2 Ikaxbi wetsa netera Elí, moa benchei peokooxon jakonhakin ointi atipanyamaa ikax, jawen chitéain oxaa iká iki.

3 Samuelra Ibon xobonko, jain esé iká ani bonanti ikainko oxai rakata iká iki. Jatianra ja Dios rabiti xobonkonia lámpara nokaamapari iká iki.

4 Jatianra Ibon kenaa iki: —¡Samuel! —akin. Jatian jan aká iki: —¡Eara neno iki! —akin.

5 Jatianbira Elí ikainko ishtoi kaxon yoia iki: —Eara moa joke; ¿Jawe atiki min mia keena? —akin. Jatianra Elikan aká iki: —Enra mia kenama iki, oxatanwe —akin. Jatian jaskaara moa Samuel oxaa iki.

6 Ikaxbi Ibon kenaribia iki: —¡Samuel! —akin. Jatianra Samuel wenítaanan Elíiba kaxon neskáa iki: —Eara moa joke; ¿Jawe atiki min ea keena? —akin. —Enra mia kenama iki, baké oxatanwe —akinra Elikan aká iki.

7 Samuelninra Ibo riki ixon onanama iká iki, moabi jaki pikóxon jan jaskáama iketian.

8 Ikaxbi jawen kimisha itínra, Ibon Samuel kenaribia iki, jainoaxa wenítaanan Elíiba kaa iki: —Eara moa joke; ¿Jawe atiki min ea keena? —akin. Jatianra moa Elikan onanna iki, nato bakeranonra Ibon kenaa iitai ixon,

9 jaskákinra neskáa iki: —Kaax oxatanwe; ikaxbi Ibon kenaara min neskáati iki: ‘Ea yoiwe, min yonotininra mia ninkatai’ —akin. Jatianra Samuel jawen rakátiain kaax moa oxaa iki.

10 Japekáora, Ibon joxon ja moa awana keskáribiakin kenaa iki: —¡Samuel! ¡Samuel! —akin. Jatianra Samuelnin aká iki: —Ea yoiwe, min yonotininra mia ninkatai —akin.

11 Jainxonra Ibon yoia iki: —Westíora jawékira en Israelhain akai, jatíbi jan ninkatabaonra akonbireskin jakonma shinanti iki.

12 Ja netera iamama senenti iki, jatíbi ja Elikan bakebo yoikin en aká jawékibo.

13 Enra moa yoia iki, min bakebora en jatíbitian masá tenemai kaai ixon, janra moa onanke ja jakonma akanabo; itan jawen bakebaon ea jakonmainbira jan jato notsinyama iki.

14 Jaskara iketianra ja Elikan bakeboki ramíkin, akonkin senenhanox ea neskata iki, jawetianbira jaton jakonma aká jawékibo en keyotima iki, yoinabo menikin retexon, itan ja meniti jawékibo ea menikankenbi —akin.

15 Jaskarabo iká pekáora moa Samuel oxaa iki, jatian moa nete xabaketianra ja Ibon xobo xepotibo moa kepena iki. Jatian ja namá keska meran iwana Elí yoitininra Samuel raketa iki,

16 ikaxbira Elikan kenaxon neskáa iki: —¡Nokon bake Samuel! —akin. Jatian janra: —Eara neno iki —akin aká iki.

17 Jainxonra Elikan yokata iki: —¿Jawekeskaki mia Ibon yoia? En mia yokatai riki, jawebi joneyamakin ea min yoitinin. ¡Ja mia Diossen yoia jatíbi jawéki, min ea yoiamaketianra, akonbireskin mia jan masá tenemati iki! —akin.

18 Samuelninra jawebi joneyamakin, jatíbi ja ikabo onantiakin yoia iki, jatianra saí ianan Elí neskata iki: —¡Jara Ibo iki! ¡Jan oinna jakon iketian jaskara abanon! —iki.

19 Samuelra ania iki, itan Ibonra akinna iki, jainoax ja axónnoxon yoia jawékibora westíorabi ayamai iamakin senenhaxona iki.

20 Jatian jatíbi Israelbaonra, Danhinxon peoxon Beersebain kamanxon, Samuelra ikon Ibon profeta iki ixon, onankana iká iki.

21 Jainxonra Ibon jakiribi Silonko pikóxon onanmakin oinmaboresa iki, jainra iká iki jainxon Samuel jawen joi onanmaa;