kebí koshiaires oinna iki. Jatianra Elikan paenaxa iitai ixon shinanna iki,

14 jainxonra yoia iki: —¿Jawetio basiki mia paenai? ¡Moa pae xeakin jenewe! —akin.

15 Jatianra Anan yoia iki: —Jaskarama riki ibó, jawe paebira en xeaama iki, ea riki masá tenei oniskin, Ibo bebonxon jakon shinan bikasi.

16 Eara jakonma ainbobira iki ixon shinanyamawe, eara nato netebo Dios yokati iki, ayorakin jaakinres shinanni, itan iorai onisai kopí —akin.

17 Jatianra Elikan yoia iki: —Masá shinanyamai jakonbires katanwe. Abánon ja Israelbaon Diossen ja min yokata jawéki mia menikin —akin.

18 Jaskáara ainbaon aká iki: —Ichabires irake —akin. Japekáora Ana ja joibatatoninribi moa baneti kaa iki, jainoax moa pii kaa iki, itan jatianra moa jawetianbi jakiribi onis wetsayamaa iki.

19 Ja wetsa nete xabataitian, yamékirishokora moa Ibo rabia pekáo, jawen xobonko Ramáin moa baneti bokana iki. Japekáora Elcana jawen awin betan yorana iki, jainxonra ja ainbaon yokata jawéki Ibon imaxona iki.

20 Jaskataxa Ana moa tooya baneta iki, jainoaxa moa bakenti nete senenketian, westíora benbo bake pikota iki, ja Ibo yokáyantana kopíra Samuel akin janea iki.

21 Japekáora Elcana jatíbi jawen bakeboya, ja axonti yoiabo senenhati kopí, yoina menixon baritiatíibi menoxonti iketian Silonko kaa iki;

22 ikaxbi já kayamakinra, Anan jawen bene neskáa iki: —Eara kayamapariai nato baken xoma akin jeneai kaman. Jatianra enbi Ibo boxon meniti iki, jatíbitian jain inon ixon —akin aká iki.

23 Jatianra jawen bene Elcananin neskáa iki: —Min oinna, jakon iketian jaskara awé. Iwé baneti ja baken xoma jeneai kaman. Abánon Ibon ja mia akinnoxon yoia keská senenhakin —akin. Jaskataxa ja ainbo baneta iki, jainxonra ja baken xoma akin jeneai kaman aniaa iki.

24 Jatian moa xoma akin jeneketianra, ja bake maxkopari ikenbi, Ibon xobonko Silonko boá iki. Jainxonribira, boá iki kimisha waka bene, rabé chonka rabé litro trigo jainoax westíora bichi chomo uva xeati.

25 Jatianra westíora waka bake bene menokana iki, jainxonra Elí ja benbo bake moa boxonkana iki.

26 Jatianra Anan yoia iki: —Ea jawe jakonmabi shinanxonyamawe, mia jaara kikin ikon iki, jaskara ikonribira en yoiai, ea riki ja ainbo neno mipataxon Ibo orani iantana.

27 Nato bake ea meninon ixonra en Ibo yokata iki, jatianra ea jan menia iki.

28 Enra Ibo moa já menia iki, jatian jaai kamanra jaki menikaata iti iki —akin. Jatianra Elí mainbi bekepinon kaman, Ibo bebon beota iki.