2 Jainxonra filisteobaon ja sacerdotebo betan shinanmanres onanmisbo, jato yokánoxon kenakana iki: —¿Jaweki ja Ibon esé jain iká ani bonanti betan non ati iki? Noa yoikanwe, jawekeskaxonmein ja bekanainkoribi non boti iki ixon —akin.

3 Jatian jabaon jato yoia iki: —Ja Israelbaon Diossen esé jain iká ani bonanti, ja bekanainkoribi banekinra, maton jawebioma raantima iki, ja jakonma aká kopíra, ja menitia maton Iboiba raanti iki. Jatianra moa mato benxoti iki, jainxonribira maton onanti iki, jawekopiki mato masá tenemakin jeneyamaa iki ixon —akin.

4 Filisteobaonra yokata iki: —¿Jaweki non meniti iki, ja non jakonma aká kopí? —akin. Jatianra sacerdotebaon jato yoia iki: —Orora, nonbé jisáakin pichika maton ati iki. Filisteo joni koshibaona westíorabo; jainoax pichika xoya ororibi, ja mato jan akai kikin jakonma jawékininribi, ja maton koshibo masá tenemai iketian.

5 Jaskara iken nonbé jisáakin, itan ja maton mai ramiakai xoya jisáakinboribi akanwe, jaskáaxon ja Israelbaon Dios rabikanwe, jatianra mato itan maton diosbo, jainoax maton maiboribi, moa masá tenematima iki.

6 ¿Jawekopíki ja faraón betan egipcio jonibo iní keskati, mato bebonhira yoitimati iki? Jabaonra Israelbaon Diossen jato masá tenemaaparires, israelitabo jato pikómaa iki.

7 Westíora carreta benáshaman jato amaxonra, japekáo maton kaiai wakankoniabi rabé waka awin maton biti iki, jara iti jake jawetianbi jiwin manexanan jawe jawékibi maton bomayosma, jara maton carretaki nexati iki; ikaxbira jawen bake benebaon chibanaketian, chité meran maton niati iki.

8 Jainxonra Ibon esé jain iká bonanti bixon, carretanin maton naneti iki, jaskáxonra ja maton jakonma aká kopí, ja oro akana jawéki ja menitibiribi caja meran axon, ja bonanti pataxbi maton ati iki. Japekáora carreta moa maton jabicho raanti iki.

9 Ikaxbi matonra ointi iki: Ja nato carretaki wakan jawen maiori Bet-semes ikaori boai ixon, jaskáxonra non onanti atipanke non ani jakonma aká kopíra, ja Israelbaon Diossen noa rabinti imake ixon, ikaxbi ja carreta wetsaori kaketianra noa jan masá tenemama riki ixon, non onanti iki. Jatianra ikeanaxmabi, noa jakonma winota riki iki, noa iti iki —akin.

10 Jatianra ja jonibaon jaskáa iki. Ja waka kaiakanainkonia rabé waka awin bixonra, ja bake benebo moa chité meran xepoa pekáo ja rabé wakaki carreta nexakana iki;

11 jaskáxonra Ibon esé jain iká ani bonanti bixon carretain nanekana iki, jainra oro xoya jisáakin akanabo betan nonbé jisá akin akanabo moa caja meran akana iká iki.

12 Jainxonra ja wakabo Bet-semes bai kaatonin moa raankana iki, wetsaoribo kayamaira pontéshamanres kaai maan iikaina iki. Jatian ja wakabo kaai chibani boaxa, filisteo joni koshibo Bet-semes mai senenainkores bokana iki.

13 Ja Bet-semessainoa jonibora, mai teshanpain trigo tsekai iikana iki, jainxon oinnabainkin, ja jain Diossen esé iká ani bonanti merax ikonbiresi rarokana iki.

14 Ja Bet-semessain iká, Josuénin wainko moa nokotax ja carreta tsasia iki. Jainra westíora ani makan iká iki. Jatian ja Bet-semessainoa jonibaonra, ja jiwi carreta moa karoakana iki, jaskáxonra ja wakabo moa Ibo menixon, keyokin menokana iki.

15 Levitabaonra ja Diossen esé jain iká ani bonanti betanbi, ja oro jain akana caja jawékiya pakexon, ja ani makanmanbi tsamankana iki; jatian ja netera Bet-semes jonibaon Dios yoinabo menixon jatiobi keyokin menoxonkana iki, jainxon wetsa jawékiboribi menikana iki.

16 Jaskarabo oinna pekáora ja pichika filisteo joni koshibo moa Ecrónhain boí ja netebi banékana iki.

17 Ja pichika nonbé jisáakin oro axon, jaton jakonma aká kopí filisteobaon ja Ibo menikanara iká iki nato jemabaona; Asdodkana, Gazana, Ascalónmana, Gatna jainoax Ecrónmana;

18 jainoax ja oro xoya akanabora, ja pichika filisteobaon jemamea joni koshibotiibi akana iká iki, ja toponkana jemabora makan chitéyabo itan maxko jemabo chitéomaboribi iká iki. Jatian ja Ibon esé jain iká bonanti jan perakani ani makanra, Bet-semessain rama kamanbi Josuénin wainko japarike.

19 Ikaxbi Ibonra, ja esé jain iká ani bonanti chichó oinni kaketian, jaweti Bet-semessainoa joni jato mawámaa iki. Kanchis chonka jonira mawata iki, jaskáakin ja jemamea jonibo Ibon jato ichaira mawámaa iketianra, ja jemamea jatíribi jonibo kikinbiresi winikana iki.

20 Jatianra Bet-semessainoa jonibo neskákana iki: “¿Tsoamein ja jakon Ibo Dios bebon jati iki? ¿Noa jenebaini kaxonmein, tsoa ati iki?” iki.

21 Jainxonra Quiriat-jearim joniboki neskara joi raankana iki: “Filisteobaonra, Diossen esé jain iká ani bonanti moa banekanke: jaskara iketian ja bii bekanwe”, iki iká.