Ana bewaa
2
Jatianra Anan neskáakin orana iki:“Ibó, nokon jointianixbira ea miki raroai,
jaskákinra bená koshibo min ea meniboresai.
Jaskaakin min akinara nokon rawiboki
jakonmai yoyo iti en atipanke,
¡Eara raro iki!
2 ¡Tsoabira mia keska jakon yamake, Ibó!
¡Tsoabira min akai keskáakin panamis yamake!
¡Mia Dios iketianra wetsa yamake!
3 Tsoabira rabíresi yoyo itima iki,
tsoabira jatonbinix bebonbires rabítima iki,
Ibora jatíbi onan Ibo Dios iki,
janra jonin akábo toponnai itan ja akábo yoixonai.
4 Janra koshibaon kanótibo sekepakeai,
itan yosmabora koshi meniai;
5 ja moatian jaton jawékiati texeakatiaibora,
rama pan pakex kopíres teemakanai;
ikaxbi ja pitin ikátiaibora,
rama moa pitia ikanai.
Ja bakeayamakatiai ainbora,
kanchisi bakenke;
ikaxbi ja icha bakeya ikátiaitonra,
moa bakeati atipanyamake.
6 Noa mawatai itan noa jaaira Ibon imaa noa ikai iki;
mawá kininko raanxonra noa jainoa tsekaribiai.
7 Ibonra noa jawebioma imai,
itan icha jawékiaribi noa imai;
noa rabinmai, itan noa jakonhain imai.
8 Main rakáketian weninai keskáakinra, tson akinyamai joni Diossen akinnai,
jatian ja jawebioma jonira, manishpotatiainoabi pikoai,
joni koshibo betan yasánnoxon,
jaskáxonra jain kikínbores ikainko imai,
ja Ibora jan mai tewanabo aká ibo iki,
ja axonra ja pekaten nato nete aká iki.
9 Janra jawerano inonbi, akonkin já chibanaibo koirannai,
ikaxbi ja jakonmabora, jakonmainoax mawákanai,
tsonbira jaton koshinbi jaskarabo janresti atipanyamake.
10 Ibonra jawen rawibo jato keyoti iki,
jatoki sinatira naikannmeaxbi tirin iti iki.
Ibonra jatíbi nato netenxon akanabo jato yoixonti iki;
jawen katota apora koshi meniti iki,
itan bebonres koshira imati iki”, akin.
11 Japekáora Elcana moa jawen xobonko karibaa iki, Ramáin, ikaxbira ja bake Ibon tee akí baneta iki, sacerdote Elikan ati yoiaibo akí.
Elikan bakebaon jakonma aká
12 Elikan bakebaonra jakonmai jaabo ixon, Ibo jawemabiakin shinankana iki,
13 ja sacerdote ixon atira jonibo betan ayamakana iki; jawetianki ja Ibo yoina menoxonkin tson inonbires beai, jatianra ja sacerdotebaon yonoti tenedor tsomaya jokatiai, ja nami yoá akanainko,
14 joxonra ja ani yamikentiainoa itan ja wetsa kentiainoa, jainoax maxko kentiainoa iamax jan piti noeati jatíbi kentiainoabo, ja tenedornin bikátiai, ja biaibora sacerdotebaona iká iki. Jatíbi ja Silonko nokotai israelitabora jato jaskáakatikanai.
15 Jainxonribira, ja makan tsamanaton axon xeni menokanamatianbi joxon, ja sacerdotenin yonotinin, ja yoina menoai joni yoikatitai: “Ea nami meniwe, en sacerdote xoixonon; nami wá iketianra mia bixontima iki, paxara keenai”, akin.
16 Jaskáabi ja boai jonin yoitiki: Rekenparira xeni menoti iki, ja pekáoparira min keenshaman min biti iki, akin. Jatianra ja yonotinin akátiai: “¡Iamarake ramabira min ea meniti jake! Min ea meniamaitianra, en mia koshi meexon bichinai”, akin.
17 Jaskaákin ja Elikan bakeranobaon, Ibo bebon ocha akára kikínbires jakonma iká iki, ja Ibo menikanai jawékibo jakonmareskanai ikax.
18 Jatian jaskákanai kamanra, bakeranon Samuelnin; lino chopa tari sawéyaxon Ibon tee axonkin chibanboresa iki.
19 Jainxonra baritiatíibi jawen titan, ja Dios rabiti xobonko jawéki menii kakin jawen bene betanbi, baritia senenatíibi ja axona westíora jan perakooti maxko bokatiai.
20 Jatianra Elikan, Elcana betan jawen awinki jato jakonhakin shinanxonkin, neskáa iki: “Nato ainbaon jawen bake Ibo menia iketian, mia abánon jan kopíakin, nato ainbo meranxon wetsa bakebo mia menikin”, akin. Japekáora jaton itinko moa baneti bokana iki,
21 jainxonra Ibon Ana jakonhaboresa, moa tooribia iki. Jatianra Anan kimisha benbo bakeaxon, rabé ainbo bakea iki, ikaxbi jawen bake Samuelra Ibo bebonmeax anikaresa iki.
22 Jatianra Elí moa yosiora iká iki, ikaxbi janra jawen bakebaonki israelitabo jawekeskabo abea iki ixon, moa jatíbi ninkata iká iki, jainoaxibira ja Diossen xobo xepotiain teetai ainbobo betanribi oxakana iki.
23 Jaskara ikenra jato neskáakin yoia iki: “Jatíbi jonibaonra maton jakonma akaibo ea yoikanai. ¿Jawekopíki mato jaskatai?
24 Mato riki nokon bakebo, en oinnara jaskara itima iki, jatíbi Ibon jonibaonra mato jaskara ikaibo jato yoikanai.
25 Westíora joni iti iki, wetsa joniki ramiti, jatianra tsonkaya akárin iki ixon Ibon jato akinti iki; ikaxbi jawetianki westíora joni Iboki ramitai, ¿Jatianki tson ja joni akinti iki?” akin. Ikaxbi ja bakebaonra, jawen papan yoiabi ninkáxonyamakana iki, jaskara iketianra Ibon moa jaton jati bichinnoxon shinanna iká iki.
26 Jaskákanai kamanra, ja bakeranon Samuel anikaresa iki, jatian Diossen itan jonibaon jawen iká oinnara, jakonhira iká iki.
27 Jaskara inontianribira westíora profeta, Elíba nokota iki, jainxonra neskáa iki: “Ibonra moa onantishamanhakin neskáakin yoike: ‘Jatian maton rekenbo faraónman iboaxon jato Egiptonko jakinna inontianra, en moa jato onantishamanhakin oinmaa iki.
28 Jatíbi ja Israelbaon rarebo xaranmeara, nokon sacerdotebo inon ixon en jato katota iki, ea makan tsamanxonkanaton yoinabo keyokin menoxonaibo itiakin, itan incienso inintibo menoai itiakin jainoax eiba jayá kati tari saweti. Jainxonribira maton rekenbo, ea Ibo iketian israelitabaon jatíbi jawéki ea menikin menokanaitian en jato bomaresa iki.
29 ¿Jaweatiki, ja meniti en yoia yoinabo itan jawékibo min yoyota iki? ¿Jaweatiki, ea ati bebonbires min bakebores kikinhakin shinanxon, nokon joni Israelbaon menia jawékibo, jatíbi jakonbo katóxon min bakebo min xoámaa?’ iki.
30 Jaskara ikenra, ja Israelnin Ibo Diossen, mia itan ja min xobon ikáboyaxonbi jatíbitian tee axonti mia yoia ixonbi, rama onantiakin yoiai: ‘Jawekeskáxonbira en jato jaskara imayamai, ea kikinman shinanaibora, en jato kikin jakon imati iki, jan ea omissaibora, iresabires en jato imati iki. Ea, Ibo Dios ixonra, en ikon yoike.
31 Jatian ja min koshi, itan min rekenbaon koshi en keyoti netera moa ochóma iki, jatianra tsoa min rarebobi yosinon kaman jatima iki.
32 Israelhain jatíbi jakon jawéki en akaitianra masá teneananbi itan notsiananbi min ointi iki, jatianra tsoa min rarebobi yosinon kaman jatima iki.
33 Ikaxbi jaweti maton rareboresa, jainxon yoina menoti nokon makan tsamá ochóma en jato imati iki, abánon oinnax notsiaitian jato beron chexakin itan ibakanon jaton kayanko chexakaati, jainoax wetsa min chiní bakebora jatíbi jato retekanti iki.
34 Ja min bake rabé Ofni betan Finees jaskara winotara, ja oinxon min onanti iti iki: já rabéra ja netebicho mawákanti iki.
35 Japekáora jakon iketian itibi jaki koshiti sacerdote en imati iki, ea keena keská akaira iti iki, itan ja ati en yoia akaira iti iki, en meniara jatíbitian jawen chiní bakebo jati iki, ja en katota apo jatíbitian tee axonaira iti iki.
36 Jatianra, jatíbi ja min rarebo mawatamabo, koríki iamax pan pakex meninon ikax já bebon chirankooti bekanti iki, jawe tee ati inonbi non jawékiati binon sacerdotebo betan noa teemawe akin yokati’ ”, akin.