Diossen esé jain iká ani bonanti filisteobaon main iká
5
Ja Diossen esé jain iká ani bonanti bixonra, filisteobaon Eben-ezerhainxon, Asdodhain bokana iki;2 jainxonra, ja dios Dagón rabiti xobo meran jikimaxon ja pataxbi akana iki.
3 Wetsa nete xabáketianra, Asdodhainoabaon nokóxon ja dios Dagón, ja Ibon esé jain iká ani bonanti bebonbi, mainbi rakata merakana iki. Jatianra ja dios Dagón weninxon jawen itinkobiribi akana iki.
4 Ikaxbi wetsa nete xabáketianra, Asdodhainoabo nokóribikana iki, jainoax jakiribi jikixon, ja Ibon esé jain iká ani bonanti bebon, ja dios Dagón mainbi rakata meraribikana iki. Jawen mapo betan jawen rabé mekenbi iká iki sekékaina, ja jaton dios rabiti xobo jikitiainko rakata. Jatian jawen yorabichores iká iki jatiobi.
5 Jaskara kopíra ramakamanbi, dios Dagónman sacerdotebaon, Asdodhain iká jainxon jaton rabiti ani xobonko jikikin ja xepótiain makan joyota jamáyamakanai.
6 Japekáora Ibon jato akonbireskin masá tenemaa iki, Asdodhainoabo betan ja mainmeabora jato nonbé isiman imaa iki, jaskatira ikonbires raké banékana iki.
7 Jatian jaskarabo winotai oinnax, Asdodhainoa jonibo neskákana iki: “Israelbaon Diossen esé jain iká ani bonantira noiba itima iki, ja Diossenra akonbireskin noa masá tenemai, itan noa amaribikinbira non dios Dagónribi masá tenemai”, iki ikana iki.
8 Jaskákinra jatíbi filisteo joni koshibo tsinkínon ixon, jato keshanti raankana iki, jainxonra yokákana iki: —¿Nonki Jaweatiki ja Israelbaon, Diossen esé jain iká, ani bonanti? —akin. Jatianra jabaon yoia iki: —Gat jemanko botankanwe —akin. Jatianra filisteobaon jain bokana iki.
9 Ikaxbi jaskáakin moa bokankebira, Ibon jatíbi ja jemamea jonibo jato rakémaa iki, yosiboyabi, bakebo jato nonbé isiman imaa iki.
10 Jatianra filisteobaon ja Diossen esé jain iká ani bonanti Ecrónhain bokana iki, ikaxbi ja jain nokóketianra, Ecrónhainoa jonibo koshin saí ikana iki: “¡Noa jatíbi mawánon ixonra, ja Israelbaon Diossen esé jain iká ani bonanti noa bexonkanke!” ikibo.
11 Jainoax jatíbiain ja jeman, Diossen jato akonbireskin masá tenemati jawéki raana ninkatax, ikonbiresi rakékana iki, jatianra jatíbi filisteo joni koshibo kenati jato raankana iki, ja bekanketianra jato neskáakin yoikana iki: “Nenoa, Israelbaon Diossen esé jain iká ani bonanti ja maton jainoa beainkoribi moa botankanwe. Noa jatikaxbi mawáyamanon ixon”, akin akana iki.
12 Ja jemamea jonibora jaton diosbo yokati ikonbiresi saí ikana iki, ikaxbi ja mawatamabaon yorabora nonbébires ikana iki.