Jaskarabo inontianra, filisteobo Israelbo betan reteananox tsinkita iki, israelitabora filisteobo betan reteanani boax Eben-ezerhain ikana iki. Jatian filisteobobiribira Afec ikain tsamákana iká iki,

2 ja israelitabo akí bonoxa, filisteobo jain tsamakana iká iki, jatianra reteanankin filisteobaon israelitabo jatoaresa iki, chosko waranka jonira ja reteanankin jato retekana iki.

3 Jatianra israelita sontárobo jato ikainko moa banéribikana iki, jainxonra Israel koshibaon jato neskáa iki: “¿Jawekopíki ja Ibon, filisteobaon noa ayonainbi jato amaresa? ¡Silonkonia, Ibon ja senenhabekonti joi jain iká ani bonanti binon bokanwe, jatianra noiba iti iki, jaskataxa non rawiboibakeax noa xabakaati iki!” akin.

4 Jatianra israelitabaon westíora tsamá joni Silonko jato raana iki, jabaonra jainoa jatíbi atipana Ibon ja senenhabekonti joi jain iká ani bonanti moa bekana iki, jawen yakátira iká iki, ángel querubinbokibi aká. Ja Elikan bake rabé Ofni betan Fineesenra, Diossen ja senenhabekonti joi jain iká ani bonanti bokanaitian chibankana iki.

5 Jainoax ja carpa peota ikainko, Ibon ja senenhabekonti joi jain iká ani bonanti nokotaitian, kikinni raroi israelitabo mai shakónon kaman saí ikana iki.

6 Jatian jaskati saa ikanai ninkataxa, filisteobo yokakanankana iki: “¿Jawekeskatiki hebreobaon carpa peotainko ichaira saa ikanai?” iki. Ikaxbi ja Ibon esé jain iká ani bonanti, moa carpa peotainko nokota onanaxa,

7 raketi neskákana iki: “¡Diossa carpa peotainko nokóke! ¡Jawe ireskiaipanon noabo, rama kamánbira noa jaskaisma iki!

8 ¡Jawe ireskiaipanon noabo! ¿Tsonmein ikonbires koshi Diossen mekenmamea noa xabáati iki? ¡Janra egipcio jonibo tsoa jonibi jain jaama mananmanxon, jatíbi meskó masá teneti jakonmanin jato keyoa iki!

9 ¡Filisteo sontárobo, koshiakin shinantaanan moa reteanantires ikanwe, itan koshi shinanyanixa mato reteananti iki, hebreo jonibaonra noa kikinhakin yanka yonokanake, jabo maton aní keskáakin!” iki ikana iki.

10 Jatianra filisteobaon israelitabo moa reteanankin peoribia, itan jatoaresa moa, jaton carpa peotainko jabati bokana iki. Akonbireskinra jato retekana iki, jan reteananti jawéki boai sontarobora, kimisha chonka waranka joni retekana iki.

11 Jainxonribira ja Diossen esé jain iká ani bonanti jato bichinkana iki, itan ja Elikan bake rabé Ofni betan Fineesa retekana iki.

12 Ikaxbi westíora sontáro Benjamínman rarebora, ja reteanantiainoax jabata iki, chopa waxabires itan mapo maibiresa ishtoi jabati kaax, ja netebi Silonko nokota iki.

13 Jatian ja joni nokónontianra, Elí westíora ani yakatinin ja xepoti pataxbi bai naisi yakata iká iki, ja Diossen esé jain iká ani bonantiakinres shinani. Ja joninra jeman nokóxon ja bea joibo jato yoia iki; jatianbira jatikaxbi jainoa jonibo saí iki, peokokana iki.

14 Jaskati saí ikanaitian ninkaxonra, Elikan jato yokata iki: —¿Jawe akíki, jatíbi jaskati saa ikanai? —akin. Jatianra ja joni, Elíiba ja joi keshani ishtoi kaa iki,

15 jatianra Elí moa iskon chonka posaka baritiaya iká iki, jaskara ikaxa moa kikinni benchea iká iki.

16 Janra yoia iki: —Reteanantiainoax jabataxa ea ramashokobi nokóke —akin. Jatian Elikan yokata iki: —¿Jaweki mia winota nokon baké? —akin.

17 Jatian ja joi beatonin yoia iki: —Israelbora moa filisteobo bebomeax jabákanke. Jainxonribira akonbireskin jonibo retekanke, jainribira min bake rabé Ofni betan Finees mawáke, itan ja Diossen esé jain iká ani bonantira filisteobaon mekenman banéke —akin.

18 Jatian ja joi beatonin ja Diossen esé jain iká ani bonanti yoiketianra, Elí xepoti pataxbi jawen ani yakati manbires, pekatenbi paketa iki. Jatian ja jonira moa yosi, itan iwe ikax, tetonko toekainax mawata iki. Jara iká iki chosko chonka baritia senen, Israelbaon koshi iká.

19 Jawen baban ewa, ja Fineesen awinra jatian tooya iká iki, itan moa bakentiresibi, ja Diossen esé jain iká ani bonanti bichinkana onanax, itan jawen benen papa betan jawen benebi moa mawata ikenra, jabaonbi masá shinanni chexakaati moa bakena iki.

20 Jainxonra ja akini beabaon, mawákasaitian neskáakin yoikana iki: “Rakéyamawe, westíora min benbo bakera pikóke”, akin. Ikaxbi ja ainbaonra jawebi jato yoiamaa iki, jatora ninkáxonyamaa iki;

21 ja bakera Icabod akin janekana iki: “Jaskatara ja Diossen esé jain iká ani bonanti bichinkana iketian, akana iká iki, Israelra moa jawen Diosyoma banéke”, akin.

22 Jara Diossen esé jain iká ani bonanti jato bichinkana kopí, itan jawen benen papa mawata iketian, jainoax jawen beneribi mawata iketian, yoiabo iká iki.